ОХУ –ын нийслэл Москва хотноо Олон улсын сонирхогчдын боксын холбооны (AIBA) шагнал гардуулах ёслолын үеэр AIBA –гийн тэргүүн Василия Ломаченко 2008 оны шилдэг тамирчны шагналыг Монголын боксчин Энхбатын Бадар-Ууганд олгосноо зарлажээ.

Москвад арванхоёрдугаар сарын 10 – 14 –ны хооронд Боксын дэлхийн Цомын төлөөх тэмцээн болж байгаа юм. Өнгөрсөн баасан гариг буюу арванхоёрдугаар сарын 12-нд тэмцээн завсарлаад байсан ч зохион байгуулагчид нь энэ өдөр зочдод зориулан хэд хэдэн арга хэмжээг зохион байгуулжээ. Түүний нэг нь Москвагийн Crown Plaza зочид буудалд болсон Олон улсын сонирхогчдын боксын холбооны Оны шилдэг боксчин, дасгалжуулагч, шүүгчийг шалгаруулах AIBA Annual Awards and Forum –ын шагнал гардуулах ёслолын арга хэмжээ байлаа. Ёслолын арга хэмжээний үеэр бас оны шилдэг эмэгтэй тамирчин, шүүгч, дасгалжуулагчийг ч шалгаруулсан байна.

Шагналтанг тусгай шүүгчид тодруулсан бол нөгөө хоёр номинацийг АИБА болон шүүгчдийн комисс шалгаруулжээ.

Шилдэг боксчиныг зарлах үед санаанд оромгүй бөөн дуйлаан дагуулсан  явдал болсон хэмээн оросын мэдээллийн хэрэгслэлүүд цацаж байна. Юу гэвэл, Оны шилдэг боксчноор 57 кг-ийн жинд Бээжингийн олимпийн аварга мөн “Вэла Баркерын цом”-ын эзэн олимпийн тэмцээний хамгийн техниктэй боксчины шагналт Оросын тамирчин Василий Ломаченко болох ёстой хэмээн бүгд тооцож байжээ. Гэтэл Ломаченко гэмтлийн улмаас Москвагийн Дэлхийн Цомын тэмцээнд оролцож чадаагүй бөгөөд AIBA –ийн ерөнхийлөгч Чинг-Куо Ву оны Оны шилдэг боксчин шалгаруулах болзлын нэг нь энэ тэмцээн байсан хэмээн мэдэгдээд, Оны шилдэг боксчиноор 54 кг –ийн жингийн Монголын тамирчин Энхбатын Бадар-Ууганыг  тодруулснаа зарлажээ.