Энэ сарын долооноос аравны өдрүүдэд Монгол Ардын намын Ерөнхий нарийн бичгийн дарга У.Хүрэлсүх болон УИХ,Засгийн газрын гишүүд БНСУд ажиллаж байна. Эрх баригч намаас санаачлан өрнүүлсэн “Ард түмнээ сонсъё” аяныг энэ удаад ажил амьдралын мөр хөөн Солонгос улсад ажиллаж амьдарч байгаа монгол иргэдийн дунд зохион байгуулж  байгаа бөгөөд  монголчууд олноор ажиллаж амьдардаг Сөүл, Ыжонбу зэрэг дүүргүүдэд иргэдийн уулзалт зохион байгуулжээ.  Төлөөлөгчдийн бүрэлдэхүүнд Монгол Ардын намын Ерөнхий нарийн бичгийн дарга У.Хүрэлсүх, нарийн бичгийн дарга Я.Содбаатар, МАН-ын  Гадаад харилцаа хамтын ажиллагааны хэлтсийн дарга Г.Тэнгэр, УИХ-ын гишүүн Д.Очирбат, Б.БатЭрдэнэ, Э.Мөнх-Очир, Д.Загджав, НХХЯ-ны сайд Т.Ганди, БСШУ-ны сайд Ё.Отгонбаяр, Гандантэгчинлэн хийдийн тэргүүн хамба Д.Чойжамц нар багтсан байна. Солонгос улсад зохион байгуулагдаж байгаа энэ удаагийн аян энэ сарын зургааны өдөр буюу өнгөрсөн бямба гаригт монголчууд олноор ажиллаж амьдардаг Мугпу хотоос эхлэх албан ёсны хөтөлбөртэй байсан ч цаг агаарын тааламжгүй байдлаас шалтгаалан нислэг хойшлож, иргэдтэй хийх албан ёсны уулзалт цуцлагджээ.Олон тооны үйлдвэр ихтэй Мугпу хотод “Ард түмнээ сонсъё” аян зохион байгуулагдах зараар 600 гаруй монгол иргэд цугларсан бөгөөд эхлээд сар гаруй хугацаанд үргэлжилж байгаа иргэний шинэчлэсэн бүртгэлд тус дүүрэгт амьдарч байгаа монголчууд  олноор хамрагдан хаяг байршлаа тодорхойлуулж, албан ёсоор Монгол Улсын иргэний шинэчилсэн бүртгэлд бүртгэгдлээ. Ыжонбу хотод зохион байгуулагдсан иргэдтэй хийх уулзалтын үеэр Монгол иргэд МАН-ын Ерөнхий нарийн бичгийн дарга У.Хүрэлсүх болон УИХ,Засгийн газрын гишүүдийг хадаг  сүү барин монгол заншлаар угтсан бөгөөд хамтдаа зургаа татуулж, ах дүүсийнхээ амар мэндийг сураглан уулзацгаалаа.

