Ням гаригт Индонезийн газрын диспетчерийн алба Индонезийн Сурабай хотоос Сингапур руу нислэг үйлдэж явсан, агаарын тээврийн “AirAsia” компанийн Airbus A320-200 нисэх онгоцтой холбоо тасарсан билээ.Онгоц газраас хөөрсний дараа 42 минутын дараа Яванскийн тэнгис дээгүүр буюу Борнео арлын орчимд нисч яваад радараас алга болсон аж.

“AirAsia” компанийн мэдээлснээр, онгоцонд 155 зорчигч, багийн долоон гишүүн явсан байна. Онгоцонд явсан хүмүүсийн ихэнх нь индонезийн иргэд байгаа бол өмнөд солонгосын гурав, франц, малайз, сингапурын тус бүр нэг иргэн байжээ. 

Өчигдөр орой харанхуй болсны улмаас эрлийн ажиллагааг зогсоосон бөгөөд өнөө өглөөнөөс үргэлжлүүлэн хайж байгаа аж.  Эрлийн ажиллагаанд Индонезтэй хил залгаа орнууд тусалж байгаа бөгөөд Малайз улс гурван нисэх онгоц, Сингапураас хоёр хөлөг онгоц, С-130 маркийн нэг онгоцыг тус тус илгээсэн байна. Мөн Австрали, АНУ, Канад,Их Британи, Өмнөд Солонгос, Энэтхэг  улсууд туслахад бэлэн байгаагаа илэрхийлээд байгаа юм.

Д.Мигаа