Та энхэл донхолоор яваагүй бол дардан зам энэ шүү гэж хэрхэн мэдэх вэ?
Саад бэрхшээлийг туулаагүй бол амжилтыг яаж, хэрхэн олж харах вэ?
Нэгэн суут ухаантан "Амжилт бол чулуунд боодолтой эрдэнэ" хэмээн хэлсэн байдаг.
Та тэр чулууг хусч, зорж арилгахгүйгээр, саад бэрхшээлийг даван туулахгүйгээр хэрхэн яаж амжилтад хүрэх билээ?

Амжилт, ялагдал хоёр хөшгөөр тусгаарлагддаг
Балчир хүүхэд хэн нэгнийг даган дууриасаар оюун ухаан нь өсч байдаг бол, хүн нас ахих тусмаа гадаад орчинд өрнөж буй, өөртөө тохиолдож байгаа зүйлсийг задлан шинжилж, ухаан бодлоо тэлсээр явдаг байна.
Бурхан тэнгэр хүн бүхэнд эрх тэгш ханддаг. Тэрбээр биднээс итгэл найдварыг минь авч явахын тулд бидэнд бэрхшээлийг өгдөг. Ихэнх хүн бэрхшээлийн өмнө шантарч ухардаг болохоор үр дүн нь харилцан адилгүй байдаг ажээ.
Боловсорч гүйцсэн алим мянга түмэн хүний өмнө унаж байсан хэдий ч гагцхүү Ньютон л газрын татах хүчийг олж харж нээсэн юм. Энэ нь саад бэрхшээлийн өмнө нугаралгүй тэмцэж, зөв хариултыг тасралтгүй эрж хайж явсан Ньютон амжилтад хүрснээс бус, бурхан тэнгэр Ньютонд илүү их хайртайдаа тэр энэхүү хуулийг нээсэн юм биш ээ.
Тиймээс амжилт ба ялагдал нь хоорондоо маш бага зайтайгаар, ердөө л хөшгөөр тусгаарлагдан оршиж байдаг байна. Бизнес эрхлэгч хэн бүхэн шил шилээ дарсан олон асуудал, олон бэрхшээлтэй тулгардаг. Амжилтад хүрсэн бүхэн саад бэрхшээлүүдтэй ширүүн дайн хийсний эцэст бэрхшээлийн ард байсан амжилтыг олж авдаг байна.
        
Зорилгоосоо бүү ухар
Идэж уухаас өөр эрдэмгүй хүн аяллаар явах туйлын дуртай байжээ. Нэгэн удаа тэрбээр аялалд явахдаа тэжээж байсан гахайндаа идэх юм үлдээхээ мартчихжээ. Тэгж яваад сарын дараа эргээд ирэхэд нь гахай үхчихсэн байж. Харин уншигч Та тэр гахайг өлсч үхсэн хэмээн бодож байна уу?
Залуугийн хамгийн түрүүнд олж харсан зүйл нь хаалганы булан дахь жижигхэн зайгаар зүтгэсээр байгаад бяцарчихсан гахайнх нь толгой юм. Лавшруулан харвал мөнөөх булангаас холгүй зайд хоол нь байжээ. Гахай хоол идэх гэсэндээ, хоолны төлөө тэмцэн тэмцсээр эцэст нь аминаасаа салжээ.
Магадгүй энэ хорвоод зөвхөн хүн төрөлхтөн л өөрийн зорилгыг хамгийн амархан орхидог байх. Хэрэв онгон зэрлэг байгальд ямар нэгэн амьтан амьдрах тэмүүллээ орхих л юм бол тэр амьтан үхэж үгүй болно. Эс бөгөөс өөр амьтанд идүүлнэ. Хэрвээ танд зорилго байдаг бол, хэрвээ та энэ бүхнээ орхихгүй л бол амжилтад хүрнэ.

Өнгөрснийг бус, ирээдүйгээ авар
Нэгэн цаасны худалдаачин байн байн маш их бороо орж, үер буудаг нутагт арилжаа наймаа эрхэлдэг байжээ. Цаас бол жин ихтэй бараа. Дээд давхраас доош нь зөөх амаргүй тул бараагаа бүгдийг нь нэг давхартаа агуулдаг байжээ.
Бороо орох бүрийд дэлгүүрийн эзэн гадуураа урсч байгаа их усыг харан, "хэзээ л энэ их ус дэлгүүрт минь урсч орж ирээд хамаг цаасыг минь норгох бол" хэмээн түгшинэ. Нэгэн өдөр өнөөх хотод урьд өмнө нь орж байгаагүй ширүүн бороо орж, голын ус үерлэн, агшин зуурын дотор л дэлгүүрийн үүдний өмнүүр бяцхан горхи болон урсч эхлэх нь тэр. Дэлгүүрийн бараанууд шөлөн доторхи мах, ногоо адил хөвж эхлэв. Үерийн ус үүдээр нэмэн орж ирэхийг хэлэх үү, хэн нь ч хэрхэхээ мэдэхээ болиход дэлгүүрийн эзэн усан бороон дундуур ажиг ч үгүй гараад алхчихав. Ажилчид нь түүнийг хүмүүс авчирч туслуулах нь дээ гэж бодоцгоосон боловч тэрбээр оройн хэрд ганцаархнаа буцаж иржээ. Дэлгүүрийн цааснууд нороод, бүгд хаягдал болсон тул тэрбээр бүх цаасаа гарган хаяж, тэндээс нүүгээд, нэгэн хуучин байрны нэг давхрыг хөлслөн авч наймаагаа үргэлжлүүлэв.
Гэхдээ энэ удаад түрүүчийнхээсээ гурав дахин их цаас авчираад зарж эхэлжээ.
Хэсэг хугацааны дараа тэр хотод түрүүчийнхээс илүү аймшигт үер буув. Олон хүн байшингийнхаа дээвэр дээр авиран гарч, улаанаараа эргэлдэн урсах үерээс амиа хоохойлж байлаа. Дэлгүүрийн эзэн ч мөн үүдэндээ зогсон гудамжнаа урсах үерийн усыг харж байсан хэдий ч дэлгүүрт нь харин юу ч тохиолдсонгүй. Тэр энэ удаад асар богино хугацаанд их ашиг олжээ. Учир нь бараг бүх цаасны дэлгүүрүүд усанд автсан тул албан газрууд, зохиолчид, хэнд цаас хэрэгтэй билээ, тэр бүхэн мөнгөө барин дэлгүүрийг нь сурагласаар ирнэ.
Нэг хүн түүнээс "Энэ өндөрлөг газрыг урьд нь яагаад анзаардаггүй байсан юм бол оо? Та харин яаж анзаарч олж харав?" гэхэд тэрбээр инээмсэглэн "Түрүүчийн үерт дэлгүүрээ усанд автуулчихаад, энэ бүхнийг яаж буцаахаа мэдэхгүй байлаа. Тэгээд би дэлгүүрээ аврах гэж тэвдэлгүй, хотоор баахан явж, усанд авталгүй үлдсэн газрыг хайсан юм. Тэгж явахдаа л энэ газрыг олсон доо. Энэ л "Өнгөрснийг аварч хэрхэвч чадахгүй, харин ирээдүйгээ авар" гэсэн үг гэдгийг ойлгуулсан даа" гэж ээ.
/Ням гариг/