“Evento” ХХК, Монголын залуучуудын холбоо хамтран, дэлхий нийтийг байлдан дагуулж буй дуучид, хамтлагуудыг эх орондоо урьж авчран тоглуулах зорилт тавиад буй. Өнгөрсөн арванхоёрдугаар сард Данийн алдарт “Michael Learns to Rock” хамтлагийг авчирсан тэд энэ удаад “Backstreet Boys”-ыг урьж, Монголын шүтэн бишрэгчидтэй нь уулзуулахаар төлөвл өөд байсан юм. Төлөвлөгөө ёсоор бол “Арын гудамжны хөвгүүд” уржигдар манай эх оронд тоглох байсан ч бүтээгүй шалтгаан нь дэлхийн хэмжээний супер оддын дээгүүр зангаас бус “Буянт Ухаа” спорт цогцолборынхноос болжээ.

Манайдаа хамгийн томд тооцогдох эл үзвэрийн тамхимынхан товлосон өдрөө өөр арга хэмжээ зохиох болсон тул ийм байдалд хүрсэн байна. Дэлхийн сая сая хүмүүний зүрх сэтгэлийг байлдан дагуулсаар 20 жилийн ойтойгоо золгож буй “Backstreet Boys”-ыг Монголд тоглоно гэхэд хүн бүр баярлаж буй. Тийм ч учраас “Evento” компанийнхан уйгагүй хөөцөлдсөний эцэст ирэх зургадугаар сарын 15-нд “Буянт Ухаа” спорт цогцолборт бүрэн хэмжээний тоглолтыг нь зохион байгуулахаар болжээ.

Тус компанийн менежер Л.Батсүхээс энэ талаар тодруулахад “Зургадугаар сарын 15-нд “Backstreet Boys” хамтлаг Монголд тоглох нь үнэн. “Буянт Ухаа” спорт цогцолборт тэр өдөр бас л өөр арга хэмжээтэй байгаа ч сайдаар яриулсны эцэст асуудал нааштайгаар шийдэгдсэн. Тасалбарыг MLTR хамтлагийн тоглолтынх шиг карт хэлбэрээр борлуулна. Картан дээр BSB-ын гишүүдийн зураг байх учраас дизайнаа гаргаад тэдэнд явуулсан байгаа. Батлагдахаар нь картаа хэвлүүлнэ” хэмээв. Тоглолтын тасалбар дунджаар 100 мянган төгрөгийн үнэтэй байх бөгөөд суудлаасаа хамаараад өөр байх гэнэ.