Орон сууцанд амьдрах нь залуусын хүслэн болсон. Гэвч байр шууд худалдан авах мөнгөгүй тул орон сууцны зээлийг ихээхэн сонирхож байна. Ихэнх банк орон сууцны зээл олгож байгаа. Харамсалтай нь зээлийн нөхцөл, хүү зэрэг нь хэт өндөр гэх шүүмжлэлийг дагуулж байна. Одоогийн байдлаар төрийн албан хаагчид олгох 4000 орон сууц л хамгийн боломжтой нөхцөлтэй байна.

Өөрөөр хэлбэл, зээлийн хүү нь жилийн 10 орчим хувь байх бололтой. Гэхдээ энэ нь эцэслэн шийдэгдээгүй. Мөн урьдчилгаа төлбөр авах эсэх талаар ч ярилцаж байна. Харин арилжааны банкуудаас олгож буй орон сууцны зээлийн хүү жилийн 20 орчим хувь юм. Мөн урьдчилгаа гэж 30-50 хувийн төлбөр авна. Арван жилийн хугацаатай зээл авлаа гэхэд хүүнд нь орон сууцныхаа үнийг нэг дахин нугалах хэмжээний мөнгө төлж байна. Орон сууцны зээлийн талаар товч мэдээлэл хүргэе.

Орон сууцны зээл авахын тулд юуны өмнө хэд хэдэн нөхцөлийг хангасан байх шаардлагатай. Энэ дундаас хамгийн чухал нь зээлээ эргүүлэн төлөх тогтмол орлоготой байх хэрэгтэй.

Үүнийг батлахын тулд багагүй бичиг баримт бүрдүүлэх хэрэгтэй болно. Банкуудын олгож буй зээлийн дээд хэмжээ 150 сая хүртэл төгрөг байна. Зээл авахдаа урьдчилгаа төлбөр хэдийг төлснөөс хамаарч зээлийн хүүнд ялимгүй өөрчлөлт орж байгаа аж. Өөрөөр хэлбэл, урьдчилгаа төлбөрөө 50-иас дээш хувиар төлөх тохиолдолд зээлийн хүү 0.05-0.07 хувиар буурч байна. Урьдчилгаа төлбөр харилцан адилгүй байгаа. Хамгийн бага нь 30 байгаа юм. Зээлийн хүү сарын 1.3-2 хувь байна. Дунджаар жилийн 20 орчим хувийн хүү төлөх аж.

Зээлийн хугацаа 10-20 жил байна. Ерөнхийдөө дундаж хугацаа нь 15 жил хэмээн ойлгож болох аж. Зарим тохиолдолд хугацааг таван жилээр сунгах нөхцөлтэй байна.

Зээл авч байгаа иргэн, өрх сард дор хаяж 500 мянган төгрөгийн орлоготой байх шаардлагатай аж. Урьдчилгаа төлбөр хэдийг төлснөөс хамаарч дээрх хэмжээ өсөх юм. Иргэдэд сануулахад байр зээлээр авахдаа тухайн сууцны чанар, барьцаанд байгаа эсэх гээд бүхий л мэдээллийг цуглуулах нь хожим гарах эрсдэлээс хамгаалагдана.

Гэр хорооллоос салж, иргэдийг орон сууцжуулахын тулд зээлийн хүүг бууруулах шаардлагатай хэмээн иргэд үзэж байна. Сард 20 орчим хувийн хүү төлнө гэдэг иргэдийн хувьд хүнд байгаа. Дээрээс нь урьдчилгаа төлбөр гэж дор хаяж 10 сая төгрөг төлөх шаардлагатай. Ийм хэмжээний бэлэн мөнгөтэй өрх ховор. Энэ бүхнээс шалтгаалж иргэд гэр хороололд гал түлж амьдрахыг илүүд үзэж байгаа нь нууц биш.

Төрийн албан хаагчид олгож байгаа зээл хамгийн боломжтойд тооцогдож байгаа. Хэрэв Засгийн газраас гаргаж буй 180 тэрбум төгрөгийн бондоор төрийн албан хаагчийн 4000 орон сууцыг санхүүжүүлээд үлдэх юм бол иргэдэд олгоно. Өөрөөр хэлбэл, төрийн албанд ажилдаггүй иргэн арилжааны банкаар дамжуулж бага хүүтэй зээлд хамрагдах боломжтой юм. Гэхдээ энэ нь зээл авахыг хүссэн хүн бүрт хүрэлцэхгүй нь ойлгомжтой