Өнөөдөр нийслэл хотноо Төрийн ордны их танхимд нээлтээ хийж буй МАХН-ын ХХVI их хуралтай холбогдуулж тус намын удирдах хүмүүс өчигдөр сэтгүүлчдэд мэдээлэл хийлээ. Энд С.Батболд, У.Хүрэлсүх, Д.Лүндээжанцан, Ц.Сүхбаатар, М.Энхболд, Т.Ганди, У.Барсболд нар ирсэн юм.

Их хуралд МАХН-ын 150 мянган гишүүнийг 801 хүн төлөөлөх бөгөөд эдний 58.4 хувь нь анх удаа сонгогдсон байна. Төлөөлөгчдийн 22.2 хувь нь эмэгтэй, 20.8 хувь нь 35 хүртэлх насны залуус байгаа аж. 801 төлөөлөгчийн 517 нь орон нутгаас ирэх гэнэ. Их хурлаар Монгол Улс ардчилал, зах зээлд шилжсэнээс хойших 20 жилийн алдаа оноонд үнэлэлт дүгнэлт өгч, ирэх 20 жилийн бодлого, зорилтыг тодорхойлох юм байна.

2007 онд хуралдсан XXV их хурлын шийдвэрийн хэрэгжилт, намын нэр, үзэл баримтлалын талаар хэлэлцэхээр төлөвлөжээ. Хэлэлцэх асуудлыг ийн тогтохын өмнө иргэд, гишүүд, дэмжигчид, эрдэмтэн, судлаачдын саналыг янз бүрийн арга хэлбэрээр, тухайлбал эрдэм шинжилгээний болон онол практикийн бага хурал хийх, олон түмэнтэй биечлэн уулзах, тодорхой сэдвээр хэлэлцүүлэг явуулах зэргээр хүмүүсийн санаа бодлыг өргөн хүрээнд авчээ.

Эцэст нь намын бүрэн эрхэд хамаарах бусад асуудлаар ярилцах бөгөөд үүнд зохион байгуулалтын асуудал ч орж болзошгүй гэж МАХН-ын дарга, Монгол Улсын Ерөнхий сайд С.Батболд мэдээллийнхээ төгсгөлд хэлэв. Түүний ярьснаас үзвэл МАХН 23 дугаар их хурлаас бусад их хурлаараа дүрэм, үзэл баримтлалдаа тодотгол засвар хийж байжээ.

Тус нам уугуул нэрээ сэргээх, үзэл баримтлалдаа тодотгол хийхтэй нь холбоотой зарим зүйлийг сэтгүүлчид нэ лээд сонирхов. Тэдгээрт дээрх хүмүүсийн өгсөн хариултаас үзвэл уугуул нэрээ сэргээнэ, үзэл баримтлалдаа засвар хийнэ гэдэг нь нам өөрчлөн байгуулагдаж буй хэрэг биш тул энэ бүхнийг хийхэд ямар нэг хууль эрх зүйн зөрчил байхгүй юм байна. Үзэл баримтлалаа өөрчлөх гээгүй, тодотгол хийж, илүү тодорхой болгох, тэгэхдээ зүүн төвийн нам байх зарчмаа хадгалж үлдэх аж.

Социнтернийн гишүүн байхад нь ч XXVI их хурлын нь тавьж буй зорилго харшлахгүй гэж үзэж буй юм байна. Үзэл баримтлалдаа тодотгол хийлээ ч олон түмэндээ халамж үзүүлэх чиг шугамаасаа хазайхгүй гэнэ. 2008 оны сонгуулийн дараа хамтарч ажиллахаар АН-тай байгуулсан гэрээнд ч өөрчлөлт оруулах шаардлагагүй аж. Одоо УДШ-д бүртгэлтэй, үйл ажиллагаа явуулж байгаа 17 намын дотор МАН гэсэн нэртэй улс төрийн хүчин байхгүй учраас уугуул нэрээ сэргээхэд ямар нэг асуудал байхгүй юм байна.

Дэлхий дахины хэмжээнд авч үзвэл намууд хатуу гишүүнчлэлээс татгалзаж байхад МАХН шинэ шинэ хүмүүсийг эгнээндээ оруулаад байгаагийн учрыг лавлахад “Улс төрийн намын тухай хуульд гишүүнтэй байхаар заасан. Тэгээд ч манай орны хувьд намууд нь гишүүнчлэлээс татгалзах цаг хараахан болоогүй болов уу” гэж хариуллаа. МАХН XXVI их хурал бямба гаригт өндөрлөх юм.

www.mongolnews.mn - Эх нутгийн чимээ