Дэлхийн хамгийн алдартай шоуны нэг “Got talent” шоу Азид зохион байгуулагдаж байгаа бөгөөд “Asia s got talent” шоу нь энэ оны гуравдугаар сарын 12-ноос AXN телевизээр Азийн 20 гаруй улс оронд зэрэг цацагдаж эхэлсэн билээ.  

Тус шоунд Азийн улс орнуудаас мянга мянга оролцогчид ирж оролцсоноос "Хөсөгтөн" хамтлаг  сая сая үзэгчид болоод эрхэм шүүгчдэд Монгол ардын урлагийн гайхамшгийг мэдрүүлж тэднийг бишрүүлээд авсан бөгөөд шүүгчдээс санал нэгтэйгээр "Тийм" гэсэн үнэлгээг авч хагас шигшээд шалгаран үлдсэн билээ. 

Тэгвэл шилдэг есөн оролцогч шалгаруулах санал асуулга өнгөрсөн сарын 23-27-ны өдрүүдэд явагдаж, дүнгээ гаргасан. Санал асуулгын дүн гарахад “Хөсөгтөн” хамтлаг шилдэг есд үлдэж, гайхалтай амжилт үзүүлсэн. 

Харин шоуны шилдгийг шалгаруулах сүүлийн шатны шийдвэрлэх мөч өчигдөр болж, “Хөсөгтөн” хамтлагийнхан маань дэд байрт шалгарсан амжилттайгаар энэ өдрийг эхлүүлж байна. 

Тус шоунд “Хөсөгтөн” хамтлагийн залуус морин хуурч, хөөмийч В.Батзориг, лимбэчин, цохиур хөгжимчин, хөөмийчин Г.Адъяадорж, товшлуурч, хөөмийч, дунд хуурч Х.Уламбаяр, их хуурч, хөөмийч Д.Ариунболд, ятгачин, дуучин Ч.Амарбаясгалан, морин хуурч, хөөмийч О.Чулуунбаатар гэсэн бүрэлдэхүүнтэй оролцсон юм.

Сошиал ертөнцөөр энэ баярт мэдээ тарж, залуус маань “Авъяаслаг Азичууд-2015” шоунд хоёрдугаар байрт шалгарсан "ХӨСӨГТӨН" хамтлагийнхандаа баяр хүргэж гурав хоног "ХӨСӨГТӨН" хамтлагийнхаа зургаар гоёцгооё аяныг зарласан байна.