Эцэг, эхчүүд хүүхэддээ (бэлгийн) гэсэн тодотголтой юм бүхэн дээр амаа жимийж нүүр буруулдаг. Тэд ердөө л энэ сэдвээр ярихаасаа айдаг. Учир нь тэд өөрсдөө хэзээ ч энэ сэдвээр зцэг эхээсээ номын дуу сонсож байгаагүй. Тиймээс хүүхэдтэйгээ энэ сэдвээр яаж ярихаа мэддэггүй. Нөгөөтэйгүүр хүүдэд бэлгийн хүмүүжлийн талаар ярих нь тэднийг сонссон зүйлээ амьдралд “хэрэгжүүлэх” буюу бэлгийн амьдралд эрт ороход нөлөөлнө гэж сэтгэл зовдог.

Харин судалгаанаас үзэхэд эцэг эхээсээ бэлгийн эрүүл мэндийн талаар зөв мэдээлэл авч байсан хүүхэд, мэдээлэл авч байгаагүй үеийнхнээ бодвол бэлгийн зөв хүмүүжил, зөв зан үйлтэй болж төлөвшдөг аж. Тэд бусдаа бодвол хожуу бэлгийн харилцаанд ордог бөгөөд хүсээгүй жирэмслэлт болон бусад эрсдлүүдээс өорийгөө хамгаалж чаддаг нь батлагджээ.

Эцэг эхчүүдийн нийтлэг алдаа
Эцэг эхчүүд хүүхэд том болсон хойноо аяндаа “болчихно” гэж боддог. Хүүхэд төрсөн цагаасаа л эцэг, эхээ болон эрэгтэй, эмэгтэй хүмүүсийг ажиглан энэ талаар ойлголттой болдог. Олон нийтийн мэдээллийн хэрэгсэл, үе тэнгийнхний яриа зэргээс ч бэлгийн хүмүүжил олдог. Харамсалтай нь хүүхэд дээрх эх сурвалжуудаас тэр болгон зөв мэдээлэл авч чаддаггүй, бүр эсрэгээр буруу зан үйлтэй ч болж болно.

Учир нь мэдээ. мэдээлэл, кинонуудын ихэнх нь томчуудад зориулсан байдаг. Тиймээс ч олон эцэг эхчүүд “энэ телевиз хүүхдийн хажууд хүнийг ганц сайн шарах юм” гэж үглэдэг. Энэ нь ердөө л бэлгийн хавьтал гэсэн ойлголт гэсэн үг биш.

Та хүүхэдтэйгээ илэн далангүй бай
Та хүүхэддээ бэлгийн зөв хүмүүжил олгох гэдэг нь хэнтэй яаж хавьталд орохыг зааж байгаа бус. Бэлгийн хүмүүжил нь эрэгтэй эмэгтэй хүмүүс яагаад хоорондоо адилгүй байдаг, тэдний харилцааны онцлог, өсөлт хөгжилд, өөр өөрсдийгөө таних, хүн үр удмаа үлдээх гээд мэдвэл зохих өргөн асуудлуудыг багтаадаг. Бэлгийн харилцаа, зан үйл нь хүн оршин тогтнохын үндэс юм. Бэлгийн эрүүл мэнд нь хүний эрүүл аж төрөх ёсны хамгийн чухал хэсэг.

Хүүхдэд багаас нь бэлгийн хүмүүжил олгох нь тэднийг эрүүл саруул, зөв зан үйлтэй болон өсөж бойжиход нь хамгийн их нөлөө үзүүлдэг. Эцэг эхчүүд хүүхэддээ секс гэдгийг ярихаасаа зайлсхийх нь тэдэнд бэлгийн хавьтал бол ямар нэгэн ичгэвтэр, тааламжгүй зүйл гэдэг ойлголтыг суулгадаг. Ингэснээр өсвөр үеийнхэнд бэлгийн эрүүл мэнд, нөхөн үржихүйн асуудал гарлаа гэхэд тэд эцэг эх, эмч мэргэжилтнүүд болон томчуудаас асуухаас цааргалах, нуух байдлыг үүсгэдэг.

Энэ нь тэдэнд нөхөж баршгүй гарз хохирол авчрах нь олонтой. Тиймээс ч та яг одооноос эхлээд өрөв тасын үлгэрийг үлгэр чигээр нь үлдээж хүүхэдтэйгээ чин сэтгэлийн яриа өрнүүлээрэй.

Хүсээгүй жирэмслэлт ба эрсдэл
Сүүлийн үеийн залуус бэлгийн хавьталд эрт орох хандлага ажиглагдаж байна. Монгол улсад хийсэн Нөхөн үржихүйн эрүүл мэндийн судалгаагаар 19 настай охидын 44 хувь нь бэлгийн идэвхтэй харилцаанд байдаг нь харагджээ. Гэвч залуучуудын ихэнх нь өөрсдийгөө янз бүрийн эрсдэлд оруулна гэж боддоггүй.

Өнөөгийн байдлаар Монголд өсвөр насны охидын дөрөвний нэг нь 19 настайдаа жирэмслэсэн аж. Өсвөр насандаа жирэмсэлснээс болж олон охид сургуулиа хаядаг. Түүнчлэн, насанд хүрсэн эмэгтэйчүүдтэй харьцуулахад өсвөр насандаа жирэмслэсэн охидын дутуу төрх, бага жинтэй хүүхэд төрүүлэх, хүүхэд нь өвчин эмгэгт өртөх, нас барах тохиолдол илүү байдаг. Үр хөндүүлснээс үүсдэг хүндрэлүүд ч мөн нэмэгдэнэ. Дараагийн эрсдэл нь бэлгийн замаар дамжих халдварууд(БЗДХ).

Манай оронд бэлгийн замаар дамжих халдвар авсан хүмүүсийн тал хувийг 25-аас доош насныхан эзэлдэг гэж мэргэжилтнүүд үздэг. Тиймээс та өөрийгөө учирч болох эрсдлээс сэргийлж чадах насанд хүрсэн гэдэгтээ 100 хувь итгэлтэй болтлоо бэлгийн хавьтлаас татгалзаарай.