Ерөнхийлөгчийн сонгууль дөхөх тусам АН-д шургалсан, арчаагүй этгээдүүд хувийн явцуу ашиг сонирхолдоо хөтлөгдөн, 20 жилийн түүхтэй ардчилсан хүчний нэр хүндийг хөсөр хаяж байна. Авлигын гэмт хэргээс мултарч, арьсаа хамгаалахын тулд алиалан салбаганасан, архи спиртээр ардаа хордуулсан ахиж дэвждэггүй  улстөрийн рейтингээ  өсгөх гэсэн, далимдуулж байгаад давхар мэх хийх гэсэн арчаагүй үйлдэл бүрийг АН-ын гишүүд бид эрс буруушааж байна.

Өөрийгөө бараг л ардчилалын эцэг гэх нь холгүй байгаа уран хөхөө, түмнийг хошгируулагч Ц.Элбэгдорж УИХ-ын 65-р тойргийн нөхөн сонгуулиар МАХН-ын газрын наймаачин М.Энхболдтой наймаа хийж УИХ-ын суудлаа найр тавин өгч байлаа. Үүнийхээ хариуд 2 дахь удаагаа ерөнхий сайд болж 2005 оны 3-р сард Дуурь бүжгийн академик театрын   урд  барьсан байсан Эрүүл нийгэм иргэний хөдөлгөөний монгол гэрийг цагдаагийн хучээр буулгах тушаал өгч байлаа. Ардчилалын 19 жилд хүзүүгүй болтлоо таргалж бүдүүрсэн  хөхөө шувууны түрийвч бас л зузаарсан юм.

Оллоо.мн сайт дээр тавигдсан мэдээлэл болон сэтгэгдлүүд алга болдогийг бүгд мэднэ. Яагаад гэвэл анх 800 сая төгрөгөөр анх үнэлэгдэж байсан Оллоо.мн-ийн хувьцааны ихэнхийг Ц.Элбэгдорж  эзэмшдэг.Ц.Элбэгдорж нь маш богино хугацаанд өөрийн ах цэрэгт ч явж үзээгүй Ц.Нямдоржийг батлан хамгаалах яаманд хурандаа болгож, нөгөө ах Ц.Арсландоржоо баазын дарга болгож таргалуулж байлаа.

Эврээ ургахаар эхийгээ мөргөж, АН-ыг сайдын сандал суудлын төлөө арилжиж, МАХН-ын заавраар  доромжлон гутааж явсан Л.Гүндалай УИХ-ын гишүүний бүрэн эрхээр арьсаа хамгаалах болохоороо манай намыг хоргодох байр болгосон. АН-ын нэр хүнд, гишүүдийнх нь итгэл үнэмшил рүү үсэргэсэн шүлс, шивсэн хараалыг нь харсан нүд сохроогүй, сонссон чих бөглөрөөгүй, ой ухаан мартаагүй байна. Ууж идэх болохоороо унасан морио хаяж, цай өгсөн айлынхаа аяганых нь ёроол руу  нулимж явсан урваач одоо бүр даварч, Ерөнхийлөгчийн сонгуульд нэр дэвшинэ гэж ичих ч үгүй шарваж  байна.

Үлгэр домог, уран зохиолын баатруудыг агуу их Чингис хаан, ардчиллын өлгий хүчирхэг Америкийн Ерөнхийлөгчтэй адилтган, нэгэн зэрэг өөрийгөө зүйрлэсэн нь улс төрийн гүн балайрал төдийгүй гажигтай үг бүхэн нь ухаант түмний элэг доог болж байна. Төрийн тэргүүний сонгууль хэргээс мултрах заль мэх биш гэж “Юун гуя” хэмээн шоглон ярьдаг монголчууд мэдэхийн дээдээр мэднэ.