МАН-ын Ерөнхий нарийн бичгийн дарга У.Хүрэлсүх иргэдтэй хийх уулзалтыг нээж хэлэхдээ “Төр засгаа харалгүй хүлээлгүй, өөрсдийн хүчээр ажил амьдралаа авч яваа, Монголд амьдарч байгаа аав ээж ах дүү нартаа дэм болон улсынхаа эдийн засагт хувь нэмрээ оруулж байгаа та бүхнээрээ улс орон чинь бахархаж явдаг. Бид өнгөрсөн хорин жилд олон өөрчлөлт хийсэн. Улс төр, эдийн засгийн өөрчлөлт хийлээ. Эрх зүйн шинэчлэлт  хийлээ. Эдэн дундаас бидний хийсэн хамгийн том өөрчлөлт бол оюуны санааны өөрчлөлт. Өнгөрсөн хорин жил улс орны хувьд, ард иргэдийн хувьд ч тулгарсан хүндрэл болгоныг бид хамтын хүчээр даван туулсан. Монгол Улс шилжилтийн үедээ цэг тавьсан. Хөгжлийн үе ирж байна гэж хэлж болно. Эх орон чинь хөгжиж байна. Энэ хөгжил та бүхнийг төрсөн гэр, аав ээж ах дүү, хань ижил, үр хүүхэд рүү чинь дуудаж байгаа шүү. Өнөөдөр Монгол Улс эдийн засгийн чадавхиа сайжруулж, байгалийн баялгаараа дэлхийн хөгжилтэй улс орнуудын анхаарлын төвд орсон хэдий ч нийт хүн амын амьдрал сайжраагүй хэвээр байна. 2 сая 800 мянган хүн амын сая орчим нь ядуу тэр дундаа 300 мянга орчим нь нэн ядуу амьдарч байна. Энэ гажуудлыг засах, иргэдийнхээ амьдралыг сайжруулах нь эрх баригч хүчин Монгол Ардын нам хийгээд төр засгийн бодлогын гол цөм юм. Улс орон хөгжихөд таван зүйл тун чухал. Иргэдийн эрүүл мэнд. Монгол хүний боловсрол, амьдралын наад захын баталгаа болох орон байрны асуудал, мөн өндөр настан, өнчин ядуу хүүхдүүд, тахир дутуу иргэд рүүгээ чиглэсэн нийгмийн халамжийн асуудлыг бид төрийн бодлогын хэмжээнд тавьж хамгаалж авч явах ёстой. Улс орны хөгжлийн  чөдөр тушаа болж байгаа ажилгүйдлийг багасгах, арилгах зорилгоор бид 2011 оныг Хөдөлмөр эрхлэлтийг нэмэгдүүлэх жил болгон зарласан. Ажлын байр нэмэгдүүлэх, жижиг дунд үйлдвэрлэлийг нэмэгдүүлэх зорилгоор Засгийн газраас багагүй мөнгө хөрөнгө гарган ажиллаж байна. Эрүүл мэндийн салбарт цогц шинэчлэлт хийх зорилгоор УИХ-аар эрүүл мэндийн салбарын хууль батлагдлаа. Боловсролын салбарт шинэчлэл хийх зорилтын хүрээнд Кембрижийн стандартыг Монголд хэрэгжүүлж байна. Монголд сургууль төгссөн хүн дэлхийд хүлээн зөвшөөрөгдөх, хаана ч яваад очсон ажлын байртай боловсролын хувьд гологдохгүй мэргэжилтэй мэдлэгтэй байх цаг үе ирээд байна. Оюутолгой Тавантолгой зэрэг томоохон ашигт малтмалын ордууд эдийн засгийн эргэлтэнд орж Монгол хүн нэг бүр хувьцаа эзэмшин элбэг хангалуун амьдрах үүд хаалга нээгдсэн. Монгол Улсын үндэсний орлого сүүлийн жилүүдэд гурав дахин нэмэгдсэн.  2000 оны эхээр улсын нийт төсөв 36 тэрбум төгрөг байсан бол өнөөдөр  4,5 их наядаар хэмжигдэж байгаа баяртай мэдээг та бүхэндээ дуулгаж байгаадаа баяртай байна. Монгол орны нэрийн хуудас болон эх орноосоо хол хүний нутагт ажиллаж амьдарч байгаа монголчууд та бүхэн нэрээ хичээж, нэг нэгнээ хайрлаж халамжилж, бие биедээ туслаж дэмжиж яваарай гэж” гэж солонгос улсад ажиллаж амьдарч байгаа монгол иргэддээ захилаа.



