МҮСБХ-ны
Үндэсний супер лигийн “All Star Game” өнгөрсөн амралтын өдрүүдэд
боллоо. Анхны жилдээ зохион байгуулагдсан тус тэмцээн Спортын төв ордон,
“Буянт-Ухаа” спорт цогцолборыг дамнан явагдсан юм. Оддын тоглолтын
эхний өдөр буюу бямба гаригт “Танан гарьд”, “Энержи Ресурс Харцага”,
“Эрдэнэдрийлинг RIGS”, “Баянзүрх буллз”, “SBL Хүлгүүд”, “TLG 13”, “Эхлэл
MBM” багуудын шилдэг 30 тамирчин “Кола”, “Спрайт” хэмээх хоёр багт
хуваагдан халз тоглосон юм.
“Кола” багийн дасгалжуулагчаар Ү.Давхарбаяр, М.Амаржаргал нар ажиллаж бүрэлдэхүүнд нь О.Сэргэлэн, Антонио Жонс, Крис Лавсон, Ц.Азбаяр, М.Отгонмөнх, Б.Нэмэхбаяр, О.Ууганбаяр, Б.Билгүүн, З.Дэлгэрням, Б.Мөнхболд, Маркус Хаммондс, Б.Одбаяр, П.Болортуяа, Фредди Вудс, Дэвон Кларк, нар багтсан. Харин МУГТ Ц.Цэвэрбал, А.Энхбаатар нарын дасгалжуулсан “Спрайт” багт Т.Санчир, Б.Батжавхлан, А.Ганзүх, Д.Мөнхтүвшин, Ден Хадли, Б.Даваажав, Ш.Сэдбазар, Г.Цэнгүүнбаяр, Н.Золжаргал, Декори Жонс, Маркус Скиннер, Ди Андре Браун, Кэндрик Блэйк, С.Өрнүүнбилэг, Рафаэль Харрис нар тоглосон юм. Уг тулаанд “Спрайт”-ынхан эхнээсээ давамгайлсаар 110:101-ээр хожиж, бооцооны хоёр сая төгрөгийг өвөртөллөө.
Тоглолтын MVP буюу үнэ цэнэтэй тоглогчоор 22 оноо, 2 самбар, 1 оновчтой дамжуулалт гүйцэтгэсэн “Баянзүрх
буллз” багийн Декори Жонс шалгарч, БНХАУ-д болох NBA-гийн тоглолтыг
үзэх эрхээр шагнуулав. Дээр дурдсан тоглолтын нэгдүгээр үеийн
завсарлагаагаар багийн шидэлтийн тэмцээн боллоо. Тэмцээнд “Танан гарьд”,
“Эрдэнэдрийлинг” , “Харцага”, “Хүлгүүд” багийн тамирчид өрсөлдсөн юм.
Эхний үед “Танан гарьд” 56 секунд, “Эрдэнэдрийлинг” 1 мин 3 секундын
амжилтаар бусдыгаа хошуучлав. Шийдвэрлэх даваанд “Гарьд”-ын Антонио
Жонс, Б.Мөнхболд нар даалгавраа 40 секундэд амжуулснаар ялагч боллоо.
Тэд өрсөлдөгчөөсөө 23 секундын өмнө шидэлтүүдээ амжилттай болгосон юм.
Их завсарлагаагаар мэргэн буучдын дундах тэмцээн боллоо. Долоон тамирчин өрсөлдсөнөөс финалд Э.Цэвэлдорж, Б.Нэмэхбаяр, Н.Золжаргал, Ц.Азбаяр нар шалгарсан ба “Эрдэнэдрийлинг RIGS”- ийн Золжаргал боломжит 30 онооноос 23-ыг авч цом, 300 мянган төгрөгийн шагналын эзэн болов. Тэрчлэн холбон тоглогчдын ур чадварын тэмцээнд мөн л “Эрдэнэдрийлинг”-ийн Б.Батжавхлан 26 секундээр тэргүүлж, ивээн тэтгэгч “Хасу Мегаватт” компанийн нэрэмжит цомыг 500 мянган төгрөгийн хамт гардсан юм.
Ийнхүү “Эрдэнэдрийлинг” ямархуу ур чадвартай тоглогчидтой болохоо харуулав. Үзэгчдийн хамгийн хүсэн хүлээдэг цагариган дээрээс довтлох тэмцээнд зургаан легионер, хоёр монгол тоглогч өрсөлдсөн. Тэдгээр тоглогчдоос Декори Жонс хамгийн өндөрт дүүлж, гоёмсог үзүүлбэрүүдийг гүйцэтгэж байснаараа шүүгчдээс өндөр үнэлгээ авсан юм. Ийнхүү тэрбээр нэг үдэш хоёр цомын эзэн боллоо. Маргааш нь буюу ням гаригт “Буянт-Ухаа” цогцолборт Үндэсний супер лигт тоглож буй легионеруудын шигшээ Монголын сагсан бөмбөгчид халз тоглолоо. Ү.Давхарбаяр, М.Амаржаргал дасгалжуулагчтай манайхан эхний 12 минутад 28:22-оор илүүрхсэн ч дараагийн үед өрсөлдөгчөөсөө 13 оноо дутуу авч, 40:53-аар эхний хагас өндөрлөсөн юм. Энэ зөрүү гуравдугаар үед ч өөрчлөгдсөнгүй, америк легионерууд 77:84- өөр давамгайллаа.
Улмаар эцсийн дүнгээр 108:124-өөр ялагдал хүлээв. Уг тоглолтод Монголын шигшээ багаас Б. Одбаяр 27, Т.Санчир 23, М.Отгонмөнх 13, Н.Золжаргал 11, О.Ууганбаяр 8, легионеруудаас Кларк 17, Скиннер 16, Браун 16, Хаммондс 14, Блэйк 14 оноо авсан байна. Лавсон 14 оноо+10 оновчтой дамжуулалт гүйцэтгэж, дабл-даблийн эзэн болжээ. Сонирхуулахад манай Монголын шигшээ болон легионерууд 1992 оны “Мөрөөдлийн баг”-ийн өмсгөлөөр гангарсан байлаа.
