-Та нэлээд жин нэмчихээ юу даа?
-Тийм ээ. Ажил гэж гүйсээр байгаад тураах төвөөр үйлчлүүлж чадахгүй байна. Гэхдээ би өвөл фитнесст явсан, яваагүй турчихдаг юм. Харин зун болохоор таргалчихдаг.
-Одоо шинэ кинон дээрээ ажиллаад завгүй байна уу?
-Манай продакшн хөгжилтэй залуусын хайр сэтгэлийн сэдэвтэй кино хийж байгаа. Зураг авалт амжилттай хийгдэж дууссан. Одоо дуу хөгжим монтажныхаа ажил дээр явж байна.
-Таныг их хөгжилтэй хүн гэдэг. Ер нь ч урлагийн хүмүүс хөгжилтэй байж үзэгчдийг өөртөө татна байх. Тийм үү?
-Хүн хүн өөрийнхөөрөө л хүлээж авч, дүгнэдэг байх даа. Зарим нь яравгар гэж байхад зарим нь хөгжилтэй дандаа инээж явдаг л гэдэг юм. Тухайн цаг үед сэтгэл догдолсон эсвэл хөнгөн гунигтай байсан уу түүгээрээ л нүүр царайны хувирал илэрдэг байх. Оюутан байхад ангийнхан маань, бас багш нар дандаа инээмсэглэж явдаг гэж ярьдаг байсан. Харин одоо заримдаа уцаарладаг болчихоод байгаа. Ер нь би хүмүүсийг нүд дүүрэн инээмсэглэлтэй яваасай гэж хүсдэг. Гэвч одоо гудамжаар явж байгаа хүмүүс ихэнхдээ хөмсөг зангидсан дүнсгэр шаналсан царайтай харагдах болж. Энэ нь надад гунигтай санагддаг. Амгалан тайван, сайхан инээмсэглэсэн хүний хажуугаар өнгөрехөд дагаад сэтгэл санаа сайхан болчихдог шүү дээ. Түүн шиг бие биедээ зөв энерги, халуун дулаан сэтгэл хайрлаж байх нь зүйтэй юм болов уу гэж боддог.
-Та урлагийн сайхан бүсгүйчүүдийн нэг. Сайхан эмэггэй гэж таны бодлоор ямар эмэгтэйг хэлэх вэ?
-Сайхан гэдэг үг агуулгынхаа хувьд ергөн ойлголт л доо. Зөвхен царай зүс, бие хааны сайхнаар хэмжигдэхгүй. Мэдлэг, боловсрол, дотоод сэтгэхүй, соёл хүмүүжил, зан төрх энэ бүгд цогц бүрдэж сайхан гэдэг үгний утга учрыг илэрхийлдэг болов уу.
-Та нэг их буддаггүй юм аа даа. Урлагийнхныг энгэсэгнээс ангид бодож боломгүй санагддаг?
-Надад будах тусам овор нэмдэг юм шиг санагддаг. Ер нь манай удамд буддаг хүн нэг их байгаагүй. Хэрэв ээж маань их буддаг байсан бол магадгүй дагаад өдөр болгон будах байсан байх. Гэхдээ бид орой болгон тоглолт дээр будах шаардлага гардаг шүү дээ. Тиймээс хааяа нүүрээ амраах хэрэгтэй.
-Бүсгүйчүүд өтөлж хөгшрөхөөс айдаг. Гэхдээ урлагийнхан залуу насаа хадгалсан овор багатай байх юм. Энэ нь ажил мэргэжилтэй холбоотой юм болов уу?
- Жамын юм жамаараа л явна. Өтөлж хөгшрөх нь хорвоогийн жам. Түүнээс гажих ёсгүй. Залуу байхдаа хүний нүдэнд аятайхан харагддаггүй хэрнээ хөгшрөөд сайхан харагддаг хүмүүс байдаг шүү дээ.
-Таны хэлэх дуртай үг тань?
-Санаа зөв бол заяа зөв гэхчлэн бэлэг дэмбэрэлтэй сайхан үгнүүд олон байна. Энэ үгийг би байнга охиндоо хэлдэг. Хүн юмыг дандаа болж бүтнэ гэж өөдрөг сэтгэлээр бодож явбал болж бүтэхгүй юм үгүй. Тэр хэмжээгээр амьдрал, ажил үйлс тэгширч бүх юм зөвөөр эргэх магадлал өндөр байдаг гэж боддог.
