Зууны мэдээ” сонины редакцийг нулимстай нүдтэй зорьж ирсэн эмэгтэйг хараад амнаас үг унасангүй. Хүүгийнх нь талаар бичих гэж байгаа хэрнээ асуулт асуухаас ч халширч байсан юм. Бидэнд хандсан эмэгтэйн хүү нь 12 настай. Нэрийг нь Д.Жигүүр гэдэг. Хүүгийн аав нисгэгч. Хөх тэнгэрт дүүлэн нисдэг бахархам мэргэжлээ хүүдээ өвлүүлнэ гэж утга төгөлдөр энэ нэрийг хайрласан бололтой.

Одоогоос гурван жилийн өмнө Д.Жигүүр хүүгийн бие гэнэт хавагнаад эхэлсэн байна. Тухайн үедээ бөөрний хурц үрэвсэлтэй гэсэн оношоор хэвтэн эмчлүүлсэн боловч өнгөрсөн оны есдүгээр сард бөөрний дутагдалд орчихож. Яагаад ийм жаахан хүүхэд бөөрний дутагдалд орсныг нь эмч нар гайхдаг боловч бөөр солиулахаас нааш аврал байхгүй гэдгийг санал нэгтэйгээр хэлжээ.

Ээж нь хүүдээ нэг бөөрөө өгнө гэнэ. Хүү нь л хөл дээрээ босч байвал хоёуланг нь өгсөн ч бэлэн гэлээ. Гагцхүү ээжийнх нь цусны бүлэг гурав, хүүгийнх нэг. Тиймээс бөөр солиулах хагалгааг Солонгос улсад хийлгэхээр болж. Манай улсад бөөр шилжүүлэн суулгах хагалгааг хийдэг боловч цусны бүлгийг өөрчлөх аргагүй. Тиймээс л Солонгос улсыг зорих шаардлагатай болсон юм байна.

Уг нь хүүд аав нь бөөрөө өгөх байсан. Адилхан нэгдүгээр бүлгийн цустай болохоор Улсын нэгдүгээр эмнэлгийн бөөр шилжүүлэн суулгах багийнхан хагалгаанд оруулахаар бэлдэж байжээ. Хэдийгээр манайд хүүхдэд бөөр шилжүүлэн суулгах хагалгаа хийж байсан туршлага үгүй ч эмч нар Д.Жигүүр хүүд зориулан зоригтой алхам хийхээр төлөвлөсөн байж. Гэвч энэ гэр бүлийг бурхан даанч харж үзсэнгүй. Хүүдээ өрөөсөн бөөрөө өгөхөөр төлөвлөж, аль хэдийнэ өгчихөөд хүү нь эрүүл болчихсон юм шиг баярлаж явсан нисгэгч аав нь энэ цагаан сарын өмнөхөн гэнэт нас баржээ.

Аав нь яагаад өнгөрчихөв гэж ээжээс нь асууж зүрхэлсэнгүй. Хамгийн гол нь тэр аав хүүдээ бөөрөө өгч амжсангүй. Ээж, хүү хоёр Солонгосыг зорихоос өөр аврал үлдсэнгүй. Тэдэнд 50 сая төгрөг л хэрэгтэй гэнэ. Өнөөдөр 50 сая төгрөг хэр их мөнгө вэ. Ханиа алдчихаад, араас нь хүүгээ явуулчихгүй гэсэндээ нулимсаа барьж ядан, тусламж эрж яваа энэ эмэгтэйг харахаар үнэхээр өрөвдмөөр.

Д.Жигүүр хүүгийн биеийн байдал тун тогтворгүй байгаа гэнэ. Даралт нь байнгын өндөр, зүрх нь савлана. Долоо хоногт гурван удаа дөрвөн цагаар гемодиализийн аппаратанд ордог. Бөөрний дутагдал нь аль хэдийнэ бусад эрхтэндээ нөлөөлөөд эхэлчихсэн. Аппаратанд орохгүй 3-4 хоноход л хүүгийн зүрх зогсох аюултай. Тоглож наадах насандаа гэрийнхээ, эсвэл эмнэлгийн орон дээр хүзүүндээ цус шүүлгэх гуурс хийлгэчихээд хэвтэж байгаа Д.Жигүүр хүүгийн мөрөөдлийг биелүүлэх сэн.

Мөрөөдөл нь тун энгийн. Тэр аав шигээ нисгэгч болохыг хүсдэг гэнэ. Сайн санаат хүмүүс минь түүнд туслаач. 50-хан сая төгрөгийг энэ бяцхан хүүд гаргаад өгөхөд тийм ч хэцүү биш болов уу. Бурхны орноос санаа нь зовоод харж суугаа аавынх нь хүүдээ өгч чадаагүй бөөрийг ээж нь өгөх гэж байна. Тэдэнд туслахыг хүссэн хүн бүр 150450 тусгай дугаарт мессеж бичээрэй. Таны бичсэн мессеж бүр хүүгийн авралын дансанд мөнгө болж орно. Хүүгийн ээжтэй холбогдох утас 89050620. ХААН банкны дансны дугаар нь 5031662383.                                           Б.Уран     ЭХ СУРВАЛЖ  http://news.gogo.mn/mr/118870