Солонгосын ЭСЯ хилээр хууль бусаар алт гаргахыг завдсан иргэдийнхээ эрх ашгийг хамгаалж байна

>

Эрүүгийн хуулийн 175 дугаар зүйл ангиар эрүү үүсгэгдсэн    Солонгосын 13 иргэн Ганц худагт хоригдож, мөрдөн байцаалтын ажиллагаа үргэлжилж байна. 13.3 кг алтыг Монголын хилээр хууль бусаар гаргахыг  завдсан  Солонгос иргэдтэй холбоотой мэдээллийг мөрдөн байцаалтын явцын нууц гэдэг үндэслэлээр  манай тал ихэд нууцалж байгаа. Гэхдээ   Монголд нэг сарын хугацаатай ирсэн, 33-42 насны эрэгтэй хүмүүс гэсэн мэдээлэл бий.  Тэгвэл тэднийг  Монголд 7 хоногийн хугацаагаар жуулчлалын шугамаар ирсэн гэх мэдээлэл байна.  Харин  Монголын тал нутгийг үзэж харах гэж үнэхээр жуулчлалын шугамаар ирсэн үү,  эсвэл алт авах төлөвлөгөөтэй  Улаанбаатарт буусан уу гэдэг нь  мөрдөн байцаалтын үр дүнд тодорхой болох юм. Мөн Солонгос иргэдтэй холбоотой сүүлийн мэдээлэл нь Манай улс дахь тус улсын ЭСЯ-наас иргэдийнхээ асуудлаар Монголын төр засгийн төвшинд хүсэлтээ гаргасан  байна. Монгол-Солонгос хоёр улс нь удаан жилийн туршид олон талын хамтын ажиллагаатай байж ирсэн. Тэрчлэн Монголын олон мянган иргэн Солонгос улсад албан болон албан бусаар хөдөлмөр эрхэлж байгаа. Мэдээж Монгол улс гэм буруутай этгээдүүдийг  хуулийн дагуу шийтгэх  ёстой ч,  Солонгосын тал 13 иргэнийхээ эрх ашгийг илүүд үзэхдээ, төр засгийн хэмжээнд асуудлыг тавьж байгаа нь сонирхол татахгүй байх аргагүй. Түүнчлэн Солонгос иргэдийг шийтгэлээ гэхэд байнга л яригддаг ялтан солилцох журмын асуудал сөхөгдөх юм. Сүүлийн жилүүдэд урд хөршид  манай олон иргэн ял сонссон.  Гэвч  бид иргэдээ  нутагт нь шилжүүлэн  авчирах асуудлыг хоёр улсын хооронд ярьж байгаа ч шийдэгдэхгүй байгаа.  Хэрэв Монголын хууль ном журмын дагуу хэрэгжвэл,  Солонгос улс  бидэнд   ялтан иргэдээ шилжүүлж авах хүсэлтийг тавих магадлал өндөр болж байна.