Нэгэн үе манай улсын олон иргэн амьдралаа дээшлүүлэхийн тулд гадаад орныг зорьж, ажил хөдөлмөр эрхлэх болсон. Тэдний ихэнх нь Солонгос улс руу явсан. Харин өнөө үед дэлхийн санхүү, эдийн засгийн хямралтай холбоотойгоор гадаадад ажил хийж, мөнгө олохоор явах иргэдийн тоо цөөрч байгаа.

Өмнө нь “Гадаадад ажиллах хүч илгээх төв”-ийн үүд хүний хөл хөдөлгөөнд дарагддаг байсан бол одоо нам жим болжээ. Учир нь дэлхийн санхүү, эдийн засгийн хямралтай холбоотойгоор Солонгосын тал зургадугаар сарын нэгнээс энэ сарын 30-ныг хүртэл ажиллах хүч авахгүй хэмээн мэдэгдсэн аж. Тус улсын пүүс компаниудын үйл ажиллагаа хумигдаж, зарим жижиг компани хаалгаа барихад хүрсэн байна. Иймд улс орныхоо иргэдийг эхний ээлжинд ажилтай байлгах нь чухал байгаа бололтой. Үүнтэй холбоотойгоор Монгол болон бусад орноос ажиллах хүч авахаа зогсоожээ. “Гадаадад ажиллах хүч илгээх төв”-ийн самбарт “Дэлхий дахиныг эдийн засгийн хямрал нүүрлэж байгаа тул Солонгос руу ажиллахаар явах иргэдийн тоо эрс цөөрөх магадлалтай байна” хэмээн бичсэн байв. Дарга нь амарсан тул энэ талаар тодорхой мэдээлэл өгөх боломжгүй хэмээн хэлж байлаа. Тэгээд ч өгчих дорвитой шинэ мэдээлэл байхгүй. Байдал өмнөх саруудтай адил байгааг хэлсэн. 

Солонгос улс манай орноос гадна 13 улсаас ажиллах хүч авдаг аж. Хамгийн түрүүнд ажиллах хүч авдаг эхний таван орны нэгд манайх багтдаг байна. Иймээс тус улсад хямрал саарч, ажиллах хүч авахад хүрвэл хамгийн эхэнд манай улсад хандах гэнэ. Манай улсын “Гадаадад ажиллах хүч илгээх төв”-д хандаж, тэнцсэн иргэдийн мэдээллийг хяналтын программаар дамжуулан БНСУ-ын хөдөлмөрийн биржид байршуулдаг. Тус улсын хөдөлмөрийн бирж өөрийн орны дүүргийн 80 гаруй биржид нэрийг тараан байршуулдаг аж.

Гадаадад ажиллах хүсэлтэй иргэнд ажлын санал ирснээс хойш 14-90 хоногийн дотор явах ёстой байдаг. Ингэхдээ хөдөлмөрийн гэрээгээр явах иргэд нийт 596 мянга 750 төгрөгийн зардал гаргадаг бөгөөд энэ нь 422 ам.доллар болох аж. Үүнд Солонгос улсын визинд орсон 50 ам.доллар багтдаг байна.

“Гадаадад ажиллах хүч илгээх төв” мягмар гариг бүр иргэдийг гадаад руу явуулдаг. Харин Солонгос болон бусад улс ажиллах хүч авахаа зогсоосон тул дээрх төвийн ажил үндсэндээ зогсоод байна.

Он гарснаас хойш тус төв 500 гаруй иргэнийг гадаадад хөдөлмөрийн гэрээгээр ажиллуулахаар явуулжээ. Энэ нь бага тоо бөгөөд өмнөх жилүүдэд долоо хоногт 100 гаруй хүн явдаг байжээ.

“Гадаадад ажиллах хүч илгээх төв” Нийгмийн хөдөлмөр, халамжийн газартай хамтран гадаадад ажиллах сонирхолтой иргэдийг орон даяар бүртгэсэн. Үүнд 9000 гаруй хүн хамрагдсан байна. Эдгээрийн 4900 нь эрүүл мэнд, хэлний шалгалт болон бусад шалгуурт тэнцэж үлдсэн аж. Гэвч тэнцсэн иргэдийн цөөн хэсэг нь л гадаадад гараад байна. Иймд үлдсэн иргэд бухимдах болжээ.