Арван сар тээж төрүүлсэн нялх үрээ идэр есийн жавар тачигнасан хүйтэн цагаар гадаа гудамжинд суулгаад, гуйлга гуйлгаж, олсон мөнгөөр нь амь зогоодог найман хүний талаар бид хэдхэн хоногийн өмнө мэдээлсэн. Хөлд ороогүй, ой тав сартай бяцхан хүүхдээр гуйлга гуйлгадаг тэр хүмүүс Чингэлтэй дүүргийн цагдаагийн ханд баригдаад хашраагүй аж. Үлдсэн хоёр хүүхдээрээ “Сансар” худалдааны төвийн урд гуйлга гуйлгаж байгаад Баянзүрх дүүргийн Цагдаагийн хэлтсийнхэнд саатуулагдлаа. Өчигдөр 13.00 цагийн үед Тус Цагдаагийн хэлтэст очиход Х.Нямхүү охин Н.Аззултайгаа байж таарав. Биднийг ороход охин буйдан дээр унтаж байсан юм. Түүний ээж Х.Нямхүүтэй ярилцлаа.

-Ой таван сартай хүүгээрээ гуйлга г уйлгаж байгаад биеийг нь өвтгөчихөөд хаширсангүй юү. Охиноороо хэзээнээс гуйлга гуйлгасан юм бэ?

-2008 оноос. 2010 оны есдүгээр сарын 1-нд цэцэрлэгт оруулснаас хойш гуйлга гуйлгаагүй.

-Аль цэцэрлэгт оруулсан юм бэ?

-Таньдаг эгч хөөцөлдөж байгаад Гачууртад байдаг 63 дугаар цэцэрлэгт оруулж өгсөн.

-Ой таван сартай хүүгийнхээ тарчилж байж олсон мөнгөөр та нар наймуул амьдардаг байсан. Хүүг чинь аваад явчихаар одоо охиноо цэцэрлэгээс нь гаргаад мөнгө олуулж байгаа хэрэг үү?

-Автобусны мөнгөгүй болчихоод цэцэрлэгт нь хүргэж өгөж чадахгүй гурав хонож байна. Өмнө нь бас нэг удаа ингэж байсан.

-Хүү чинь өдөрт хэдэн төгрөг олдог байсан бэ?

-8000-10.000 төгрөгтэй ирдэг байсан. Хоосон ирэх удаа ч бий.

-Тэрүүгээр нь юу авдаг вэ?

-Хоёр шуудай нүүрс, нэг шуудай мод, жаахан гурил, цувдай, төмс, талх авдаг. Дүүг амаржихад сүү, шар будаа, уян зүү авсан. Охиноороо гуйлга гуйлгадаг байхад олсон мөнгийг нь ээжийнхэ эмчилгээнд зарцуулсан.

-Та нар өөрсдөө ажил хийхэд яадаг юм бэ?

-Манай нөхөр цахилгаачин ч мэргэжлээрээ ажиллах дургүй. Уг нь хамгаалагчаар ажилладаг, тэрэндээ дуртай байсан. Даанч алба нь татан буугдаад ажилгүй болсон. Нэг найз нь өөр албанд ажилд оруулж өгнө гэчихээд сураггүй болчихсон. Манай нөхөр ажилд орно гээд хүлээгээд байсан.

-Чи ажил хийж чадах уу?

-Үйлчлэгч, цэвэрлэгчийн ажил хийж чадна. Сансрын 41 дүгээр байранд жижүүр хийж байсан. Бие өвдөөд, дээрээс нь орцны гэрэл алдчихсан чинь халчихсан.

-Дахиад хүүхдээрээ гуйлга гуйлгах юм биш биз?

-Үгүй. Дүүдээ “Хүүхдээсээ салах гээгүй л бол боль” гэж сайн захина. Тус дүүргийн Цагдаагийн хэлтсийн хүүхдийн байцаагч, дэслэгч Д.Отгонбаяр “Х.Нямхүүгийн дүү нь хоёр сартай хүүгээ тэвэрчихсэн, Н.Аззулыг дагуулаад гуйлга гуйж байхад нь өчигдөр саатуулсан юм. Эд бичиг баримт, оршин суух хаяггүй. Гэр түрээсэлж амьдардаг. Өмнө нь Сансрын нүхэн гарцны орчимд ой таван сартай хүүгээ суулгачихаад гуйлга гуйлгадаг байсан.

Манай цагдаа нараас зугтаад “Цэцэг” төв, “Мөнгөнзавьяа” орчимд суулгадаг болсон байна лээ. Тэндхийн цагдаад баригдаад буцаад манай дүүрэгт ирсэн. Өчигдөр охиныг нь асрамжийн газар аваачиж усанд оруулж, хувцсыг нь сольсон” гэв. Д.Отгонбаяр дэслэгч Хүүхдийн түргэн тусламж дуудсанаар 13.39 цагт эмч ирж үзээд “Ханиад нь хүндэрч, бронхит болсон байна” гэж оношиллоо. Ээж нь ч бас ханиалгаж байсан юм. Тэрбээр салхинцэцэгтэж, хамаг биеэр нь юм туурчээ.

Эмчийн бичиж өгсөн эмийг авч өгөхөд ээж, охин хоёрын нүд гэрэлтээд явчих шиг санагдсан. Ээжийнхээ мөөмийг хөхөж байсан охинд печень өгөхөд баярлан, хүүхдийн зангаар ухасхийн авлаа. “Цэцэрлэгт явах гоё уу. Ээж, аав чинь дахиад чамаар гуйлга гуйлгах гэвэл үгүй гээрэй за юу” гэхэд охин толгой дохив. “Ажил хийж чадна. Дахин хүүхдээ буруу замд хөтлөхгүй” хэмээн ярьж буй энэ эмэгтэй, түүний гэр бүлийнхэн өөр ямар нэг буруу хэрэгт орооцолдож байгаагүй юм билээ.