-Эцэг, эхчүүд хүүхэддээ мэргэжлээ өвлүүлэх сонирхол ихтэй. Та ч гэсэн охиноо жүжигчин болгохыг зорьж байгаа гэл үү?
-Охин маань багын суурь хүмүүжил сайтай. Одоо миний мэргэжлийг өвлөх гээд ажиллаж байна. Би ч хажуунаас нь тэгэх ёстой, ингэх ёстой гээд бараг залхтал нь үглэх юм даа. Одоогоор ямар жүжигчин болохыг нь сайн хэлж мэдэхгүй байна.
-Хүмүүс кайфтай амьдарна гэж их ярьдаг. Таны хамгийн их кайф авдаг зүйл юу вэ?
-Ажлаасаа их кайф авдаг. Ер нь бид ихэнх цаг хугацааг ажлын байран дээр бэлтгэл сургуулилтаа хийгээд өнгөрөөдөг шүү дээ. Ийм сайхан жүжигчиний мэргэжил эзэмшээд түүнээсээ кайф авна гэдэг хамгийн том аз жаргал.Өөрөөр хэлбэл сэтгэл хангалуун байх агшин л хамгийн аз жаргал юм даа.
-Дуучид ивээн тэтгэгчтэй байдаг. Жүжигчдэд ч бүтээлийг үнэлсэн хүмүүс тодорхой хэмжээгээр тусалдаг хүмүүс байдаг байлгүй?
-Миний хувьд бусдаас эдийн засгийн тусламж аваад байдаггүй. Түүнээс илүү сэтгэл санааны урам өгөх нь надад хамгийн их баяр баяслыг авчирдаг. Ер нь эргэн тойронд сайхан хүмүүс байх тусам түүгээр тэтгэгдэж тэжээгдэж амьдардаг болов уу гэж боддог юм.
-Тайзан дээрх хамгийн сайхан дурсгалт агшин тань?
-Үзэгчдийн алга ташилтаар мялаалгах тэр агшинд хамгийн их баяр бахдал төрдөг. Өөрөөр хэлбэл үзэгчид сайхан хүлээж авах тусам омогшдог гэх үү дээ.
-Та чадварлаг сайн жүжигчний нэг. Ер нь сайн жүжигчин байхын тулд яаж хөдөлмөрлөх ёстой вэ?
-Сайн жүжигчин байхын тулд уйгагүй хөдөлмөрлөж, урлагт өөрийгөө зориулах ёстой. Сэтгэлээ бүрэн зориулж байж түүнийхээ үр шимийг хүртэнэ.
Зарим хүмүүс авьяастай л бол сэтгэл, ухаан хоёр хэрэггүй аяндаа л авьяасаараа цоороод гараад ирнэ гэдэг. Тийм биш. Тэр авьяасыг зөв хөтлөх зөв тийш нь залах, зөв хөгжүүлэх, хөглөх, тун хэмжээгээ барих энэ бүгдэд заавал ухаан хэрэгтэй.  Тэр ч утгаараа авьяас, ухаан, сэтгэл нийлж байж амжилтад хүрдэг.
-Таны хань бас жүжигчин хүн. Бие биедээ зөвлөж алдаа оноогоо ярилцахад амар байдаг байх даа?
-Тэгэлгүй яахвв. Манай Бархүү их мэдрэмжтэй. Айхтар залуу л даа. Уран бүтээлчийнхээ хувьд ч их авьяаслаг. Тийм учраас нэг нэйнийгээ илүү ойлгож миний уран бүтээл бас өөрийнхөө уран бүтээл дээр ярилцдаг. Ер нь бид хоёрын хувьд илүү амар, сэтгэл дүүрэн амьдарч байгаа.
-Хүн болгон янз бүрийн зүйл сонирхож түүндээ чөлөөт цагаа зарцуулдаг. Таны хувьд?
