Түндэмүн “Монгол хотхон” болно

Сөүлийн “Sole Village” хотхон нь 1985 онд Францын “Ecole Francaise de Seoul” сургууль байгуулагдсанаас хойш францчууд ихээр амьдардаг болж, “Франц тосгон” гэж нэрлэгддэг болсон газар юм. Энд франц хоол, кафе, дэлгүүр ихтэй, байшин барилга нь ч Франц стилийн нэгэн ёсны жижиг Парис юм. Сөүл хотын захиргаанаас “Sole Village”-тай хамт Хятадын ЭСЯ-ны гудамж, Түндэмүн дүүргийн Төв Азийн өргөн чөлөө зэрэг гадаад, дотоодын жуулчид ихээр зочилдог газруудаа “Сөүл доторх дэлхийн аялал жуулчлалын бүс” болгохоор шийдвэрлэсэн байна. Ингэснээр гадаад дотоодын жуулчдыг татан, орон нутагт хөрөнгө мөнгө оруулах зорилготой байгаа юм. Сөүлд ирээд зөвхөн Солонгос биш дэлхийн олон орны соёл, урлаг, хоол хүнстэй танилцаж чадна шүү гэж тэд жуулчдыг урихаар төлөвлөж байна. “Sole Village”-ийг тэр чигээр нь Франц хотхон болгон хөгжүүлэх бол Түндэмүн дүүргийн Төв Азийн өргөн чөлөөг Монгол, Казахстан хотхон болгон өөрчлөх аж. Дундад Ази, Зүүн Өмнөд Азийн лалын шашинтан 100000 гаруй хүн оршин суудаг Itaewon дүүргийг Лалын шашинтны хотхон болгохоор болжээ. 

Сөүл хотын захиргаанаас тухайн улсуудын ЭСЯ, олон нийтийн байгууллагуудад хандаж, өөр өөрийн улсын хотхоны түүх, соёл, үзвэр соёлын газрын танилцуулга, сурталчилгааг хийж өгөхийг хүсэх гэнэ.