Жирэмсний үед хоол хүнсэндээ онцгой анхаарал тавих шаардлагатай болдог. Учир нь аливаа эрдэс бодисын дутагдалд орох эсвэл хэтрүүлэн хэрэглэх нь эхийн эрүүл мэндэд төдийгүй урагт сөрөг нөлөө үзүүлж болзошгүй. Иймд тухайн эрдэс бодисын талаар тодорхой мэдэгдэхүүнтэй байх хэрэгтэй юм. 

Натри хлор буюу чанасан давс 

Ашиг тустай чанар: Натри хлор нь цусны найрлагыг хэвийн байлгахын зэрэгцээ, бодисын солилцоог сайжруулж, цус болон эд эсийн доторх шингэний хэмжээ болон даралтыг тогтворжуулан, хоолны дуршлыг нэмэгдүүлж, ходоодонд давсны хүчил үүсэхэд оролцон, шээс ялгаруулалтыг сайжруулахын зэрэгцээ шүлс, ходоодны шүүсны ферментийн ялгаруулалтыг идэвхижүүлдэг.

Шаардлагатай хэмжээ: Нарийн тогтоосон хэмжээ байхгүй. 

Хэтрүүлэн хэрэглэсэн тохиолдолд: Хоол хүнсэндээ давс хэтрүүлэн хэрэглэсэн тохиолдолд хавагнуулах сөрөг нөлөөтэй. 

Кали

Ашиг тустай чанар: Кали нь бодисын солилцоонд идэвхитэй оролцож, зүрхний булчинг чангаруулж, бөөрний үйл ажиллагааг хэвийн байлгахад тустай.

Шаардагдах хэмжээ: Хоногт 2-3 мг. 

Хэтрүүлэн хэрэглэвэл: Бие болон сэтгэл мэдрэлийг цочроох, арьсыг эмзэг болгох, зүрхний хэмнэл алдагдах зэрэг хам шинжүүд илэрнэ. Хэрвээ бие организмын үйл ажиллагаа хэвийн бол илүүдэл кали шээсээр гадагшилдаг.

Калийн дутагдалд орвол: Булчин суларч, номой гөлгөр болон, артерын даралт сулрахын зэрэгцээ хавагнах шинж тэмдгүүд илэрнэ.

Юунд агуулагдах вэ? Үзэм, хар чавга, мах, загас, үхрийн нүд, вандуй болон шош, хатаасан гүйлсэнд илүүтэй агуулагддаг.

Кальци

Ашиг тустай чанар: Бодисын солилцоо, эд эсийн бүтцэд оролцож,  мэдрэлийн эсийг сэргээхийн зэрэгцээ, шүд болон ясыг бэхжүүлэхэд онцгой үүрэгтэй.

Шаардагдах хэмжээ: Хоногт 1-2 мг ба түүнээс илүү 

Хэтрүүлэн хэрэглэвэл: Дотор муухайрч, ам цанган, турахын зэрэгцээ судсан дахь кальци алдагддаг.

Дутагдалд орвол: Кальцийн дутагдалд орвол ясны бүтэц алдагдан, шөрмөс татах, таталдах шинж тэмдэг илэрдэг. 

Юунд агуулагдах вэ? Сүү, бяслаг / ялангуяа ямааны сүү/, өндөгний шар, хөх тарианы талх, болгар бяслагт /давстай бяслаг/ баялаг агуулагддаг.

Фосфор

Ашиг тустай чанар: Яс, мэдрэл, бусад эд эсийн бүтцэд зайлшгүй шаардлагатайн зэрэгцээ элэг бөөр, тархинд явагдах бодисын солилцоо болон биохимийн үйл явцад идэвхитэй оролцдог.

Шаардагдах хэмжээ: Янз бүрийн нэгдэл хэлбэрээр хоногт 1,6 - 3,2 мг хэмжээтэй хэрэглэхэд хангалттай. 

Ямар ч тохиолдолд хэтрүүлэн хэрэглэхгүй байх хэрэгтэй. 

Фосфорын дутагдалд орвол: Яс, шүд, мэдрэл болон бусад эд эсийн бүтэц болон хэвийн үйл ажиллагаа алдагдахад хүрдэг.

Юунд агуулагдах вэ? Амьтны гаралтай бүтээгдэхүүн, тухайлбал, сүү, бяслаг, аарц, мах, элэг, загас, өндөг болон загасанд элбэг агуулагдана.

Магни

Ашиг тустай чанар: цөс ялгаралтыг тогтворжуулж, гэдэсний гүрвэлзэх хөдөлгөөнийг идэвхижүүлэн, холестериныг биеэс гадагшлуулан, судасны агшилт суналтыг зохицуулдаг.

Шаардагдах хэмжээ: Хоногт 0.4 мг авахад хангалттай 

Хэтрүүлэн хэрэглэвэл: Нойр хүрч нозоорон, зүрхний хэмнэл удааширч, артерын даралт буурна. Кальци ихээр гадагшлах нь сөрөг үр дагавартай.

Дутагдалд орвол: Булчин болон мэдрэл цочирч, уургийн синтез алдагдан, хоолны дуршилгүй болж, шөрмөс татах хам шинжүүд илэрнэ.

100 грамм хүнсний бүтээгдэхүүнд агуулагдах хэмжээ: 

Хөх тарианы талх - 49 мг, улаан буудайн талх - 65 мг, сагадайн будаа - 98 мг , овьёосны нэвс - 116 мг, буурцаг - 103 мг, хуурай вандуй - 107 мг , ногоон вандуй - 38 мг, бөөрөнхий байцаа  - 16 мг , сонгино - 14 мг, үнээний сүү - 14 мг