Баянзүрх дүүргийн XIX хороо “Газарчин" дээд сургуулийн ойролцоо төв зам хүүхдийн зулай шиг нимгэрч зорчигчид удаан хугацааны турш бухимдалтай явдаг байсан. Иймд өнгөрсөн сард улсын төсөвөөс хөрөнгө мөнгө гаргуулан урсгал засварыг "СэСа" ХХК гүйцэтгэсэн байна. Засварын ажил улсын баяр наадмын өмнө дууссан аж. Гэтэл өчигдөр 08.00 цагаас эхлэн тус компани засвар хийсэн замаа дахин хуулж эхэлжээ. Ямар шалтгаанаас хуулж байгаа талаар тус компанийн ажилчдаас тодруулахад "Баяр наадмын үеэр орсон борооноос болж замын нөхөөс хийсэн газруудад ан цав үүссэн. Мөн торлог хагарал гарсан үүнээс үүдэн дахин хуулж байна" гэлээ. Тэд үүнээс өөр мэдээлэл өгөхийг хүсээгүй юм.

Түүнчлэн ямар шалтгаанаас болж нэг ажлыг дахин хөрөнгө мөнгө гарган засах болсон талаар Нийслэлийн мэргэжлийн хяналтын газар, Авто зам хяналтын газрын мэргэжилтнүүдээс лавлахад энэ талаар мэдэх хүн байсангүй. Уг нь хууль журмын дагуу ажлын явцыг дээрх хоёр газар шалгаж үзэх ёстой.

Гэтэл одоог хүртэл уг замын урсгал засварын ажил ямаршуухан явагдаж байгаа, чанарын шаардлага хангаж байгаа эсэхийг хянаж, шалгалт хийгээгүй байгаа нь гайхалтай. Хэрэв нийслэл хотод хэдэн өдрийн турш зүсэрсэн бороо ороогүй байсан бол гүйцэтгэгч компани чанарын шаардлага хангаагүй халтуурдсан замаа улсын комисст хээв нэг хүлээлгэж өгөх байсан биз . Нэгэнт хүлээгээд авчихсан болохоор ганц хоёр сардаа хагарч, цоорохгүй бол нүдээ аниад чихээ бөглөөд хяналтын газрууд орхичих байж л дээ. Өнгөрсөн жил гэхэд нийслэлийн авто замыг 45 тэрбум төгрөгөөр зассан гэх баримт бий. Гэхдээ засвар хийсэн замууд энэ жил дахиад л засвар хийх хэмжээнд хүрчихсэн байгаа. Хөрөнгө гарган зассан замаар одоо жолоочид уур бухимдлаа барьж ядан онгорхой цоорхойг нь сүлжин аваар осол гарган явж байна.

Энэ жил нэг тэрбум 750 сая, Нийслэлийн замын сангаас 350 сая төгрөг төсөвлөөд байгаа юм. Тухайлбал, зам засвар, гэрлэн дохио, тэмдэг, тэмдэглэгээ, төв замын засварт 1.5 тэрбум, хорооллын засварын ажилд 500 сая, замын арчилгаа хамгаалалтанд 200 сая төгрөг зарцуулах гэнэ. Ард түмний халааснаас гарч буй энэ мөнгө дахиад л салхинд хийсч хэн нэгэн эрх мэдэлтний халаасанд орно. Учир нь зам засварын ажил хийж буй компаниуд чанар биш ашиг олохыг бодон хэдэн талаас нь танаж, түүнийг нь шалгах ёстой хяналтын газрууд ажлаа хийхгүй байгаа нь тэдэнд зам засварын компаниуд засварын ажлаас танаж олсон мөнгөө хуваалцаад байдаг юм биш байгаа гэсэн хардлага иргэдийн дунд бий. Ингэж бодох болсон шалтгаан олон зүйлтэйгээ холбон тайлбарлаж болох юм. Өөрөөр хэлбэл өнгөрсөн жил хийсэн Чингэлтэй дүүргийн 17-18 дугаар хорооны замын урсгал засварын ажил муу хийгдсэн. Уг зам нь бороо орсны дараа цөмөрч хуучин хэвэндээ орсон гэдгийг жолооч нар баталж байсан юм.

Нөгөөтэйгүүр хяналтын байцаагчид ажлаа сайн мэддэг байлтай. Засварын ажлыг халтуурдаж байгааг шалгаж үзээд улсын комисст хүлээлгэн өгөхгүй байх эрх мэдэл тэдэнд бий. Гэтэл юунаас болоод урсгал засвар нэрийн дор халтуурдаж байгаа зам засварын компаниудын зассан замыг хүлээж аваад байна вэ. Мөн тэдний ажлын явцыг яагаад шалгахгүй байгаа нь өөрийн эрхгүй гайхал төрүүлэх аж. Одоогоор урсгал засварын ажил 98 хувьтай явагдаж байна. Их засварын ажил ирэх сараас эхэлж 10 сард дуусах юм.