Өчигдөр Америкийн үндэсний сагсан бөмбөгийн холбооны улирлын найман тоглолт боллоо.

"Лос-Анжелос Лейкэрс"-ийн лидер Коби Брайант 61 оноо авч "Нью-Йорк Никс"-г 126:117-оор буулган авахад гол үүрэг гүйцэтгэлээ. Ингэснээр Коби энэ улиралд лигийн бүх тоглогчдоос нэг тоглолтод хамгийн өндөр оноо авчээ. Мөн тэрбээр 20 торгуулийн шидэлт хийж бүгдийг нь оруулсан энэ улирлын бас нэг дээд амжилт тогтоосон байна. Кобигаас гадна По Газоль 31 оноо багтаа нэмэрлэжээ. Сонирхуулахад, "нуурынхан"-ы гурван түлхүүр тоглогч нийлээд 102 оноо авсан бол бусад нь 24 оноо авсан байна.

"Финикс" энэ өдөр "Сакраменто"-д ямар ч боломж олгосонгүй. "Нарнууд" 48 онооны зөрүүгээр буюу 129:81 -ээр бут ниргэлээ. "Финикс"-ийн зөвхөн гарааны таван тоглогч л гэхэд "Сакраменто"-гийн нийт онооноос ч илүү оноо (82) авчээ.

"Мемфис"-ын шинэ цэрэг О.Жей. Майо 33 оноо авч "Вашингтон"-г 113:97-оор буулган авахад багтаа тус боллоо. Энэхүү ялалт нь "баавгайнууд"-ын энэ улирлын 12 дахь ялалт болсон бол "Вашингтон" 38 дахь ялагдлаа хүлээв.
 
Мөн "Клипперс" энэ улирлын 38 дахь ялагдлаа хүлээлээ. Тэд "Майами"-д 119:95-аар ялагдсан байна. "Майами"-гийн лидер Дуэйн Уэйд 32 оноо авч, есөн удаа самбараас бөмбөг авчээ.

"Нью-Орлеан" эхний гурван үеийн турш тэргүүлж яваад сүүлийн 12 минутад хэтэрхий тайвширсанаас "Портленд"-д 89:97-оор ялагдлаа. Крис Пол дабл-дабл (12 оноо+13 самбар) хийсэн ч тус болсонгүй.

"Юта" дараалсан дөрвөн ялагдлаа зогсоож "Шарлотта"-г 106:86-аар хожсон байна. "Юта"-гаас Мехмет Окур 23, Брювэр 21, Милсапп 14 оноо авчээ.

"Голден Стэйт"-ийн эсрэг "Сан-Антонио"-гийн лидерүүд Данкан, Жинобили, Паркер гурав 87 оноо авч, цаг сунган тоглосны эцэст 110:105-аар "Спэрс" ялалт байгууллаа. Үндсэн цаг дуусахаас найман секундын өмнө "Сан-Антонио" тоог тэнцүүлж, нэмэлт цагт талбайн эздээс илүү тогложээ.

Энэ өдөр мөн "Даллас" "Орландо"-г 105:95-аар буулган авлаа. "Орландо"-гийн лидер Ховард 35 оноо, 11 удаа самбараас бөмбөг авсан бол "Даллас"-ын Дирк Новицки 29, Жон Терри 23 оноо авчээ.