Үндэсний сагсан бөмбөгийн хол­бооны 2008-2009 оны хамгийн үнэ цэнэтэй тоглог­чоор Леброн Жеймс тодорч, Морис Подолоффийн нэрэм­жит шагнал хүртлээ. MVP-ийн шаг­налыг АНУ болон Канадын спор­тын сэтгүүлчдийн саналыг үндэс­лэн олгодог юм. Леброны араас Коби Брайант, Дуэйн Уэйд, Дуайт Ховард, Крис Пол нар  жагсав.

Леброн нэр алдарт хүрэх гараагаа эхэлсэн “St. Vincent-St. Mary” ахлах сургууль дээрээ шагналаа гардаж авах хүсэлт тавьсан байна. Түүний хүсэлтийг ёсоор болгожээ. Жеймс MVP болсон Кавальерсийн анхны тоглогч болж буй.

Зургаа дахь улиралдаа лигт тоглож байгаа тэрбээр таван улирал дараалан 2000-аас дээш оноо авсан лигийн түүхэн дэх ес дэх тоглогч болжээ. Тэрбээр энэ онд шилдэг шинэ тоглогч, хамгийн үнэ цэнэтэй тоглогчийн шагналыг  зэрэг авсан долоо дахь сагсчин боллоо.

Леброн Жеймс улирлын турш Олим­пийн хамтрагчид болох Коби, Уэйд нартай MVP-ийн төлөө өрсөлдсөн юм. “Тэр энэ гавьяаг байгуулсан. Би бүх л улирлын турш хэлж байсан. Миний бодлоор Леброн энэ жилийн лигийн MVP. Түүнийг жил бүр л энэ шагналыг авна гэж ярьдаг. Баг нь  энэ улиралд онцгой байсан” хэмээн гол өрсөлдөгч болох Д.Уэйд нь хэлжээ.

Леброн шагнал гардсаныхаа дараа “Зургадугаар сард өөр нэгэн баяр тэмдэглэхийг хүсэж байна”  гэж хэллээ. Мөн тэрбээр энэ шагнал багийнханд нь хамаатай, харин гэртээ хадгалах хүн нь л Леброн гэдгийг ч дурдсан юм. Леброн Жеймс багийнхнаа индэрт урьж, бүгдэд нь үнэтэй камер бэлэг­лэсэн байна