Кюүшюү башёод оролцохоор Фүкүокад ирээд байгаа ёкозүна Хакүхо Кюүшюүд Монгол-Японы эв найрамдлыг бэлгэдсэн хөшөө барих төлөвлөгөөтэй байгаагаа зарлалаа. Энэ жил тохиож байгаа Монгол-Японы дипломат харилцаа тогтоосны 40 жилийн ойд зориулан, Хубилай хааны цэрэг 1274, 1281 онд Японд довтлохдоо бууж байсан Хаката буланд барих гэнэ. Ирэх жилийн арваннэгдүгээр сард дуусгах энэхүү хөшөөг Кюүшюүгийн алдарт барималч Накамүра Шинбаши хийх бөгөөд Хубилай хааны цэрэг биш гар барин зогсож байгаа сүмо бөх, монгол үндэсний бөхчүүдийг дүрслэх аж.

Ёкозүна Хакүхо сүүлийн үед “Шикорояма” дэвжээний монгол бөх Сэйро хэмээх А.Өнөболдтой бэлтгэл их хийж байгаа гэнэ. Сэйро Д.Амгаа зааны хүү бөгөөд энэ тэмцээнд макүшитагийн 2 дээр эрэмблэгдэн цол авахад ойрхон байгаа. Хакүхо “Цолтой болоход ганцхан алхам л үлдээд байгаа залуу. Энэ боломжийг ашиглаад жюүрёод дэвшиж чадвал хамт бэлтгэл хийсний ач тус гарлаа гэсэн үг. Биднийг макүшитад байх үед ёкозүнатай хамт бэлтгэл хийнэ гэж толгойд ч орж ирдэггүй байлаа” гэж сэтгүүлчдэд ярьсан байна.

ГАНЦХАН ШИНЭ БӨХ

Энэ сарын 11-нд эхлэх Кюүшюү башёогийн шинэ бөхчүүдийн шалгалт 1-нд болсон ч гайхалтай нь ганцхан хүү элсэхээр ирсэн байна. 1999 оны арваннэгдүгээр сард хоёрхон шинэ бөх орж байсан бөгөөд 2007 оны Нагоя башёод ганц ч хүн ирээгүй аж. Мэргэжлийн сүмогийн холбооноос шинэ бөхчүүдийг зиндаа тогтоох барилдаан хийлгэдэг ч энэ удаад барилдах өрсөлдөгч гарахгүй нь. 2012 онд нийтдээ 55 залуу сүмогийн эгнээнд орсон нь өнгөрсөн жилийн 60-ыг давсан анти рекорд боллоо. Холбооноос энэ жилийн тавдугаар сараас эхлэн сүмо бөхийн шалгалтын хэмжүүрийг 173 см өндөртэй, 75 кг-аас хүнд байсныг 167 см, 67 кг болгож буулгасан ч үр дүнд хүрэхгүй л байна. Энэ жил 51 бөх зодог тайлснаас харахад удахгүй гарах бөхийн тоо орох бөхийн тооноосоо илүү болох шинжтэй.