... Дэрвэлзэн талимаарах сормуус нь хичнээн өхөөрдөм
Дэггүйтэн мишээх уруул нь хичнээн дур булаам
Үнэгчлэн нойрсох ахуй нь ямар энхрий
Үзэсгэлэнт ялдам бүсгүй ТА ямар сайхан ...

Тийм ээ, энд өөр хэний ч тухай биш зөвхөн энэ шүлгийг уншаад чимээгүйхэн инээмсэглэн суугаа эрхэм бүсгүй ТАНЫ тухай ярьж байна.

Өглөө болгон гудамжаар хэдхэн минут алхахад маш их эрч хүчийг олж авдаг. Хэнээс вэ гэж үү? Зөвхөн эмэгтэй хүн, таниас. Өөрөөсөө гэрэл цацруулан хотыг цэлмүүлдэг тэдний нэг болж төрсөндөө эрхгүй баярладаг шүү. Эмэгтэй хүн бол тэр чигтээ гоо сайхан. Бурхан эрэгтэй хүнийг жаахан болхи, хэтэрхий энгийн бүтээчихсэн юм шиг хааяа санагддаг юм. Харин эмэгтэй хүнийг жинхэнэ “гараа гаргаж”, төгс гоо сайхныг харамгүй “асган” бүтээсэн байх. Танд тэгж санагддаг уу? Толинд харахад бидэнд өөрийнхөө бие галбир, нүүр царайнаас хайрламаар зүйл заавал байдаг. 

Ерөөс “ертөнцийг авардаг” гоо сайхныг нь бид шударга бусаар булаагаад авчихсан болохоор эрчүүд маань нэг өдөр ч гэсэн эмэгтэй хүн болж үзэхийг сэтгэлдээ нууцхан хүсдэг гэсэн шүү.

Эмэгтэй хүн бол тэр чигтээ сонгодог урлаг. Алдарт зохиолч Виллиам Шекспирийн үзэгний үзүүрээс төрсөн бүхэн суут бүтээл болдог байсны гол нууц нь түүний онгодыг оруулсан гайхалтай бүсгүйн яруу сайхнаас өөр юу ч биш билээ.

Леонардо Да Винчи Мона Лизагийн төгөлдөр дүрийг буулгаж суухдаа түүний гоо үзэсгэлэнг эд эс бүрээрээ мэдэрч, үснийх нь ширхэг бүрийг нямбайлан зурсан учраас л өнөөдөр хэзээ ч хуучрашгүй мөнхийн бүтээл болж чаджээ. Тэр үед түүнд төрсөн мэдрэмж дахин давтагдашгүй байсан байх.

Бид бүгд эрчүүдэд өөрсдийнх нь дангаараа амсаж чадахгүй тийм давтагдашгүй мэдрэмжийг өгдөг. Яг үнэндээ бид байхгүй бол шүлэг бичих гэж мөр холбоод хэнд зориулах юм бэ? Аялгууг хэнд зориулж уянгалуулах юм бэ? Дэлхийг шуугиулсан сонгодогуудын дийлэнх нь биднээр хөглөгддөг биш гэж үү? Тиймээс та бол байгаагаараа тэр чигтээ яруу найраг, уран зураг, дуу бүжиг билээ.

Эмэгтэй хүн бол тэр чигтээ хайр энэрэл. Таны аялсан нэгхэн бадаг бүүвэйн дуунд орчлон хорвоо бүхэлдээ уярдгийг мэдэх үү? Эрэгтэй хүн тэмцэл, хүч чадал, эрх мэдэл, эрэлхэг зоригийн билэг тэмдэг. Харин бид л зөөлөн, аядуухан аашаараа тэднийгээ аргадаж, хайрлаж энэрэхийн мөн чанарыг ойлгуулдаг. Эзэн Чингис хааны дэргэд Их хатан Бөртэ нь байгаагүйсэн бол Хамаг Монголд тулаангүй өдөр хаа нэг л тохиох байсан биз. Ямар ч харгислал бүсгүй хүний нулимасны өмнө толгой гудайн, сөхөрдөг. Яагаад гэвэл бидний ариун нинжин сэтгэл тийм хүчтэй.

Хатуу чулууг урсгал ус л мөлийлгөж, ирмэгийг нь зөөллөдөг. Та бол энэ орчлонд өвөртөө хайрыг, энгэртээ энэрэлийг тээж ирсэн амьд бурхан юм шүү.

Эмэгтэй хүн бол тэр чигтээ амьд байгаль. Бидэнд талын цэцэгсийн анхилам үнэр, эрвээхэйн дэвэлт шиг хачин эгдүүтэй сормуус, хунгийнх шиг хүзүү, тэнгэрийн одод шиг нүд, нар сар шиг инээмсэглэл бий. Амьд байгалийн гоё сайхан бүхний цогцлол гэвэл бүсгүй хүнийг л хэлнэ дээ. Мөн намрын навчис шиг санаа алдалт, өвлийн цас шиг эрхлэлт, хаврын бороо шиг тунирхал, зуны халуун шиг догдлолыг төрүүлж чадах хүмүүн бол ТА.

Эрчүүдийг цэцэгтэй зүйрлэсэн үг би лав сонсч байгаагүй. Байгалийн сайханд очихоор сэтгэл  өөрийн эрхгүй уужирч, муу муухай бодлуудаасаа салж, аз жаргалтай болдог. Үүнтэй адилаар бидний хажууд байхад ч бас яг л ийм мэдрэмжийг авч чаддаг учраас бид хайрлуулдаг, хайрладаг юм болов уу.