Би арван жил,их дээд сургуулиа төгсөж албан байгууллагийн хаалга татаж ажиллаж эхэлсэн цагаасаа л эхнэр болох бүсгүйн эрэлд гарсан хүн.
Арван жил,их сургуульд мэдээж найз охин энэ тэр гээд явж байсан байх тэгээд одоо ганцаараа явж байхыг бодоход санаанд таарсан бүсгүйтэй учраагүй юмуу эсвэл царай муутай болохоор намайг тоогоогүй байх.
Ер нь сүүлийнх нь үнэний ортой байх вий тэрнээс миний хүн голох гэж юу байхав.
Гадаа гудамжинд нь нийтийн унаанд суусан ч,олон нийтийн газар очсон ч юм хумаа хаяж гээсэн хүн шиг л явна ухаандаа эхнэр болчих дажгүй бүсгүй хайж байгаа нь тэр юм шүү дээ.
Нэг удаа нэг гайгүй бүсгүй харж байгаад барьж явсан зүйлээ унагачихаар нь аваад өгсөн чинь баярлалаа гэхээр нь давраад жаахан яриа өдтөл хаанаас ч юм найз залуу нь гэх нэг шкаф шиг нөхөр гарч ирээд хардаад энэ хэн бэ гэнгүүтээ гар хүрсэн биш би гэдэг хүн золтой л эрлэгийн хаалга татсангүй.
Ажлаа тараад нийтийн унаанд чихэлдэн зүтгэн байж ороод арайхийж нэг газар олоод зогсоод тэнд байгаа бүсгүйчүүдийг харж нүдээрээ олзлон надад таарч тохирох бүсгүйг харж байгаад нэг хар нүдэн урт задгай үсээ сул тавьсан бүсгүйг хараад нүд сэтгэл минь хөөрхий тийшээ бэлчиж эхэллээ дээ.
Ойртож очиж зогсох боломж хайн хүмүүстэй боломжоороо зөрж явсаар бараг тэр бүсгүйн хажууд шахам очиж зогсоод харцаа салгасангүй.
Бурхан минь үнэхээр миний харж хайдаг бүсгүй болсон жимс шиг уруултай,мойл хар нүдтэй мөнөөсөө мөн.
Хэдэн буудал газар түүнийг гөлөрч явтал хажууд нь зогсож байсан найз нь бололтой нэг бүсгүй тэр нэг өрвийсөн үстэй хачин юм чам руу амаа ангайгаад гөлрөөд байна гэж шивнэх нь надад сонсогдоод тэр бүсгүй над руу харахад санаа зовж баригдсандаа чих минь хүртэл улайгаад нийтийн унааны толинд өөрийгөө хартал зүүсэн зангиа нь хазайсан өнгөө алдсан пижактай өрвийсөн үстэй нөхөр зогсож байгаа нь харагдахад бантсандаа дэмий урд хаалга руу зүтгэхэд араас тэр бүсгүйн тачигнатал инээх дуулдаж билээ.
Зүтгэсээр урд ирээд муу ч гэсэн гар утсаа гаргаж ярих гэсэн чинь муу утсыг минь аль хэдийн урт гартай нөхдүүд тууж одсон байв. 
Уг нь мөнгөө цуглуулж цуглуулж хоол унааны мөнгөнөөсөө хасан байж авсан утас байсан юмсан гэж бодоод санаа алдсаар гэрийнхээ автобусны буудал дээр буусандаа.
Одоо хүртэл эхнэр болчих сайхан бүсгүйг эрж хайж гутлын тавхайгаа эргэж салж унатал гудамжаар алхаж,нийтийн унаанд чихэлдэн сууж муу цүнхээ урдаа тэврээд хулгайчид юмаа алдахгүйн тулд дажгүй бүсгүй байвал ширтэж гөлөрсөөр нэг юм гэр байдаг автобусныхаа буудал дээр буугад гэрийнхээ зүг сүүдрээрээ хань хийгээд гэлдэрч өгнө.
Тийм сэтгэлд нийцсэн бүсгүй олохгүй тааралдахгүй болохоороо за за бурхан багш чамд заяаны хань болох бүсгүйг чинь бэлдсэн байгаа гэж өөрийгө тайтгаруулаад улигт ажлаа хийж эхэлнэ дээ.
Хэн мэдэхэв заяаны хань зам дээр гэдэг маргааш нэг сайхан сайхан бүсгүйтэй тааралдаад танилцчих юм билүү.

Х.Оюунболд