-Би багаасаа ном унших дуртай хүүхэд байлаа. Уншсан номныхоо үгүүдийг нь өдрийн тэмдэглэлдээ бичиж авдаг байлаа. Харамсалтай нь долдугаар сарын нэгний үймээний үеэр бичсэн зүйлүүд маань бүгд шатчихсан. Хувцас хунар, эд зүйл олдоно. Харин бичиж тэмдэглэсэн зүйл, ховор нандин зурагнууд эргээд нөхөгдөхөд хэцүү байдаг юм байна. Дээр нь ээж маань ээмэг бөгжний маш их цуглуулгатай атал би нэг их бөгж ээмэг зүүх дуртай биш. Нэг л том бөгж зүүдэг. Гэхдээ нас ахиад ирэхээр сайхаи ээмэг бөгжнөөс буцахгүй болох байх аа.
-Зарим хүмүүс олонд танигдаад нэр төр олоод ирэхээрээ хуучин найзуудаа мартах нь бий?
-Би хүнийг мэдлэг боловсрол, өмсч зүүсэн, гадаад өнгө төрх, амьдрал ахуйгаар нь ялгаж харьцах дургүй. Манай аав биднийг хар багаас нь хүнтэй хүн ёсоор харьц гэж мах цусанд     минь     шингэтэл ойлгуулсан. Энэ бол хүнд байх ёстой эрхэм чанарын нэг. Би энэ тал дээр маш их анхаардаг. Охиндоо ч хэлдэг.
Залуучуудыг ч тийм байгаасай гэж хүсдэг. Ажиглаад байхад зарим хүмүүс дарга даамал, нэр төртэй хүмүүстэй өөр харьцаад, ахуй амьдрал, ажил мэргэжил доогуур албан тушаалтай хүмүүстэй ширүүн харьцдаг. Хэчнээн эд хөрөнгө цуглуулсан, өндөр албан тушаалтай байсан ч бид нэг л өдөр хорвоогоос буцна шүү дээ.
Тийм учраас хүн болж төрсөн цаг үедээ бие биесээ хүндэтгэж сайхан харьцаж хайрлаж хамтарч нийгэмшиж амьдрах нь чухал юм.
-Өнөөдөр ялангуяа уран бүтээлч хүмүүсийн дунд атаархал их байдаг. Ер нь та атаархлыг юу гэж үздэг вэ?
-Атаархал авьяасгүй хүмүүсээс төрдөг зүйл. Илүү дутуугаа мэдрэхдээ л хүн хүнд атаархдаг байх. Урлагийн тогоонд атаархал багагүй байдаг. Энэ дунд өөрийгөө зөв авч явах хэрэгтэй. Ер нь урлагийн тогоонд өөрийгөө зөв авч явахад нэлээн ухаан зарцуулна шүү.Тэгэхгүйгээр өөрийгөө зөнд нь орхиод магтсан хүнд нь баярлаж, зэмлэсэн хүнд нь хорсож гомдоод байж болохгүй. Хүн магтаал, шүүмжлэлд их хянамгай хандах ёстой. Зарим нь худлаа магтана, бялдуучилж хөөргөж магтаж байхад зарим нь цаашлуулж, явуулж магтана гээд олон янз шүү дээ. Бас зэмлэл шүүмжлэл ч олон янз. Зарим нь нөхөрсөг байдлаар үнэн сэтгэлээсээ хэлж байхад зарим нь зориуд нэр хүндийг нь унагаж гутаан доромжлох нь ч бий.
-Таны хувьд жүжигчин болсноосоо хойш магтаал шүүмжлэл хоёрын алийг нь илүү сонссон бэ?
-Өөрийгөө магтаж байгаа юм биш л дээ. Магтаалыг илүү сонссон ч хянуур хандана гэж боддог. Хэтэрхий магтаалд хөөрсөн хүнээс сүүлдээ юм гарахаа ч больчихдог юм. Тиймээс ч уран бүтээлч хүн урдаас өөрийгөө харж сурах хэрэгтэй. Кино, жүжиг ч бай аль алинд нь тоглож байхдаа хүн өөрийгөө урдаас харж илүү хийж байна уу, дутуу хийж байна уу  гэдгээ харах чадвартай байх ёстой. Ийм нүд зайлшгүй байх ёстой.
-Энд тэнд явж байхад гарын үсгийг тань авъя гэсэн хүмүүс бишгүй таардаг биз?
