“Ажилд авна” гэсэн зар Солонгос , Хятад эзэнтэй хоолны газрууд болон дотоодын хөрөнгө оруулалтын цайны газруудын үүдэнд байнга байдаг. Нэг, хоёр сарын турш магадгүй зарим тохиолдолд жилийн хугацаанд ийм зар үүдэндээ наачихсан байдаг үйлчилгээний газрууд олон бий. “Эдгээр байгууллагууд охид эмэгтэйчүүдийг цэвэрлэгээ хийлгэхдээ хүртэл туршиж, хөдөлмөрийг нь мөлжсөөр байна. Ажилд орохыг хүссэн нэгнийг 14 хоногоос нэг сарын хугацаанд туршиж байгаад буцаадаг. Энэ нь хүний хөдөлмөрийг мөлжиж байгааг Хүйсийн тэгш эрхийн төвийн тэргүүн Г.Ганбаясгах  хэлж байна. Хүйсийн тэгш эрхийн төвд дотоодод хөдөлмөр мөлжлөгт ашиглагдсан охид бүсгүйчүүд ихээр ханддаг болжээ. Эмэгтэйчүүдийг сав угаагчаар, үйлчлэгчээр ажилд аваад 14 хоносны дараа тэнцсэнгүй гээд буцааж явуулах нь энүүхэнд байдаг байна. Иргэд хууран мэхлэгдэж байгаа нь өөрсдөө хуулиа мэддэггүйтэй холбоотой гэж хөдөлмөр халамж үйлчилгээний газрынхан хэлсэн.  Дээрээс нь хөдөлмөрийн хуулинд туршилтын хугацаа гэж байдгийг гадна дотны ажил олгогчид овжиноор ашиглаж байгааг ч шүүмжиллээ. Нийгмийн хамгаалал хөдөлмөрийн яамныхан ч ялгаагүй иргэдийг буруутгаж байна. Тэд хөдөлмөрийн гэрээ байгуулахгүйгээр ажилд орсноосоо болоод иргэд эрхээ зөрчүүлж байна гэсэн дүгнэлт хийж байна. Хөдөлмөр эрхлэлт дээр гарч байгаа хөдөлмөр мөлжлөгийн асуудлыг салбарын яам нь ч хөдөлмөр халамж үйлчилгээний газар нь ч мэдэхгүй байна. Мэргэжлийн хяналтынхан анхаарал хандуулах ёстой гэсэн хариултыг яамны мэргэжилтэн өгч байлаа.