2009-2010 оны хичээлийн жилийн зорилгыг "Монгол Улсын боловсролыг 2006-2015 онд хөгжүүлэх Мастер төлөвлөгөө", Боловсролын салбарт хэрэгжүүлж байгаа Үндэсний хөтөлбөрүүд, Засгийн газрын үйл ажиллагааны хөтөлбөрийн зорилтуудыг үндэслэн "НЭГЖ ХИЧЭЭЛИЙН БЭЛТГЭЛ, ҮР ӨГӨӨЖИЙГ НЭМЭГДҮҮЛЭХ" стратегийг сонгож, сургалт, хүмүүжлийн ажлын агуулга, арга зүйн уялдаа холбоог хангах хүрээнд дараах зорилтыг дэвшүүлж байна.

Хичээлийн жилийн зорилтыг сонгосон стратегийн хүрээнд хэрэгжүүлэхийн тулд санхүү, материаллаг нөөцөөс илүүтэйгээр шинэ зохицуулалт бүхий эрх зүйн шинэ орчинд албан тушаалтан бүрийн үүрэг хариуцлагыг дээшлүүлж, хүний нөөцийн чадавхийг дайчлан технологийн дэвшлийг ашиглахад түлхүү анхаарна.

Сургуулийн өмнөх болон бага, дунд боловсролын салбарт:
1. "Монгол улсын Мянганы хөгжлийн зорилтод суурилсан үндэсний хөгжлийн цогц бодлого (2007-2021 он)-ыг хэрэгжүүлэх зорилтын хүрээнд "Монгол Улсын Боловсролыг 2006-2015 онд хөгжүүлэх Мастер төлөвлөгөө"-нд дунд шатны үнэлгээ хийж нарийвчлан боловсруулж, "Боловсрол" үндэсний хөтөлбөрийг батлуулан хэрэгжилтийг зохион байгуулна.

2. Сургуулийн өмнөх боловсролын эрх зүйн шинэчлэлийг эрчимжүүлж, бага насны хүүхдийг хөгжүүлэх сургалтын агуулга, арга зүй, үнэлгээний тогтолцоог боловсронгуй болгох ажлыг зохион байгуулна.
a) "Сургуулийн өмнөх боловсролын тухай хууль"-ийн хэрэгжилтийг эрчимжүүлэх ажлыг үндэсний, орон нутгийн, нэгж байгууллагын түвшинд зохион байгуулна.
b) "Бага насны хүүхдийн хөгжлийн стандарт"-ыг боловсруулан батлуулж, 2009-2010 оны хичээлийн жилээс мөрдөж эхэлнэ.
c) "Сургуулийн өмнөх боловсролын сургалтын орчны стандарт"-ыг боловсруулан батлуулж, хэрэгжүүлж эхэлнэ.
d) Бага насны хүүхдэд сургуулийн өмнөх боловсрол эзэмшүүлэх хувилбарт сургалтын агуулга, арга зүй, үнэлгээг сайжруулахад чиглэсэн "Хувилбарт сургалтын хөтөлбөр"-ийг хэрэгжүүлэх ажлыг үндэсний хэмжээнд зохион байгуулна.
e) "Бага насны хүүхдийн сургуульд бэлтгэгдсэн байдлын шалгуур үзүүлэлт"-ийг хэрэгжүүлэх ажлыг зохион байгуулна.

3. Ерөнхий боловсролын сургуулийн мэргэжлийн багшийн хангалтыг 0,6 хувиар нэмэгдүүлж, 98 хувьд хүргэнэ.

4. 2008-2009 оны хичээлийн жилд суралцагчдын хамран сургалтын бохир ба цэвэр жинг дор дурьдсан хувиар ахиулж, товлосон түвшинд хүргэнэ.

5. Бага, суурь, бүрэн дунд боловсролын стандартад хоёр дахь шатны үнэлгээ хийж, боловсролын стандартыг боловсронгуй болгон шинэчлэх төлөвлөгөө боловсруулан хэрэгжүүлж эхэлнэ.

6. Сургууль завсардалтын хувийн жинг 2008-2009 оны хичээлийн жилд 1,2 хувь байсныг 1,0 хувь болгон бууруулж, нийт сургууль завсардалтын бага боловсрол дахь эзлэх хувийг 20 хувиар бууруулна.

7. Ерөнхий боловсролын сургуулийн сургалтыг 11 ба 12 жилийн сургалтын төлөвлөгөө, хөтөлбөрөөр зэрэгцүүлэн чанартай зохион байгуулна. Үүнд:
a) Ерөнхий боловсролын сургуулийг 12 жилийн тогтолцоонд шилжүүлэх графикийн дагуу холбогдох ангиудын сургалтын төлөвлөгөө, хөтөлбөрийг шинээр боловсруулах ажлыг үргэлжлүүлж, 12 жилийн сургалтын төлөвлөгөө, хөтөлбөрөөр 1 ба 2 дугаар анги хичээллэж, 3 ба 8 дугаар ангийн сургалтын төлөвлөгөө, хөтөлбөрийг боловсруулан туршиж батлуулна.
b) Ерөнхий боловсролын сургуулийн 11 жилийн сургалтын төлөвлөгөө, хөтөлбөрөөр 2-11 дүгээр бүх анги хичээллэнэ.
c) Шилжилтийн 7 дугаар анги шилжилтийн тусгай төлөвлөгөө, хөтөлбөрөөр хичээллэнэ.

