Ерөнхий сайдын захирамжаар байгуулагдсан ажлын хэсэг Оюутолгойн ашигт малтмалыг ашиглах асуудлаар "Рио Тинто" болон "Айвенхоу майнз"-ын хамтарсан багтай хэлэлцээр хийж байна. Харин "Тавантолгой" төслийн хувьд БНСУ-ын "КОРЕС" байгууллагын ахалж байгаа тус улсын 11 компанийн консорциум, ОХУ-ын гурван консорциум, АНУ-ын "Пибоди энержи", Японы "Мициу", "Иточу", "Сожиц", Энэтхэгийн "Жиндал Стиил энд Поавер", Бразилийн "Вале", Хятадын "Шинхуа энержи" компанийн төлөөлөгчид саналаа ирүүлсэн. Тэдгээрийн саналыг ажлын хэсэг судалж байгаа. Энэ нь Засгийн газраас ард түмэнд өгсөн мэдээлэл. Иргэд эдгээрийн аль нэгтэй Засгийн газар гэрээ байгуулж, бидний амьдрал удахгүй дээшилнэ хэмээн итгэж хүлээж байна. Монголчууд хямралын үед дээрх компаниудын аль нэгийг сонгож баялгаа хурдхан ашиглаж эхлэхгүй бол үнэгүйдсэн дээрээ улам үнэгүйдэх болно гэдгийг ойлгосон. Ийм үед Засгийн газар хуралдаанаараа БНХАУ-аас 300 сая ам.долларын зээл авахаар ярьж эхэлсэн нь хүн бүхний анхаарлыг татаж байна. Тэгээд ч Хятадын талтай энэ талаар тохиролцоонд хүрэхээр Засгийн газраас гэрээ хэлэлцээр хийх ажлын хэсэг гаргаж, ахлагчаар нь Шадар сайдыг томилжээ. Гурван зуун сая ам.доллар. Энэ нь монголчуудын хувьд өмнө нь авч байсан гадаадын хөрөнгө оруулалт, зээл, тусламжаас хамгийн их нь юм. Тиймээс энэ тоог сонссон монголчуудын хувьд гайхах, баярлах нь зэрэгцсэн гэхэд хилсдэхгүй. Хямралын үед бие биедээ сайхан сэтгэлээр туслах нь сайн хэрэг хэдий ч монголчууд хятадуудыг хариутай бол бариутай гэсэн зарчмаар ажилладгийг нь мэддэг. Тиймээс учир мэдэх хүмүүс их мөнгөний хариуд юу авах бол гэхчлэн болгоомжилж байгаа. Болгоомжлол оройтжээ. Асуудал хятадуудын талд нэгэнт шийдэгдэж байгаа бололтой. Уул уурхай, зам барилга, эрчим хүч гээд улсдаа дээгүүрт бичигддэг Хятадын "Шинхуа энержи" группыг Тавантолгойд оруулахаар тохиролцож байгаа аж. Уг нь "Шинхуа энержи" групп эртнээс Тавантолгойн хүрэн нүүрсний орд газрыг ашиглахад хөрөнгө оруулах сонирхолтой байгаагаа илэрхийлж байсан. Тэгээд ч ордыг хэдэн жилийн хугацаанд, ямар аргаар ашиглаж, хичнээн хувийн ашиг авах, дэд бүтцийг хэрхэн барьж байгуулах зэрэг бүх талын судалгааг хийснээ Засгийн газарт мэдэгдэж. Түүгээр ч зогсохгүй Хятадын хилээс нааш манай улс руу татах төмөр замынхаа ажлыг эхлүүлсэн гэдгийг эх сурвалж нотолж байна. Үүнээс үүдээд Тавантолгойн ордыг ашиглах төмөр замаас эхлээд эрчим хүч, барилга байгууламж зэрэг бүхий л асуудлыг тэд зохицуулах бололтой. Ажиглагчид Тавантолгойн хүрэн нүүрсний ордод Хятад улсын ашиг сонирхол давамгайлахгүй байх нь манай улсад өгөөжтэй болохыг хэлж буй. Хэдийгээр Оюутолгой, Тавантолгойн ордод чамгүй хэдэн консерциум хөрөнгө оруулахаар улайрч байгаа ч хямрал тэдгээр улсыг тойрохгүй нь лавтай. Тиймээс л Хятадын тал дээрх ордод илүү эрхтэй оролцох нь гэсэн хардлага төрүүлж байна. Засгийн газар Хятадаас зээлэх гурван зуун сая ам.долларынхаа хоёр зуун саяыг нь хоёр улсын худалдаа, эдийн засгийн хамтын ажиллагааг хөгжүүлэх чиглэлээр хэрэгжүүлэх төслүүдийн санхүүжилтэд, нэг зуун саяыг нь банк, санхүүгийн хямралаас урьдчилан сэргийлэхэд зарцуулахаар төлөвлөжээ. Гэхдээ өнөөдрийн байдлаар Засгийн газар Хятадын талтай яг таг тохиролцчихсон юм үгүй. Асуудал яриа төдий байгаа. Энэ байдал ч хэсэг хугацаанд үргэлжлэх аж. Учир нь Хятадын тал гурван тэрбум ам.доллараа Тавантолгойн орд газартай дүйцүүлж байгааг нь эх сурвалж нуугаагүй. Учир нь дээрх зээл өнгөрсөн хориод жилийн хугацаанд Монгол Улсын гадаадаас авч байсан зээл тусламжийн хэмжээтэй бараг л ойртож очиж байгаа аж.