АНУ-д нэгэн эхнэр нөхөр хоёр таван настай охиныхоо аминд хүрсэн ноцтой хэрэг гарчээ.

Хэрэг үйлдсэн байдал тун харгис бөгөөд энэрэлгүй.

Тэд хийжүүлсэн ундаа хэлэлгүй авч уусан таван настай охиноо шийтгэхээр болжээ.

Шийтгэл нь охинд хийжүүлсэн ундааг үхлийн “тунгаар” уулгах байв.

Ийнхүү Теннеси мужийн нэгэн шүүхээс охины эцэг Рэндал Вон болон хойт эх Мэри нарт хүүхэдтэй зүй бусаар харьцаж, эцэг эхийн үүрэг хариуцлагаа биелүүлээгүй хэмээн буруутгаж тус бүр 500 мянган долларын барьцаатайгаар батлан даалтанд гарах боломжтойгоор цагдан хориод байгаа аж.

Эцэг, хойт эх хоёр нь хөөрхий охины бие организм дахь натрийн хэмжээ эрс буурахад хүргэх тийм хэмжээний хийжүүлсэн ундааг хүчээр уулгасан байжээ. Үүний улмаас тархинд нь цус харваж, охин өөд болсон байна.
Мөрдлөгийн явцад тодруулснаар бяцхан охин хоёр цаг хүрэхгүй хугацаанд хоёр литр гаруй чихэрлэг, хийжүүлсэн ундаа уусан байна.

Түүнчлэн ийм их хэмжээний шингэн зүйл уусны дараа эцэг эх нь хэдэн цагийн турш түүнд анхаарлаа хандуулаагүй тул амь насанд аюултай шинж илрэхийг анзаараагүй аж.
Охин өвдснөөсөө болж орилж, дараа нь хамаг бие нь татвалзан ухаан алдсан байна.

Чухам тэгэхэд нь л эцэг эх нь эмнэлэгт хүргэж, эмч нар тэндээсээ нисдэг тэргээр хүүхдийн эмнэлэгт хүргэсэн аж.
Гэвч охины амь насыг аварч чадсангүй. Тэр эмнэлэгт хүргэгдсэнээс хойш 1 өдрийн дараа өөд болжээ.

Энэ хэрэг  2012 онд гарсан бөгөөд мөрдлөг, шүүх хурал хоёр жилийн турш үргэлжилсэн аж. “Энэ хүмүүс хүүхэдтэй зүй бус харгис харьцсанаар үхэлд хүргэсэн. Тэдэнд энэ хүүхдийг хөнөөх далд санаа байсан эсэхийг мэдэхгүй. Гэхдээ ямар нэгэн хэмжээгээр хохироож гэмтээхээр шийдсэн нь илт. Одоогоор тэдэнд цаазын ял төлөвлөх эсэхийг хэлж мэдэхгүй. 41 настай Вон болон түүний эхнэр 58 настай Мэри нар талийгаач охиноос гадна таван хүүхэдтэй. Тэднийг нь айлуудад өргүүлсэн” хэмээн прокурор Беркли Белл ярьж байна.