Мэргэжлийн сүмогийн түүхэн дэх хамгийн “хар” башё өндөрлөж, сүмогийн холбоо цаашид яаж ажиллахаа шийдэх зав зай гарлаа. 1955 оноос тасралтгүй нөхөрлөсөн NHK телевиз энэ сарын тэмцээнийг дамжуулахаа больсноор ивээн тэтгэгч, спонсорууд нүүр буруулж, санх үүгийн хувьд хүнд цохилт амслаа. Цэнхэр дэлгэцээр компанийнхаа хаяг, барааг гаргаж чадахгүй хойно мөнгө өгөөд яах ч билээ.
Дээр нь бооцоонд оролцсон бөхчүүдээ барилдах эрхийг нь хассанаар тэмцээн ямар ч сонирхолгүй болон хувирсан гэхэд болно. Дэлхийн хоёрдугаар дайны үед америкчууд Токиог бөмбөгдөж байхад ч сүмогийн башё өнгөрсөн тэмцээний хажууд үзэгч ихтэй, сайхан болдог байсан гэнэ билээ.
Нагоя башёд ёкозүна Хакүхог зогсоох хүчтэн олдсонгүй. Болгарын Котоошюү, манай Харүмафүжи нар арай ядан 10 ялцгаасан бол озэки Барүто дөнгөж найм ялж, сүмогийн холбооны уурыг хүргэв. Харин таван тэмцээн дараалан 50 хувийн ам жилт үзүүлээгүй байсан Какүрюү 11 ялж, заан цолоо эргүүлэн авах тун дөхөөд байна. Хакүхогийн хувьд энэ тэмцээнд нэлээд хэдэн дээд амжилт шинэчлэн тогтоосон. Тэрбээр сүмогийн түүхэнд анх удаа гурван тэмцээн өвдөг шороодолгүй түрүүллээ.
Мөн 47 дараалан ялаад байгаа бөгөөд хэрэв намрын тэмцээнд үргэлжлүүлэн ялаад байвал тэмцээний зургаа дахь өдөр нь Чиёнофүжигийн 53 дараалсан ялалтын тоог давтах юм. Одоогийн байдлаар түүнд саад болох зүйл харагдахгүй байна. Харамсалтай нь энэ тэмцээнд шагнал байсангүй.
Хакүхо сэтгүүлчдэд “Хүртэх ёстой юмаа хүртэхгүй байна гэдэг хэцүү юм. Үндэсний спорт болохоор ядаж Эзэн хааны цом авах сан. Эзэн хааны цом гэдэг хэдэн удаа ч авсан дахиад авах хүсэл төрүүлдэг эд. Бодоод үз л дээ. Хэрэв энэ тэмцээнд хэн нэг бөх анх удаагаа түрүүлсэн бол цом ч үгүй яах болж байна” хэмээн гомдоллосон байна.
Нагоя тэмцээний дайчин бөхийн шагнал ыг Аран, Хоомашёо нар хүртсэн бол уран барилдааны шагналыг Какүрюү авлаа. Жюүрёод 13 ялалттай Масацүкаса, макүшитад ахмад бөх Жүмонжи, санданмэ зиндаанд Таканохана дэвжээний Такатоши, Жониданд Татэно, жонокүчид Монголын Аратоши хэмээх В.Цэрэндорж түрүүлсэн байна.
Ийнхүү хэл ам, хэрүүл шуугиан дагуулсан Нагоя башё дуусаж, ирэх сарын тэмцээнийг NHK дамжуулаасай гэж хүсэх л үлдлээ.
www.mongolnews.mn - Эх нутгийн чимээ
