Хүлэг баатруудаараа хамгаалуулсан эзэн Чингис хааны хөшөө өнөөдөр урьд урьдынхаасаа илүү сүрлэг харагдана. “Монголын нууц товчоо” судрын хэсэг, өөрийнх нь хэлсэн мэргэн үгсийг чанга яригчаар уянгалуулан уншихыг сонсож, хаантайгаа хамт зургаа татуулахаар бужигнаж байгаа олныг хараад чухам юу бодож байгаа бол. Найман зууны тэртээд төвхнүүлсэн Монгол Улсынхаа, монголчуудынхаа өнөөдрийн төрх, байдлыг хараад бодож, тунгаасан, хэлэхийг хүссэн захиас үг мундахгүй л байгаа болов уу. “Тэнгэрлэг эзэн Чингис хаан” үзэсгэлэн өчигдөр Монголын төрийн түүхийн музейд нээлтээ хийж, Төрийн ордон руу орохдоо хаандаа хүндэтгэл үзүүлэн мэхийн ёслох зуур ийнхүү бодлоо.

1221 онд Бухар, Газна хотод цутгасан “Чингис хаан. Аугаа их. Эрхмийн дээд” гэсэн бичигтэй Чингис хааны алтан зоосноос эхлээд Шахрух хааны үеийн 1447 оны мөнгөн зоос хүртэл Монголын үе үеийн хаадын оршин тогтнож байсныг гэрчлэх эд өлгийн зүйлсийг дэлгэсэн эл үзэсгэлэнг нээж Ерөнхий сайд Н.Алтанхуяг “Монгол гэдэг нэр, монгол дархлаа, монгол цус хэзээ, хаанаас эхэлснийг хойч үеийнхэндээ хэлж, мэдрүүлэх нь энэ удмын хүн бүрийн үүрэг байх ёстой. Чингис хаан зөвхөн дайтаж, тулалдаж яваагүй. Тэр хүн даяаршлыг үндэслэгч юм” хэмээсэн.

Тэрбээр хэдэн зууны тэртээд их хааныхаа удирдлага дор монгол хүн морьтойгоо ямар их хурдтай, хүчтэй байсныг онцлоод, тэр үеийн их хурдыг өнөө үед эргүүлэн сэргээвэл бид улам өсөж дэвжинэ гэлээ. Төрийн ордон дахь Монгол төрийн түүхийн музейд морилсон “Тэнгэрлэг эзэн Чингис хаан” өдөр бүр ард иргэдээ үнэ төлбөргүй хүлээн авч, дэлхийн талыг эзэлж явсан их түүхээрээ аялуулах юм билээ.

Ирэх арваннэгдүгээр сарын 14-нд Чингис хааны мэндэлсний 850 жилийн ой тохиох бөгөөд энэ үеэр Монголын бусад музейнүүдэд хадгалж буй их хааны түүхтэй холбоотой эд өлгийн зүйлсээр мөн үзэсгэлэн гаргах юм байна.