Өчигдөр анхны ардчилсан сонгуулийн 25 жилийн ой тохиож, ойн хүрээнд баярын хурал Шангрила зочид буудалд, Чингисийн хүрээ жуулчны баазад бэсрэг наадам зохион байгуулсан билээ.
Тэгвэл хэдийнэ эрийн цээнд хүрсэн Монголын ардчиллыг дэлхий дахин ийн дүгнэж, баярын мэндчилгээ илгээж байна.
БНСУ-ын Ерөнхийлөгч Пак Гын Хэ: Монголчууд ардчилсан нийгэмд цус гаргалгүй шилжсэн нь хамгийн хүчирхэг ардчиллын нэг болж чадсан. Эл жишээ Зүүн хойд азийн орнууд руу ардчиллын салхийг эргүүлж, энх тайвныг тогтоосон. Тиймээс ч Монголын ардчиллын нийгэмд шилжсэн үйл явц дэлхий дахинаа үлгэр дуурайл болсон юм.
Их Британийн гадаад хэргийн сайд Хюго Свайр: Өнөөдөр монголчууд анхны ардчилсан чөлөөт сонгуулийнхаа 25 жилийн ойг тэмдэглэж байна. Коммунизмаас ардчилсан тогтолцоо руу тайван замаар амжилттай шилжсэн нь бусад олон оронд сургамж, хичээл болсон. Их Британи Монгол Улсын тусгаар тогтнолыг 52 жилийн тэртээ хүлээн зөвшөөрсөн. Энэ олон жилийн хугацаанд бат найрамдлын харилцаатай байдгаараа бид их бахархдаг.
Олон улсын шинж чанартай чухал үйл явдлуудад идэвхтэй оролцож, ASEM-ын уулзалтыг зохион байгуулж буй нь дэлхий дахинд улам хүчирхэгжиж буйгаа бодитой харуулж байгаа гэж бодож байна.
Хонконг стандарт сонин: Монголчуудын 25 жилийн тэртээ анхны ардчилсан сонгуулиа зохион байгуулсан нь Орос, Хятад хоёр их гүрний дунд оршдог Монгол Улсын хувьд түүхэн чухал ач холбогдолтой үйл явдал болсон. 1990 оны хувьсгалын дараа тус улс зах зээлийн нийгэмд шилжиж, 13 удаа УИХ-ын болон ерөнхийлөгчийн сонгуулийг тайван зохион байгуулж, ард иргэд нь төлөөллөө сонгосон байдаг.
