Сэтгэл зүйн аюулгүй байдал гэж юу вэ? Энэ нь хувь хүний сэтгэл санааны тэнцвэртэй тогтвортой байдлыг хэлнэ.

Нэг: Өөрийн эрүүл мэнддээ маш анхааралтай хандаж доорх шинж тэмдгүүд танд илэрч буй эсэхийг хяна.
- Нойр алдагдах,
- Түгшүүртэй, уур уцаартай байх,
- Яршигтай бодол байнга орж ирэх,

Хоёр: Сэтгэлзүйд ямар нэг асуудал үүсч байвал доорх зүйлийг амьдралдаа хэрэгжүүл. Үүнд: - Амьдралын хэв маягаа эргэж харж өөрчил,
- Байнгын хөдөлгөөнтэй байхыг хичээ,
- Хөдөлгөөний хомсдол нь таны гол дайсан,
- Эрчимтэй хөдөлгөөн нь стресс тайлдаг,
- Спорт нь бие махбодь, сэтгэлзүйн ачааллыг багасгана,

Гурав: Хамт ажиллагсад болон ойр дотны хүмүүс, эсвэл гэр бүлийн чинь хэн нэгэн таны уур бухимдлыг хүргээд байвал энэ нь төв мэдрэлийн системийн анд амралт хэрэгтэй гэсэн дохио юм.

Дөрөв: Сэтгэл хөдлөлөө барьж төлөв төвшин байж сур. Амьдралын зарим нэг нөхцөл байдлууд нь ямар ч тогтвортой, тайван амгалан хүнийг уурлуулж бухимдуулахад хүргэдэг тал бий.

Тав: Хэрэв та биеэ барьж чадалгүй уурлаж хашигчсан бол өөрийгөө бүү буруутга. Харин, таны уур уцаарыг хүргэж, тэвчээрийг барагдуулсан тэрхүү зүйлд анализ, дүн шинжилгээ хий.

Зургаа: Хэрэв та өөртөө эрүүл саруул дүгнэлт хийж чадвал сэтгэлзүйн хувьд тогтвортой байдлаа хадгалж үлдэх болно.

Долоо: Эерэг, сайн энерги бүхий мэдээллийг шүт. Амьдралын гэгээтэй тал дээр анхаарлаа төвлөрүүлж сур.

Найм: Цаг үеийн хүндрэл бэрхшээл нь нийгмийн сэтгэлзүйд нөлөөлдөг. Мэдээллийн төрөл бүрийн сувгаар амьдралын эрээн бараан, болж бүтэхгүй байгаа зүйлийг түлхүү дамжуулахад хүний тархинд сөрөг цэнэг үүсч, ойр орчныхонтойгоо түрэмгий аясаар харьцах хандлага бий болгодог муу талтай.

Ес: Нийгмийн асуудал ч бас сэтгэл зүйд нөлөөлдөг.
- Эрүүгийн хэргийн нарийн ширийнийг мэдэх гэж улайрах,
- Гэмт хэрэг, аллага, дээрэм түрэмгийлэл сэдэвтэй ном унших нь муу энергийг бий болгодог бол,
- Улс нийгэмдээ эерэг хувь нэмэр оруулах юмсан гэж бодох, чин шударгаар хөдөлмөрлөх гэж эрмэлзэх нь стресс багатай амьдрах таатай нөхцөлийг бүрдүүлж байдаг.