Залуу дуучин Р.Нарантунгалагт..
 

Дуучин Н.Амарбаясгалантай хамтран дуулсан “Чамдаа би хайртай шүү” дуу нь олны хүртээл болж, энэ дуугаараа нэрлэсэн цомог хэвлүүлэн тоглолт хийж байсан нь саяхан мэт.

-Та аль нутагт төрж өссөн бэ?

-Нийслэл хотдоо 1985 онд төрсөн хэдий ч аавынхаа нутгаар овоглодог учир Ховд аймгийн Дарви сумынх гэж явдаг. Ээжээсээ олуулаа, хамгийн бага эрхдүү охин доо.

-Хүүхэд байхаасаа мэдээж урлагт элэгтэй байсан байлгүй?

-Тэгэлгүй яахав. Гурван наснаасаа эхэлж цэцэрлэгт, гэртээ дуулдаг байсан гэж аав ээж ярьдаг. Тэр үед би мэдээ сайн ороогүй байсан болохоор сайн санадаггүй юм аа. Төмөр гуайн дуунуудаас ихэвчлэн дуулна. Бүр хайрын тухай дуунуудыг дуулдаг байсан гээч. (инээв. сурв). Тэгээд сургуульд ороод 1-10-р анги хүртлээ ятга, драм, уран зургийн гэх мэт урлагийн ямар л дугуйлан явагдаж байна орчихно. Бас сургуулийнхаа урлагийн наадмуудыг удирдана. Ерөнхийдөө нийгэмд идэвхтэй хүүхэд байсан гэх үү дээ.

-Арван жилдээ урлагаар хошуучиддаг байжээ?

-Ганцхан сургууль гэлтгүй, дүүргийн олон тэмцээнүүдээс шалгарч, улсын уралдаануудад орж, сургууль дүүргийнхээ нэрийг гаргадаг байсан. Мөн үндэсний телевизэд хүүхдийн жижиг нэвтрүүлгүүд хөтөлнө. Богино киноны дүр ч байдаг шүү.

-Таны 2002 оны “Оддын эрэлд” реалити шоунд оролцож байсан үеийг санаж байна. Тэр үеэ дахин дурсвал?

-Үнэхээр сонин, сайхан асуулт байна. Тэр үед би дөнгөж 9-р ангид орж байсан юм. Ерөөсөө буддаггүй. Тийм юм ч бараг мэдэхгүй жинхэнэ оригоороо оролцож байлаа. Тэр үед жүжиглэх жаахан авьяастай болохоор дуучин болох уу, жүжигчин болох уу гэдгээ шийдэх эргэлзээтэй мөч тулгарсан л даа. Тэгээд л тэр тэмцээнд орж тэнцээд, гэр бүлийхэн болон багшийнхаа зөвлөснөөр дуучин гэдэг мэргэжил сонгосон. Тэр долоон жилийн өмнөхтэйгээ одоог харьцуулбал урлагт жаахан ч гэсэн бүтээл гаргачихсан, дэвжилттэй байгаа болохоор сайхан санагдаж байна.

-Энэ жил оюутны ширээгээ орхиж байгаа байх аа?

-Уг нь хоёр жилийн өмнө төгсөх байсан юм. Тэр үед сонгуулийн ажлаар яваад бас бус хувийн шалтгааны улмаас хойшлуулсан байсан. Ийнхүү тэр ажлуудаа зохицуулаад, энэ хавар дипломоо албан ёсоор гардаж авсан. Энэ жил ахиад л оюутан болохоор Удирдлагын академид орохоор боллоо. Залуу насанд сурч боловсрох нь хамгаас чухал юм болов уу гэж бодож байна.

-Оюутны ширээнээс уран бүтээл хийдэг хүн ховор. Тэр ч байтугай Т.Амарбаясгалан та хоёр шиг цомог гаргаад, тоглолт хийнэ гэдэг багагүй хөдөлмөр гэж бодож байна. Тоглолтын хувьд эргэн дурсвал?

-Цомог тоглолтоо нэрлэсэн дуугаа дуулах үед би 2-р курсэд сурч байсан юм. Дуугаа дуулчихаад хэд хоногийн дараа микро автобусанд явж байтал Соёл урлагийн их сургуулийн оюутан Т.Амаржаргал, Р.Нарантунгалаг нарын хамтран дуулсан “Чамдаа би хайртай шүү дуу энэ долоо хоногийн нийтийн дууны хит парадад тэргүүллээ” гэж зарлахад нь бүр баярлаад, хажууд сууж байгаа танихгүй хүмүүст түүнийгээ хэлмээр санагдсан шүү (инээв.сурв). Тэр үед гар утас ч үгүй байсан болохоор дараагийн буудал дээр буугаад “Түц”-ний цагаан утаснаас Амараа руу залгаж хэлсэн. Энэ дуу маань яг бид хоёрт таарсан, биднийг нээсэн дуу байж дээ гэж одоо боддог юм. Бид хоёр зарим хүмүүс шиг дуугаа мөнгө өгч олон түмэнд цацаагүй. Өөрөө л сонсогчдын хүсэлтээр тэдний захиалгаар дуулагдсаар байгаад хит болсон доо. Анх дуулсанаас хойш таван жил өнгөрсөн ч гэлээ хүмүүсийн дуулах дуртай дуунуудын эгнээнд явсаар л байна.

