“Монголын гол нууруудын
нэгдсэн хөдөлгөөн”-өөс өчигдөр сэтгүүлчдэд мэдээлэл хийж, Монгол Улсын
Засгийн газрыг Сүхбаатар дүүргийн шүүхэд өгөх болсноо мэдэгдлээ. Төрийн
хуулийг хэрэгжүүлэх үндсэн үүрэгтэй Засгийн газар хуулиар хүлээсэн
үүргээ биелүүлж ажиллахгүй байгаагаас болж байгаль орчны тэнцвэрт байдал
алдагдаж, сүйрлийн хэмжээнд хүрсэн.
Байгаль орчин сүйдсэнээс үүдэн, ард иргэдийн амгалан тайван амьдрах нөхцөл алдагдаж, хууль ёсны эрх нь хамгийн их зөрчигдсөөр байгааг онцлов. Энэ нь дараах баримтуудаар нотлогдож байгаа гэнэ. Тухайлбал, уул уурхайн зохисгүй үйл ажиллагаанаас болж Монгол орны томоохон голууд болох Улз, Онги зэрэг гол ширгэж Завхан, Туул, Ерөө гол бохирдон, хүн мал ундаалах аргагүй болсныг ярилаа.
Тэд шүүхэд гаргасан албан бичигтээ Онги, Завхан, Туул, Хангилцаг, Хүдэр, Улз, Ерөө, Гацууртын голын сав газарт учирсан байгаль орчны хохирлын үнэлгээг хоёр сарын дотор тооцож, олон нийтэд зарлахыг Засгийн газарт даалгах, эдгээр голын сав газарт учирсан байгаль орчны хохирлыг Засгийн газраар төлүүлэхийг дурдсан байна. Мөн Монгол Улсын иргэдэд хуулиар олгосон эрхийг нь эдлүүлэх үүргийг Үндсэн хуулиар төр хүлээсэн ч энэ үүргээ биелүүлэхгүй байгаагаас болж хүний эрх зөрчигдөхийн зэрэгцээ байгаль орчинд учирч буй хор хөнөөл хэмжээлшгүй болсныг дурдав.
