Moderator: mgl_300
Ерөнхий шинж
Улаан хоолойны дагуу, эсвэл цээжний орчимд залгиур дээр хорсон эвгүй мэдрэмж төрөхийг хэлнэ. Нэг талаас энэ таагүй мэдрэмжээс салах тийм ч хэцүү биш. Үүний тулд аяга усанд нэг цайны халбага сод хийж уухад арван минутын дараа эвгүй мэдрэмж алга болно. Гэвч эмч нар энэ аргыг эмчилгээ гэж үздэггүй. Учир нь цээж хорсолт нь наана нь илэрч байгаа шинж төдий бөгөөд цаана буруу хооллолт, хоол боловсруулах замын ноцтой өвчлөл нуугдаж байх болмжтой. Цээж хорсолт ходоодны шүүсний хүчиллэг их, эсвэл бага байгаагаас үл хамааран үүсдэг ч гол төлөв хүчиллэг ихэссэн үед ажиглагддаг. Зарим хүнд энэ шинж нь хоолойд юм тээглэх, халуу оргих, үрэгдэх, дарагдах мэт мэдрэмжийг төрүүлдэг.
Шалтгаан
1. Хэт их идэх.
2. Илүүдэл жин,
3. Хэвлийн хөндийн дотоод даралт ихсэх. Жирэмсэн үед, хүнд зүйл өргөснөөс, хэт бариу хувцас болон бүснээс
4. Тамхи, архи, кофе, шоколад, хийжүүлсэн ундаа, хурц амтлагч
5. Зарим нэг эмийг удаан хугацаагаар хэрэглэх /аспирин, ибупрофен, ортофен г.м/
6. Хоол идсэний дараа шууд унтах
7. Ходоодонд Helicobacter pylori хэмээх микроб байх.
8. Хүнсний харшил
9. Мэдрэлийн хямрал
10. Улаан хоолойны үрэвсэл, ходоодны үрэвсэл, цөсний хүүдийн үрэвсэл, шархлаа өвчин
11. Улаан хоолой, ходоодны нугаралт нарийсах
12. Шимэгч хорхойн өвчин
Явц
Улаан хоолой ба ходоодны хооронд цагариг булчингаас тогтсон хавхлага байдаг. Хоол улаан хоолойгоор дамжин ходоодонд орох үед хавхлага хаагдан ходоодонд орсон зүйлийг буцаад улаан хоолой руу орох боломжгүй болгодог. Заримдаа хавхлаг нь дутуу хаагдсанаас хүчил улаан хоолойд орж гашуун оргиж хорсгодог. Хорсох мэдрэмж нь зөвхөн ходоодны хүчиллэг улаан хоолой руу орсноос үүсдэггүй. Ходоод болон гэдэсний хооронд бас хавхлаг байдаг. Хэрэв ходоод болон гэдэсний хоорондох хавхлаг нь дутуу хаагдвал гэдэсний агууламж ходоодонд орох бөгөөд хорсох мэдрэмж төрүүлнэ.
Үр дагавар
Зарим үед цээж хорсох нь зүрхний цус хомсрох өвчний илрэлтэй андуурагддаг агаад зүрхний орчим, өвчүүний цаана халуун оргидог. Хорсолт нь улмаар улаан хоолойг түлж, салслаг бүрхүүлийг нь гэмтээдэг. Хэрэв цээж хорсох өвчтэй хүн эмчилгээ хийхгүй бол маш богино хугацааны дотор ходоодны архаг үрэвсэл, улаан хоолойн үрэвсэл эсвэл шархлаа өвчинд нэрвэгдэх аюултай.
Оношлогоо
Хэрэв танд цээж хорсох шинж илэрвэл залхууралгүй ходоод гэдэсний эмчид хандаж зөвлөгөө авах нь чухал. Эмч шалтгааныг нь илрүүлэх бөгөөд үүний тулд ходоод дурандах, ходоодны шүүсийн хүчиллэгийг тодорхойлох шинжилгээнүүдийг хийнэ. Шаардлагатай үед онош ялгах зорилгоор зүрхний эмчээс зөвлөгөө авахуулж, зүрхний бичлэг хийлгүүлдэг.
Эмчилгээ
Хоёр сарын турш үргэлжилнэ.
· Тусгай хоолны дэглэм барих. Өдөрт 4-5 удаа бага багаар идэх, өөх тостой, шарсан хуурсан хоолноос татгалзах, гашуун жимс, кофе хэрэглэхгүй байх
· Архи, тамхи хэрэглэхгүй байх
· Ходоодны шүүсний хүчиллэгийг багасгах, салст бүрхүүл бий болгодог бэлдмэлүүдийг ууж хэрэглэх