Монгол эмч нарын “бүтээсэн” хуруу шилний хүүхэд дөрвөн сар хүрлээ
Уншсан 12257 vote 0 2013.04.01 17:03:21 
Янз
бүрийн эмгэг, өвчнөөс үүдэн хүүхэд төрүүлэх боломжг үй гэдэг онош
тавиулсан гэр бүл гадаадад үр шилжүүлэн суулгуулж, хүүхэдтэй болсон
тухай мэдээлэл монголчууд бидэнд холын юм шиг сонсогддог байв. Хуруу
шилний анхны хүүхэд 1978 онд Их Британид мэндэлжээ.
Харин манай улсын хувьд “Баянгол” эмнэлэг 2011 оны тавдугаар сард Германы “Modern Technology Germany” компаниас үр шилжүүлэн суулгах тоног төхөөрөмж оруулж ирснээр энэ технологи Монголд нэвтрэх боломж бүрдсэн байна. Тус эмнэлгийнхэн эхний ээлжинд судалгаа, шинжилгээ хийж байгаад өнгөрсөн оны хоёрдугаар сараас үр шилжүүлэн суулгаж эхэлсэн аж.
Монголын эмч, мэргэжилтнүүдийн бие даан үр шилжүүлсэн хуруу шилний анхны хүүхэд өнгөрсөн оны арванхоёрдугаар сарын 8-нд Сэлэнгэ аймагт мэндэлж, эдүгээ дөрвөн сартай, эсэн мэнд бойжиж байна. “Баянгол” эмнэлгийнхэн өнгөрсөн баасан гаригт дөрвөн сар хүрээд байгаа хуруу шилний анхны хүүхдээ эцэг, эхтэй нь хүлээн авч, хүүд насан туршдаа үнэгүй эмчлүүлэх эрх, 500 мянган төгрөгийн хадгаламж гардууллаа. Мөн Эрүүл мэндийн дэд сайд Ж.Амарсанаа баяр хүргэв. Тэрбээр “IVF (In Vitro Fertilization) буюу хуруу шилэнд үр тогтоохыг хүүхэд үйлдвэрлэх гэж буруу ойлгож болохгүй. Энэ бол олон оронд нэвтэрсэн, баталгаатай, найдвартай арга. Ялангуяа манайх шиг хүн ам цөөтэй улсад өндөр ач холбогдолтой. “Баянгол” эмнэлгийн хамт олон IVF технологийг анх нэвтрүүлж, үргүйдлийн эмчилгээнд маш том алхам хийлээ. Энэ хамт олонд баяр хүргэж, Монголын үрсийг улам олон болгоорой гэж хүсье” гэсэн юм.
Монголын хуруу шилний анхны хүүхдийн аав Л.БатЭрдэнэ, ээж Я.Эрдэнэтуяа нар хэдхэн хоногийн өмнө Сэлэнгэ аймгаас иржээ. Тэд “Баянгол” эмнэлгийнхэнд баярлаад баршгүй байгаагаа илэрхийлсэн. Ээж Я.Эрдэнэтуяа “Бид гэрлээд есөн жил өнгөрсөн ч хүүхэдтэй болоогүй. Янз бүрийн эмчилгээ хийлгэж, хүүхэдтэй болгож өгөхийг гуйж, үздэг хардаг гэх хүмүүс дээр очиж, бүхий л арга чаргаа хэрэглэсэн. Хэдэн жилийн өмнө нэг сэтгүүлээс Р.Хадбаатар эмчийн ярилцлагыг олж уншаад энэ эмнэлэгт ирэхээр шийдсэн. Жилийн өмнөөс үр шилжүүлэн суулгах эмчилгээ хийлгэж, ийм хөөрхөн хүүтэй боллоо” хэмээлээ.
Үр шилжүүлэн суулгах төвийн ахлах эмч С.Хөхий “Агаарын чанарыг шалгахын тулд өндөр хүчин чадалтай аппарат хэрэглэдэг. Аппаратуудаа Монголын цаг агаарын болон бусад нөхцөлд бүрэн нийцүүлснээр үр хөврөлийг чанартай өсгөж чаддаг болсон. Манай төвийнхөн давхардсан тоогоор 40 гаруй хүнд үр шилжүүлэн суулгаад байна. Амжилттай болсон анхны тохиолдол нь энэ” гэв.
“Баянгол” эмнэлгийн Үр шилжүүлэн суулгах төвийн их эмч Р.Хадбаатар “Энэ гэр бүл 2008 онд манайд дурангийн хагалгаанд ороод хүүхэдтэй болох боломжгүй гэсэн оноштой буцсан. Тэр үед манайд үр шилжүүлэн суулгах лаборатори байсангүй. Тэгээд анх лабораторитой болоход хамгийн түрүүнд ирсэн хүмүүсийн нэг нь эднийх. Одоо ч гэсэн хүүхдээ тээж байгаа нэлээд олон хүн бий. Манайд хандаж буй хүмүүсийн тоо хэдэн зуугаар тоологдохоор болсон. Манай төв сард найман хүн хүлээж авдаг” гэлээ. Одоогоор цөөхөн хүн хүлээн авч байгаа ч цаашид үйл ажиллагаагаа өргөжүүлж, илүү олон гэр бүлд туслах болно гэж тус төвийнхөн амлаж байв.
duu Hadbaatartaa ajilin amjilt husie