Эрчүүд шинэхэн танилцсан бүсгүйгээ гол төлөв болзоонд урьдаг. Та урилгыг талархан авахаасаа өмнө бодох зүйл их бий.

Бүсгүй та анхны болзоонд очихдоо цаадах хархүүдээ доорх асуултуудыг тавиад үззхэд гэмгүй. Энэхүү туршилт нь түүнтэй уулзахаар дахин болзоонд очих эсэхээ шийдэхэд танд тус болно. Яагаад гэвэл ихэнх эрчүүд хүүхнүүдэд таалагдахын тулд хиймэл баг зүүдэг. Иймд та анхны болзоонд очихдоо л түүний багийг нь хуулах хэрэгтэй.

1.Түүний хүсэл мөрөөдлийг сонс.
Таныг болзоонд урьсан ханхүү хий хоосон мөрөөдөөд байна уу, эсвэл түүний яриад байгаа зүйл бодит амьдрал болохоор юм уу гэдгийг тандаж мэд. Харин юу мөрөөддөгөө хэлж чадахгүй байгаа бол цаадах чинь гутранги үзэлтэй байж болзошгүй.

2. Найз нөхдийнх нь тухай асуу.
Хүнийг найз нөхдөөр нь шинж гэсэн мэргэн үг байдаг. Хэрэв тэр “Тийм найзтайгаа тэгж ч баярлаад, ийм найзтайгаа ингэж ч ууж идээд” гэх зэргээр яриад байвал түүнээс болгоомжлоорой. Яагаад гэвэл гэр бүл болсны дараа ч түүний адал явдал дуусахгүй байж мэднэ. Харин найз нөхдийнхөө талаар ярихаас цааргалвал зожиг зантай нэгэн байж магадгүй. Эсвэл огт найз нөхөдгүй байж ч мэднэ.

3. Спортын тухай ярилц.
Хэрэв болзоонд урьсан хархүү тань усанд сэлэлт юм уу, гүйлтийн спортыг илүүд үздэг бол өөртөө итгэлтэй, хэтэрхий бие даасан нэгэн байж болох юм. Хэрэв спорт огт сонирхдоггүй бол сэтгэлгээ сайтай боловч жижиг сажиг зүйлд анхаарлаа хандуулах дургүй нэгэн байх шүү.

4. Түүний дадал, зуршлыг сонирх.
Спиртийн төрлийн ундаанд дуртай эсэхийг нь сонирх. Эр хүн л болсон хойно элдэв янзын шалтаг тоочиж худал ярьж магадгүй. Заавал олж мэдэх хэрэгтэй. Мөн мөрийтэй тоглоом тоглодог эсэхийг нь танд. Хэрэв цаад хархүү чинь ямар нэгэн мөрийтэй тоглоомонд дуртай, ялж дийлэхийг шимтдэг, шуналтай бол санасандаа хүрдэг зантай байж болох талтай. Гэвч ийм эрчүүд хамтын амьдралаа орвонгоор нь эргүүлээд хаяхаас сийхгүй аминч, өөдгүй эр байхыг анхаараарай.