Эрлэгт явахаас нь өмнө ханийн жаргал эдлүүл
Эр нөхөр чинь үгүй бол
Гэрийн зай эзгүйрдэг юм
Эрдэмт хөвгүүд үгүй бол
Төрийн зай эзгүйрдэг юм
Эр цэрэг чинь үгүй бол
Эх орон эзгүйрдэг юм.
Халуун залуу насыг нь
Хамтарч элээснээ бодоо
Хайрын галзуу дурлалд
Хамт элэгдсэнээ болгоо
Өөрийг чинь ээж болгох эрийн тэнгэр шүү дээ
Үрийн чинь эцэг болсх хүний дээд шүү дээ
Хичнээн жил амьд явахаа мэдэж болдоггүй орчлон дээр
Хэзээ хаана жаргана гэж хэрүүлийн алим хуваах вэ
Хазайсан газар нь тэдэнд чинь
Бүүвэй ээж түшиг болдог юм
Халтирсан газар нь тэдэнд чинь
Бүсгүйн хайр ивээс болдог юм
Уул шиг юм гэж дандаа битгий давар
Үүл шиг нүүгээд явчихдаг юм
Ус шиг уян гэж дандаа битгий самар
Уур болоод дэгдчихдэг юм
Төгөлдөр их урмыг нь бүр хугалчих юм бол
Төрсөн шигээ тэд чинь
Уруугаа хараад уначихдаг юм
Эр хүнийг та нар хааяа ч болов өршөө
Эрлэгт явахаас нь өмнө ханийн жаргал хайрла
Дээл бүсэн гоёлтой
Дээрээ малгай хийморьтой
Андынхаа дэргэд цовоождог
Аавынхаа харцанд томоождог
Янагийн сэтгэлд нялхардаг эрчүүдээ
Янжинлхамууд минь болгоо
Эр нөхөр чинь үгүй бол гэрийн зай эзгүйрдэг юм
Эр цэрэг нь үгүй бол эх орон эзгүйрдэг юм
Олон олон авааль гэргий та нараасаа
Олон олон аавын хөвгүүдийг
Өмөөрч бичсэн шүлгийг минь өршөө
Өөрсдөө та нар нөмөрт нь жарга..............

*****Эр хүн ч уйлдаг юм*******

Эр хүн ч уйлдаг юм
Эгштэл мэгштэл, асгартал, цурхиртал уйлдаг юм
Хүний хайртыг жишим ч үгүй харчихдаг хирнээ
Хүүхэн хонгорыг нь тоох ч үгүй булаачихдаг хирнээ
Өөрийн гэргийг өндөсхийх зуур л харамладаг юм
Өөр хүний өвөрт байхыг нь хараад цурхирдаг юм
Эр хүн ч уйлдаг юм
Баавгай шиг том эр хирнээн
Бяцхаан хүү нь ханиах төдийд л мэгшдэг юм
Хангай шиг уул шиг түшигтэй агуу хүн хирнээн
Хэнгэнэтэл уйлж суугаа охиноон хараад л нурдаг юм
Эр хүн ч уйлдаг юм
Харахад хэнэггүй хаа шаагүй юм шиг хирнээн
Халуун цай, дулаан уургүй хаалга нээхэд л гутардаг юм
Халуун мөөм үлгэж хүн болсон тэр хүү
Халуун мөөмөндөө л нүүрээ наавал жаргалтэй хар хүн болж өсдөг юм
Хамгаас хайртай эд нь л байхгүй болчихвол
Хачин ихээр цурхиртал уйлдаг юм