Солонгост ажиллаж амьдарч байгаа монгол иргэд УИХ болон Засгийн газрын гишүүд, эрх баригч намын удирдлагад,элчин сайд Д.Гэрэлд хандаж бидэнд Монголд очоод ажлын байр бий юу? Гадаадад ажиллаж амьдарч байгаа монгол иргэд эх орны хишиг болон  Тавантолгойн орд газрынхаа хувьцааг хэрхэн эзэмших вэ? Гэрээгээр  ажиллаад гэрээний хугацаа дуусч байгаа иргэдийн асуудлыг анхаарч үзээч. Нэг удаа визний хөнгөлөлт эдлүүлээч. Гэр бүлээ солонгос руу татмаар байна. Залуу гэр бүлийг дэмжих зорилгоор гадаадад гэр бүлээр нь гаргаж ажиллуулах боломжийг төр засгийн зүгээс нээж өгөөч. Солонгост гэрээгээр болон хараар ажиллаж байгаа иргэдийн нийгмийн асуудлыг хэрхэн шийдэж байгаа вэ? бидний нийгмийн даатгал болоод тэтгэврийн даатгал албан ёсоор төлөгдөж байгаа юу? Монгол Ардын намд залуучууд олноор элсч байна. Бидэнд энэ эрх нээлттэй юу?. Ямар материал баримт бүрдүүлж элсэх вэ? Солонгост ажиллаж байгаа иргэд сонгох эрхээ хэрхэн эдлэх вэ? Сонгуульд саналаа өгч оролцмоор байна? Ногоон нуурын ойролцоо  эзэмшдэг юмаа. Тэнд орон сууцжуулах хөтөлбөр хэрэгжиж эхлэвэл газрын нөхөн олговроо би хаанаас олж авах вэ? Зоос банкинд мөнгөн  хадгаламжтай байсан. Тэр мөнгөө хаанаас олж авах вэ? Эрсдэлийг төр дааж байгаа гэсэн үнэн үү? Каргогоор машин ачдаг юмаа. Хахууль өгөхгүй бол ажил урагшлахгүй байна. АТГ ажлаа хийж байгаа юу? Энэ мэт авлига хэрхэн тэмцэх вэ? Гадаадад ажиллах хүч зуучлах товчоог татан буулгасан гэлээ.

Энэ шугамаар орж ирсэн хүмүүсийн асуудлыг өнөөдөр хэн хариуцах вэ? Нэг цэгийн үйлчилгээ эрх шилжүүлэн авсан уу? Гэх мэт гадаадад ажиллаж амьдарч байгаа олон зуун монгол иргэдэд тулгарч байгаа нийтлэг асуултуудыг хаягласан бол БСШУ-ны сайд Ё.Отгонбаярт хандаж Монголд кембрижийн стандартыг нэвтрүүлж байгаа гэсэн бидний хүүхдүүдийн их дээд сургууль төгсөөд гардаж авах диплом олон улсад кембрижийн их сургууль төгссөний хэмжээнд үнэлэгдэж ч чадах уу? Хүүхдүүдийнхээ учрыг олохоо байлаа. Арван жилийн сургалтын программд хүмүүжлийн хичээл орж байгаа юу? Олон удаа хонхны баяр хийдэг тогтолцоог халж өгөөч. Өртөг зардал нь өндөр гарч байна. Солонгост ахлах сургуульд сурч байгаа хүүхдүүд энд их сургуульд суралцлаа гэхэд боловсролын яамнаас эдлүүлж байгаа хөнгөлөлт болон ямар нэг тэтгэмжинд хамрагдах уу? Зэрэг олон асуултанд хариулт авлаа. МАНын удирдах зөвлөлийн гишүүд,  УИХын гишүүд  солонгос улсад ажиллаж амьдарч байгаа 30 гаруй мянган монгол иргэдийн санаа бодлыг сонсч, нийгэм эдийн засгийн  байдлын талаар мэдээлэл иргэддээ өгч, сонирхсон асуултанд нь хариуллаа. Тус улсын хоёр том хотод өрнөсөн уулзалтыг солонгосын MGL радиогоор солонгосын бүх хотод ажиллаж амьдарч байгаа иргэд шууд дамжуулан сонсч, асуулт хариултанд оролцсон юм. Уулзалтын төгсгөлд Гандантэгчинлэн хийдийн тэргүүн хамба Д.Чойжамц монголчуудад сургаал айлдаж сэтгэлээ ариусгаж мөр цагаан явахыг ерөөлөө.