8. Сургуулийн номын сангаар дамжуулан ерөнхий боловсролын 12 жилийн сургуулийн бага ангийн сурагчдын 100, 11 жилийн сургуулийн бага ангийн сурагчдыг 80 хувь, дунд, ахлах ангийн сурагчдын 40 хүртэл хувийг тус тус 2009 онд шинээр зохиосон болон дахин хэвлэсэн, казак хэл рүү орчуулсан нийт 25 нэр төрлийн сурах бичгээр хангах ажлыг хичээлийн жилийн өмнө багтаан зохион байгуулна.

9. Сургуулийн номын сангаар дамуулан сурагчдад үнэгүй хэрэглүүлэх дээрх бүх сурах бичгийн хуваарилалт, түгээлт, ашиглалтад тогтмол хяналт-шинжилгээ хийж, сурах бичиг хангамжийн талаар баримталж буй бага ангийн сурагч бүр хичээл бүрээр сурах бичигтэй байх, дунд, ахлах ангийн сурагчдыг өрхийн амьжиргааны түвшнээс хамааруулан үнэгүй хэрэглэх сурах бичгээр хангах, эрэлтэд нийцсэн сурах бичиг худалдан авах боломжийг бүрдүүлэх бодлогын хэрэгжүүлэх арга механизмыг бий болгож хэрэглэнэ.

10. Боловсролын сургалт, хүмүүжлийн ажлын агуулга, арга зүйн уялдаа холбоог сайжруулах талаар өнгөрсөн хичээлийн жилд дэвшүүлсэн зорилтыг хэрэгжилтийг эрчимжүүлэхийн тулд нэгж хичээлийн бэлтгэл, хэрэгжилт, үнэлгээний чанар, үр өгөөжийг дээшлүүлэх талаар шинээр батлагдсан хууль, тогтоомжид нийцүүлэн үйл ажиллагааныхаа менежментэд шинэчлэл хийнэ. Үүнд:
a) Тухайн шинжлэх ухаан болон ажил үйлчилгээний судлагдахуунд суурилсан боловсролын агуулгыг цогц чадамжид суурилсан боловсролын агуулга болгон хувиргаж, мэдээлэл дамжуулах арга зүй бүхий технологийг мэдлэг бүтээлгэх арга зүй бүхий технологи болгон шинэчлэх ажлын хүрээнд багш нар ЗАН, багаар ажиллаж, сургууль бүрд хичээл бүрээр 1-ээс доошгүй шинэ арга зүйг хамтран бүтээж, сургалтдаа нэвтрүүлнэ.
b) Сургалтын технологийн шинэчлэл хийхийн тулд батлагдсан хууль тогтоомжийн дагуу багшийн ажлын агуулга, бүтэц, норм норматив болон тэдний ажлыг төлөвлөх, үнэлэх, урамшуулах эрх зүйн шинэ зохицуулалт бүхий шинэ менежментийг сургалтад нэвтрүүлнэ.
c) Дээрх чиглэлээр үндэсний, орон нутгийн болон сургалтын байгууллагад ажилладаг албан тушаалтан бүрийн үүрэг хариуцлагыг тооцож ажиллана.

11. Бүх шатны сургууль, цэцэрлэгийн багш бүр мэргэжлийн ёс зүйн хэм хэмжээг чанд мөрдөж, мэргэжил дээшлүүлэх шинэ тогтолцооны хүрээнд зохион байгуулах үндэсний болон орон нутаг, сургуулийн түвшний сургалтуудаас оновчтой зөв сонголт хийж, өөрийн ур чадвараа бодитой ахиулах, сургуулиудад хүргэгдсэн ном, гарын авлага, зөвлөмжийг нягтлан судалж, өөрийн үйл ажиллагаандаа бүтээлчээр хэрэгжүүлэх

12. Боловсролын нийгмийн ажилтнууд ажлын байрны шинэ тодорхойлолтод заагдсан чиг үүргээ гүйцэтгэж, хүүхдийн сурах, хөгжих, хамгаалуулах, оролцох эрхийг нь баталгаажуулахад чиглэсэн сургуулийн нийгмийн ажлын үйлчилгээг мэргэжлийн түвшинд явуулна.

13. Сургуулийн үйлчилгээтэй холбоотой мэдээллийн ил тод байдлыг хангаж, үйл ажиллагааг төлөвлөх, хэрэгжүүлэх, үнэлж дүгнэх менежментийг эцэг эх, сурагчид олон нийтийн бодит оролцоог хангах чиглэлээр шинэчилнэ.

14. Боловсролын хүртээмж, чанар, үр ашгийг хэмжих үзүүлэлтийг тооцох арга зүй, мэдээлэлд дүн шинжилгээ хийх, хөгжлийн хэтийн чиг хандлагыг тодорхойлох чадварт аймаг, нийслэлийн Боловсрол, соёлын газрын мэргэжилтнүүдийг сургаж, боловсролын мэдээлийн шинэ баазыг бүрдүүлнэ.

15. Ерөнхий боловсролын сургуулийн "Үдийн цай" хөтөлбөрийн чанар, үр өгөөжийг сайжруулж, хот хөдөөгийн зарим сургуулиудад "Үдийн хоол" хөтөлбөрийг туршиж дүгнэлт гаргана.