Бид бүхэн урьд өмнөх учрал, үерхэл, хайр сэтгэл, амьдралтайгаа холбоотой сайн муу, сайхан муухай, аз жаргалтай, уйтгар гунигтай гээд л янз бүрийн цаг мөч, дурсамж бүхнийг сэтгэлдээ тээж явдаг. Үүнийгээ бусдад хэлдэг нэгэн байхад дотроо сэтгэлийнхээ гүнд хав дараастай явах нэгэн ч бий. Гэхдээ эмэгтэй хүн энэ тал дээр илэн далангүй байх магадлал өндөр байдаг.

Иймд бүсгүй та өөртэйгээ холбоотой өнгөрсөнд болсон явдлын талаар тэр дундаа хэн нэгний нэрийг онцгойлон дурьдаж одоо үерхэж буй залуудаа хэзээ ч битгий дурсаарай. Нэн ялангуяа муудалцаж хэрэлдсэн үедээ энэ тал дээрээ маш их анхаарах хэрэгтэй юм шүү. Учир нь бүсгүй танд хэзээ нэгэн өдөр харамсах үе ирэх болно.

Тухайлбал:
• Чи намайг ерөөсөө хайрлаж, халамжилж, бас ойлгож чадахгүй байна. Тэр миний төлөө бүхнийг хийдэг байсан гэтэл чи гээд л…
• Надад өмнөх найз залуу маань цэцэг өгч, ажлаа тараад болзоонд урьж, миний дуртай гэсэн болгоныг минь худалдаж авч өгдөг байсан. Жишээ нь үнэт эрдэнэ, үнэтэй брэндийн сүрчиг, хувцас, цүнх гэх мэтчилэн.
• Хэн нэгэн эрэгтэй хүн өөр эмэгтэйтэй явж араар минь тавьж янз бүр болж, намайг чам шиг хэзээ ч ингэж гомдоож байгаагүй. Чи ч ёстой өөдгүй амьтан юм даа гэх мэт.
• Намайг гэсэн залуучууд хэзээ ч надад ийм бүдүүлэг, эрээ цээргүй хандаж, харьцдаггүй байсан.
• Би хэзээ ч чам шиг ийм тэнэг, ухаан муутай, өөрийн гэсэн бодолгүй хүнтэй учирч байгаагүй.
• Чамд над шиг сайхан эмэгтэй олдсонд баярлаж яв. Би харин чамайг яаж тоосон юм бол доо.

Энэ мэтчилэн олон зүйлсийн талаар бүсгүйчүүд маань үгэн дундаа хавчуулж хэн нэгэнтэй харьцуулж ярьдаг. Харин эрэгтэй хүн энэ тал дээр эсрэг байр сууринаас ханддаг. Тэд хэн нэгэн хүнтэй өөрийг нь харьцуулж ярихад үнэхээр дургүй байдаг. Учир нь эр хүн гэдэг үүднээсээ өөрийг нь бусдаас доогуур үнэлэхийг хүлээн зөвшөөрч чаддаггүй. Гэтэл эрчүүд эмэгтэй хүнд цорын ганц, хэнтэй ч харьцуулашгүй нэгэн байхыг хүсдэг.

/Хань/