Өмнөд Солонгос улс 2025 он гэхэд өөрийн оронд бүтээсэн байлдааны нисэх онгоцтой болно хэмээн мэдэгдэж байсан юм.
Улмаар нисэх онгоц бүтээхэд зайлшгүй шаардлагатай 25-н төрлийн үйлдвэрлэлийн технологийг АНУ-ын нисэх онгоц үйлдвэрлэлийн "Lockheed Martin" компаниас авах болсон ба хариуд нь тэдний шаардлагын дагуу, тус компанид үйлдвэрлэсэн тус бүр нь 120-н тэрбум воны үнэтэй байлдааны бага оврын нисэх онгоцноос 40-н ширхэгийг худалдан авахаар болсон байна.
Гэвч өнөөдөр Солонгос улсын Батлан Хамгаалах яамны харъяа, Байлдааны техник үйлдвэрлэл, судалгааны газраас "Америкийн "Lockheed Martin" компани нь худалдан авалтын хариуд өгөх ёстой онгоц үйлдвэрлэх 25-н технологийн 21-ийг нь өгөх боловч үлдсэн голлох дөрвөн технологийг өгөхөөс татгалзлаа. АНУ нь эдүгээ аль ч улсад дээрх дөрвөн технологийг өгөөгүй байгаа ба бид түүнийг өөрсдөө бүтээх боломжтой " хэмээн мэдээлэлжээ.
Гэхдээ Солонгос улсын Байлдааны техник үйлдвэрлэл, судалгааны газар Америкаас нисэх онгоц худалдан авах гэрээг хийх үед "Lockheed Martin" компани дээрх дөрвөн технологийг Солонгосын талд өгөхгүй байх боломжтой гэдгийг мэдэж байсан ч энэ талаар Засгийн газартаа тодорхой тайлбарлаагүй байна.
Тиймээс Солонгос улсын Засгийн газар өнөөдөр Батлан Хамгаалах яамны харъяа, Байлдааны техник үйлдвэрлэл, судалгааны газрын үйл ажиллагаанд шалгалт хийх шийдвэр гаргаж, Чусокийн амралтын өдрүүдээр ч амралгүй ажиллахаар болсон байна.