Ардчилсан хувьсгалын туг нь болж дэрвэсэн МҮАН, МоАХ-ны араар нь тавьж хор хутгасан,  албан тушаалын шуналаар дүүрсэн соцдекүүд, ард түмнийхээ өөдөөс буу шагайсан этгээдүүдийн өвөрт сүнсээ худалдсан “Алтан гадас”-ынхан үнэнч шударга эгэл жирийн гишүүдийн итгэл үнэмшлээр тоглодгоороо тоглох гэж байна. Ардчилсан хувьсгал давалгаалж байхад ор сураггүй байсан, албан тушаал, арилжаа наймааны панзчин Г.Батхүүд АН-аас нэр дэвших түүх намтар, эр зориг, зангараг чансаа огтхон ч байхгүй. Тоглоомын засгийн газрын утсан хүүхэлдэйнүүд, МАХН-ын дагавар магнайнуудыг АН-аас шахан зайлуулаагүй цагт бид хүчирхэгжиж бэхжихгүй, бид ялан дийлэхгүй. Улсын наадамд морь уях, уудаг иддэг наймаа хийхээс улс төрийн тэмцэл тэнгэр газар шиг ялгаатай.

“Алтан гадас”-ын албан тушаалын наймаачид АН-ын нэр хүндээр ард түмнээс саасан мөнгөөрөө түрий барих юм бол Ерөнхийлөгчийн сонгууль башир жүжиг, ардчилал хүртэл хуурамч үзүүлэн болно. 2001 онд зохион байгуулсан их сунгаа их хагарал, их хэрүүл болж, МАХН-ыг Социнтернд элсүүлэн долигоносон Р.Гончигдоржийн найруулсан хор намыг хордуулан шившигт ялагдалд хүргэсэн. Урвагч, салан тусгаарлагч, ардчилсан хувьсгалын анхдагчдыг үзэн ядагч М.Энхсайхан ч өөдөө шидсэн чулуу өөрийн толгойн дээр гэгчээр 2005 онд шившигтэйгээр ялагдсан. Энэ ялагдалд УИХ дахь МАХН-ын бүлгийн орлогч Р.Гончигдорж тэргүүтэй хор найруулагчдын хувь нэмэр онцгой их байсан. АН-ыг албан тушаал, ардчиллыг авлига, ардын сонголтыг алт болгож хардаг “Алтан гадас”-ын загалмайлсан эцэг Р.Гончигдорж, Н.Алтанхуяг нар ч арчаагүй нэрээ завсарт нь хавчуулж, тандан туршиж байна.

Ардчилсан хувьсгалын алтан хараацай, ардчиллыг өмгөөлөн хамгаалагч  ардчилалын анхдагч нар цор ганцаараа дотроо нэр цэвэр, түрийвч нимгэн яваа Э.Бат-Үүлийг улс төрийн алиа салбадай, улс төрийн янхнууд ганцаардуулан хавчиж байна.Э.Бат-Үүл нарын ардчилсан хувьсгалыг удирдсан нэг өдөр ард түмний сонголтыг албан тушаалаа хадгалах, арчаагүй сонирхлоо хамгаалах хэрэг болгосон урваачдын 10 жилээс илүү үнэ цэнэтэй. Ард түмний улс төрч, ардчиллын үнэнч зарц Э.Бат-Үүлийг тууштай дэмжиж, ардчилсан хувьсгалын ойгоо Ерөнхийлөгчийн сонгуульд ялалтаар тэмдэглэе. 
Ардчилсан тэмцлийн туг С.Эрдэнэ, журмын нөхдийгөө бид улс төрийн зорилгоор шорон гянданд суулгах гэж МАХН-д дагаар ороогүй. Ардчиллаа худалдах гэж, анд нөхдөө барьж өгөх гэж АН байгуулагдаагүй.

Эрхэм журмын нөхөд өө. Ардчилсан намаас Ерөнхийлөгчийн сонгуульд нэр дэвшигчийг сонгох Их хурал, ҮЗХ-ны хурлаас ардчиллыг худалдагчдад хариуцлага тооцох түүхэн шийдвэр гаргацгаая. Ардчилсан хувьсгал эхэлсний 20 жилийн ойгоор хонхны дуундаа түрлэг нэмж, Ардчилсан намаа авран хамгаалж, ардчиллын тугийг ахин мандуулцгаая. Журмын нөхөд Та бүхнийгээ улс төрийн шударга тэмцэл, ардчиллаа сэргээн мандуулах их үйлсэд уриалж байна. Бид түрхрэн босвол коммунизмыг нурааж, тусгаар тогнолыг тунхаглаж, ардчилал, эрх чөлөөг авчирч чаддагаа нотлон харуулсан. Бидний зүрх сэтгэл, үзэл баримтлал  авлигачдынхаас цэвэр шударга, бид олуулаа, бид хүчирхэг билээ

Ардчилсан намын хэсэг гишүүд