-Хүүхдүүд зарим уран бүтээлч дээр цаасан дээр гарынх нь үсгийг зуруулах гээд ирдэг. Гэтэл тэд зурахгүй гээд татгалздаг. Харин охин маань ээжээ цаасны тасархай барьсан хүүхэд гарын үсгийг тань авъя гэвэл зураад л өгч байгаарай гэж хэлсэн. Магадгүй тухайн хүүхэд таны гарын үсгийг нэг өдөр гээчихэж болно шүү дээ.
Гэхдээ тэр гарын үсгийг хоёр цаг ч болов хадгалаад хүмүүст үзүүлж баярлах сэтгэл төрүүлнэ гэдэг нь чухал байхгүй юу. Түүний тулд гарын үсгээ өг гэдэг. Түүнээс та гарын үсгээ мөнхлүүлэх гээд байгаа юм биш гэж хэлсэн. Өмнө нь өөрөө ингэж бодож байгаагүй болохоор охиныгоо яасан гярхай юм бэ гэж бодож байсан шүү. Түүнээс хойш охиныхоо үгэнд ороод тасархай цаасан дээр ч хамаагүй гарын үсгээ зураад өгдөг болсон.
-Та нэг үе олны танил хүмүүстэй нэр холбогддог байсан. Энэ үед мэдээж мөрөөрөө ажлаа хийж яваад элдвийн хэл аманд ороод хэцүү санагддаг байсан биз?
-Түүнд би огт ач холбогдол өгдөггүй. Юм бүхнийг цаг хугацаа харуулна гэж бодоод өмнөх уран бүтээлээ хийгээд л явдаг байлаа. Хэтэрхий доромжлох, гүтгэх үе бишгүй байсан.
Тэр бүхэнтэй хөөцөлдөөд нэр төрөө олж авах гээд гүйж явах зав чөлөө ч байгаагүй.Цаг хугацаа өнгөрөх тусам хүний сэтгэлд тээгдсэн эмзэглэл, гомдол багасдаг. Тэгж л өөрийгөө тайвшруулдаг байлаа даа.
-Орчин үед хүмүүс мэдээллээс хоцрохгүйн тулд байнга өөрийгөө боловсруулдаг болсон. Та ч мөн ялгаагүй биз?
-Хүн цаг зав гарвал өөрийгөө боловсруулж байх хэрэгтэй, Ялангуяа бидэн шиг шоу урлагт хүч сорьж орчин цагтай хөл нийлүүлж алхах гэж яваа хүмүүсийн хувьд цаг үеэсээ хоцорч болохгүй.Тийм учраас орчин үеийн дуу бүжиг, өнөөгийн залуучууд юу сонирхож байна гэдгийг гярхай мэдэрч сурах хэрэгтэй. Ер нь цаг үеэсээ хоцорсон үгүй нь уран бүтээл дээр харагддаг.
-Та жүжиглэж, бүжиглэж, дуулж зарим үед хөтлөгч ч хийдэг. Ингэж юм юманд хүч сорьж байж уран бүтээлч хүн өсдөг байх?
-Би энэ тал дээр өөрийгөө голдог. Заримдаа дөрвөн жил юу сурсан бэ гэж бодож харамсдаг юм. Хэрэв тэр дөрвөн жилийн хугацаанд өөрийгөө хөгжүүлэхэд цаг зарцуулсан бол үүнээс илүү сайн дуулж бүжиглэх байсан. Өнөөдөр цаг үе, нийгэм маш хурдтай урагшилж байна. Жүжигчид ч гэсэн үүнтэй зэрэгцэж хөгжих шаардлагатай байна. Гэтэл шинээр гарч ирж байгаа жүжигчид дээрх хурдыг гүйцэхгүй сэтгэн бодох чадвар нь удаан байна. Тиймээс бүжиглэх дуулах тал дээр шинэ жүжигчид тааруухан байна гэж хэлж болно. Гэтэл гадаадын жүжигчид бүгд мундаг бүжиглэж дуулж байна. Бид яагаад тийм байж чадахгүй гэж. Үүнийг би сургах систем хоцорч байна гэж ойлгодог.
Цаашдаа ч залуу жүжигчдээс цаг үе илүү ихийг шаардана. Энэ бүхэнд жүжигчин хүн овсгоотой байж өөрийгөө бэлтгэх шаардлагатай болно гэсэн уг. Тиймээс дээрх шаардлагыг биелүүлэхийн тулд жүжигчид өөрсдийгөө боловсруулах ёстой гэж бодож явдаг даа.