Хайртыгаа гадаадад байх хооронд амжуулах 5 гол
Чамайг энэ л чигээр чинь төгс хайрладаг хайртыгаа гадаадад байх хугацаанд хийж амжуулах 5 гол зүйлийг нэрлэж байна. Ялангуяа түүнийг удаан хугацаагаар явсан тохиолдолд заавал хэрэгжих ёстой юм шүү. Хүлээх хугацаа, өдөр хоногууд харвасан сум шиг л хурдан өнгөрнө гээд бод доо?
1. Эрүүл биетэй болох
Биеэсээ илүүдэл өөхөө “хөөх” ёстой хугацаа бол яг одоо. Фитнесст явж чанга, чийрэг биетэй болохыг хүсдэг бол бүртгүүлэх чинь ч гэсэн одооноос байх хэрэгтэй. Өөрөөр хэлбэл хайрттайгаа уулзахдаа нүүр бардам гайхуулах биеэ өнөөдрөөс эхлэн галбиржуулах хэрэгтэй гэсэн үг. Өөрчлөлт чинь чамд ч, түүнд ч таалагдана.
2. Чадвараа хөгжүүлэх
Уран зураг, шинэ хэл, сэлэлт, хүний нөөцийн сургалт гээд өөрийгөө хөгжүүлэх бүх төрлийн зүйлс энд хамаарагдана. Хоол хийх чадвараа сайжруулсан ч болно шүү дээ. Түүнтэй өдөр бүр уулзахгүй учир цаг, зав, мөнгө гурав чамд хангалттай бий. Ашигтай “үр”.
3. Улам үзэсгэлэнтэй болох
Арьсаа улам торгомсог, зөөлөн, эрүүл болтол нь арчлаарай. Үс, хумсаа ч гэсэн бат бөх болгон бэхжүүл. Шүдээ паалангаар өнгөлж, цайруулахыг хүсдэг бол зориглон эмнэлэг рүү алх. Өөрийгөө дотроосоо ч, гаднаасаа ч үзэсгэлэнтэй болгох нь хайрттайгаа уулзах хүртэл заавал хийх ёстой, гол зүйлсийн нэг юм шүү.
4. Түүнээр бахархуулах гавьяа бүтээх
Гавьяа чинь юу ч байж болно. Мөрөөдлөө биелүүлэх, муу зуршлаа хаях, өөрөө өөртөө цаг гаргадаг болох, ажил дээрээ эсвэл гэртээ амжилт “гаргах”, амлалтандаа хүрэх, олон жилийн турш ярьсан зүйлээ бүтээх, бүр дуртай зүйлээ олох гээд санаанд чинь оромгүй жижигхэн зүйл ч түүний бахархан дурсах шалтгаан болж болно. Яагаад гэвэл тэр чамд чин сэтгэлээсээ хайртай шүү дээ.
5. Мэдлэгээ дээшлүүлэх
Олон ном унших, алтан үеийн кинонуудын талаар судлах, Хайку шүлэг бичих, хэрэглээний боловсролоо гүнзгийрүүлэх гээд заавал шинжлэх ухаантай холбоотой байх албагүйгээр мэдлэгээ дээшлүүлэх өч төчнөөн талбар байна. Аль нь гэдгийг сонгоод хайртыгаа мэдлэгийн түвшингээрээ алмайруулахдаа бэлдэж эхлээрэй.
Түүнд ч гэсэн гадаадад байхдаа өөрийнхөө “чанар”-ыг улам сайжруулахыг зөвлөөрэй. Чи алийг нь хамгийн түрүүнд хэрэгжүүлэх гэж байна?
