Хөвсгөл аймагт энэ сарын  3-6-нд болсон мөсний баярт оролцоод ирлээ. Биднийг очиход Далай ээж өвлийн гоёлоо гайхуулж угтав. Үзэсгэлэнт мөсөн талстуудыг гүндээ агуулан гялтагнах нь хосгүй үнэт эрдэнэсийг ч дагуулахааргүй тансаг харагдана. Болор тунгалаг шил мэт гялалзаж, ёроолын чулуу нь шүр мэт харагдах мөсөн дээгүүр явахад ямар нэгэн эрдэнэс дээр гишгэн явах шиг болж, өөрийн эрхгүй хайрлах сэтгэл төрнө.

Доод модот булан гэдэг газар толь шиг тунгалаг мөсөн дээр баяр эхлэв. Ерөнхийлөгч Н.Энхбаяр, Тэргүүн хатагтай О.Цолмон, 12 настай охин Э.Ринченмядагийнхаа хамт мөсний баярт оролцсон юм.
Хөвсгөл аймгийн Засаг дарга  Л.Цэрэнжав, аймгийн ИТХ-ын дарга Б.Пүрэвээ нар Мөсний баярын үйл ажиллагааг нээсний дараа Ерөнхийлөгч Н.Энхбаяр, нутгийн унаган охин, тэргүүн хатагтай О.Цолмон нар Хаан их Хорьдол сарьдаг, Хатан далай ээжид хүндэтгэл үзүүлэн мэхийн ёслов. Дуу бүжиг, морин чарганы уралдаанаар үргэлжилсэн баярт нутгийн иргэд  сум сумдаас зорин ирж оролцдог билээ. 

Мөсөн дээр уралдах морьдын тахны дуу, худраганд зүүсэн хонхны жингэнээн чарганы  чимээтэй хослон, зүйрлэх аргагүй өвөрмөц ая дан үүсгэж, морьдын тахнаас мөс үсчин, цагаан манан манаран сэтгэл хөдөлгөж, хийморь сэргээсэн сайхан  уралдаан болов.

Аргагүй л устай, мөстэй газрын үр удам болохоо харуулж, нутгийнхаа нэрийг дуурсган тив дэлхийд өрсөлддөг тэшүүрчин хүүхдүүд толь шиг мөсийг эсгэн  уралдаж бас нэгэн гайхамшгийг үзүүллээ.

Далай ээж заримдаа тэсрэлт дэлбэрэлт мэт чанга дуу гарган, мөсөн бүрхүүл тасарч задарч, шахагдаж овоорох нь сүрдмээр. Үүнийг “хил гарлаа” гэж нэрлэдэг байна. Харин хоёр тийш нүүж, онгорхой үлдэн ус мэлтэгнэн долгионтох үзэгдлийг хар хил гэдэг бөгөөд ойртоход осолтой болохыг сануулж байлаа. 
Ийнхүү арав дахь жилдээ уламжлал болон зохиогдож буй “Мөсний их баяр” сайхан болж өндөрлөлөө.