Бичлэгийн тоо 33
Болт Пауэллыг яллаа Өнгөрсөн бямба гаригт болсон Ямайкын олимпийн сонгон шалгаруулах хөнгөн атлетикийн тэмцээн дэлхий нийтийн анхаарлын төвд байлаа. Энэ өдөр 100 метрийн зайн дэлхийн дээд амжилтын өмнөх болон өдгөөгийн эзэмшигчид халз тулсан юм. Сар гаруйхны өмнө нутаг нэгтнийхээ эзэмшиж байсан дэлхийн дээд амжилтыг шинэчилсэн Усайн Болт энэ удаа мөн илүүгээ харуулж түрүүллээ. Тэрбээр 9,85 амжилт үзүүлсэн бол Пауэлл 0,12 секундээр хоцорчээ. Гэй АНУ-ын рекордыг давтав АНУ-ын ойрын зайн гүйлтийн шинэ од Тайсон Гэй дотоодын олимпийн сонгон шалгаруулах тэмцээний хагас шигшээ уралдаанд улсынхаа рекордыг давтжээ. Нэгэн үе 9.77 секундээр дэлхийн дээд амжилтыг эзэмшиж байсан Морис Гриний үзүүлэлтэд тэр энэ өдөр хүрсэн байна. Болгарын хүндийг өргөгчид Бээжинд очихгүй Олимпийн багийн 11 тамирчин нь сэргээшийн шалгалтад бүдэрсний дараа Болгарын хүндийг өргөлтийн холбоо “Бээжин-2008” олимпийн наадамд оролцохгүй гэсэн шийдвэрийг гаргалаа. Зургадугаар сарын 8-9-нд болсон тэмцээний үеэр авсан сорьцоос найман эрэгтэй, гурван эмэгтэй туйванчийн шинжилгээ сэжигтэй гарчээ. ийнхүү олимпийн хүндийг өргөлтийн тэмцээний хамгийн хүчтэй өрсөлдөгч болох болгарчууд нанхиадын нийслэлд наадах эрхгүй боллоо. Америк теннисчдийн нэр тодорлоо АНУ-ын теннисний холбоо “Бээжин-2008” олимпийн наадамд оролцох багаа танилцууллаа. Эмэгтэйчүүдийн багт эгч дүү Уильямс болон Линдсей Дэвенпорт нар нэрлэгдсэн ба дан хосын төрөлд Серена-Венус, Лизель Хуберт-Дэвенпорт нар өрсөлдөх аж. Харин эрэгтэйчүүдийн багт Жеймс Блэйк, Сэм Куэрри, Робби Жиненри нар багтжээ. Эрэгтэйчүүдийн хосод Боб, Майк Брайан болон Блэйк, Куэрри нар хамтран тоглоно. Америкчууд 1988 оноос хойш олимпийн теннисний тэмцээнээс 15 медаль авсан нь бусад улсуудын хүртсэн медалийг нийлүүлснээс их юм. Сонирхуулахад “Сэм авга”-ын эмэгтэй теннисчид бүгд олимпийн аварга болж байсан. Писториусын боломжийг сунгав Өмнөд Африкийн хиймэл хөлт гүйгч Оскар Писториусын олимпийн сонгон шалгаруулалтын хугацааг долдугаар сарын 17 хүртэл сунгажээ. Энэ хүртэл түүнд 400 метрийн олимпийн норматив 45,55 секундын хугацааг биелүүлэх дөрвөн боломж буй аж. Писториус нь Спортын Арбитрийн шүүхээс гаргасан шийдвэрээр зохих болзлыг нь биелүүлбэл олимпийн наадамд оролцох эрхийг авсан билээ. Шараповагаар туг бариулахгүй ОХУ-ын шилдэг теннисчин Мария Шарапова “Бээжин-2008” олимпийн наадмын нээлтийн ёслолд улсынхаа тугийг барьж жагсах хүсэлт тавьсан ч тус улсын теннисний холбооны ерөнхийлөгч Шамиль Тарпицев татгалзсан хариу өглөө. Тарпицев “Түүнийг нээлтийн ёслолд 3-4 цагийн турш туг бариулж ядраамааргүй байна. Тэр тоглолт бүрт эрч хүчтэй гарах ёстой” хэмээн өөрийн шийдвэрээ тайлбарлажээ. Эмэгтэйчүүдийн теннист ноёрхлоо тогтоосон орос бүсгүйчүүдээс Шарапова, Кузнецова, Дементьева, Сафина нар Бээжинд өрсөлдөх юм. |
www.mglclub.com Administrator
- Холбоотой бичлэг :
- http://www.mglclub.com/469456/78f/trackback
