Монгол Улсын Ерөнхийлөгч Ц.Элбэгдоржийн урилгаар ардчиллын нэрт онолчид манайд ирэх гэж байна. Тэд Төрийн ордны их танхимд “Дэлхийн санхүүгийн хямралын дараах хөгжлийн загварууд”, “Ардчиллын чанар чансаа, түүний оршихуйн увидас” зэрэг сэдвээр энэ сарын 13-нд лекц уншина.

Уг арга хэмжээнд иргэд, эрдэмтэд, Төрийн алба хаагчид, улстөрчид, бизнес эрхлэгчид гээд 1000 хүнийг урихаар төлөвлөөд буй гэнэ.

АНУ-ын Стэнфордын их сургуулийн харьяа “The Freeman Spogli” олон улс судлалын хүрээлэнгийн нэрт профессорууд өөрсдийн онол, үзэл бодлоо хуваалцах аж. Тухайлбал, дэлхийд алдартай улс төр судлаач, философич Фрэнсис Фукуяама, ардчиллаар дагнан олон арван жилийн турш судалгаа шинжилгээний ажил хийсэн олон улсын тэргүүлэх зэрэгтэй эрдэмтэн Ларри Даймонд, улс төр судлалын салбарт улс орны бүрэн эрх, хараат бус байдлын сэдвээр гүнзгийрүүлсэн судалгаа шинжилгээний ажил хийснээрээ алдартай Стивен Краснер нарын эрдэмтэд лекц унших юм.