-Та хоёрт энэ дуунаас гадна “Сартай үдшийн болзоо” гэх мэт өөр олон хит болсон дуу байдаг. Чухам хэн гэдэг хөгжмийн зохиолч, яруу найрагчидтай хамтран ажилласан бэ?

-Маш олон хүн байгаа. Нэрийг нь цохож хэлэх гэхээр зарим нь үлдчихвэл гомдох вий дээ. Жишээ нь, хөгжмийн зохиолч Т.Найданжав, Т.Сэр-Од, Б.Аранза, яруу найрагчдаас гэвэл Н.Баянмөнх, залуу найрагч олон байгаа даа. Энэ дашрамд хэлэхэд бид хоёртой хамтран уран бүтээлээ арвижуулсаар байгаа бүх уран бүтээлчиддээ баярлаж явдгаа хэлмээр байна.

-Тоглолтоо хэдэн онд хийсэн билээ?

-Өнгөрсөн жил анхны “Чамдаа би хайртай шүү” тоглолтоо хийсэн. Бид хоёрын тоглолтыг үзэх гэж хөдөө орон нутгаас хүртэл үзэгч ирсэн байхыг хараад маш их урам авсан даа. Бидний дууг таалан сонсдог, амандаа аялан дуулж явдаг сонсогчиддоо хандаж “Та бүхнийхээ итгэлийг алдахгүй улам их уран бүтээл хийх болноо” хэмээн хэлмээр байна. Бидний дуу дандаа гэгээлэг хайрын дуу байдаг учраас үзэгч сонсогчдод илүү ойр дотно байдаг юм шиг байна лээ. Тиймдээ ч зритель халуун дотноор хүлээж авч байсан шүү.

-Одоогоор та хоёр ямар уран бүтээл дээр хамтран ажиллаж байна вэ?

-Хамгийн сүүлд бид хоёр хөгжмийн зохиолч Э.Пүрэвдоржийн ая, У.Баярсайханы шүлэг “Миний мэдэх үзэсгэлэн” дуу бүтээсэн байгаа. Миний дангаараа хийсэн уран бүтээл гэвэл Б.Аранзагийн ая, Мөнхжаргалын шүлэг “Хайрлая чамайгаа” шинэхэн дуугаа өлгийдөж авлаа. Мөн клипний ч зураг авалт дуусаад байж байна даа. Ер нь ганцаарчилсан уран бүтээл нэлээн хэдийг хийсэн.

-Шинэ цомог гаргах бодол байна уу?

-Тэгэлгүй яахав. Анхны ганцаарчилсан цомгоо гаргахаар төлөвлөж байгаа. Нийт 8-10 дуу багтаая гэж бодож байна. Хамгийн гол нь чанартай бүтээл хийхийг л зорьж байна даа.

-Уран бүтээл хийхэд зайлшгүй хөрөнгө мөнгө шаардагдаж байгаа. Тэр тусмаа өнөөдрийн эдийн засгийн хямралтай үед ямархуу байдлаар үргэлжлүүлж байна. Хамтран ажилладаг ивээн тэтгэгч байгууллагууд бий юу?

-Одоогоор дан өөрийн халааснаасаа л гаргаж байна даа. Бас хэдэн уран бүтээл гаргасан болохоор бүтээлийн ашиг гэж бас бага сага төгрөг орж ирнээ. Ер нь цаашдаа дан өөрөөсөө гаргаад байна гэхэд хэцүү учир зарим нэг байгууллагатай хамтран ажиллах тал дээр дотроо бодож л байна.

-Уран бүтээлийн тань тухай нилээдгүй ярилцлаа. Дургүйцэхгүй бол таны хувийн амьдралын талаар багахан хөөрөлдье гэж бодож байна? Гэр бүлтэй болох төлөвлөгөө байгаа юу. Найз залуутай юу. Энэ сайхан залуухан бүсгүйг харахгүй өнгөрөх залуучууд гэж бараг байхгүй байлгүй?

-Одоохондоо гэр бүлтэй болох бодол алга. Эхлээд сурч боловсоръё. Хүмүүстэй харьцаж таньж мэдье. Тэгснийхээ дараа л ирээдүйн хань болох хүнээ сонгох байх даа. Найз залуугүй ээ.

-Энэ яриаг сонссон, уншсан залуус тань руу анхаарлаа хандуулах байх даа?

-Эргүүлэх гэж утасдаж мессеж бичдэг л юм. Тэр бүхэнд эмэгтэй хүний нарийн ухаанаар ханддаг. Ирээдүйн хань болох хүнээ сэтгэл нийлбэл хүлээж авна даа.