Оюутнууд их, дээд сургууль, коллежид сургалтын төрийн сангийн хөнгөлөлттэй зээлээр суралцдаг. Үүнтэй ижил гадаадын дээд боловсролын сургалтын байгууллагад суралцагчид ч гэсэн зээл авч болох нь.

Хоёр улсын Засгийн газар хоорондын гэрээ, хэлэлцээрийн дагуу гадаадын дээд боловсролын сургалтын байгууллагад амьжиргааны тэтгэлэггүйгээр суралцаж байгаа Монгол Улсын иргэн, олон улсын нэр хүндтэй, гадаадын дээд боловсролын сургалтын байгууллагад зохих журмын дагуу элссэн оюутан, магистрант, докторантад зээл олгодог аж.

Зээлд хамрагдахын тулд суралцагчийн өргөдөл, боловсролын асуудал хариуцсан төрийн захиргааны төв байгууллагын шийдвэр хэрэг болно. Мөн суралцуулах тухай боловсролын асуудал эрхэлсэн Засгийн газрын гишүүний болон захиалагч байгууллагын шийдвэрийн хуулбар хэрэгтэй.

Итгэмжлэгдсэн төлөөлөгчөө томилсон тухай итгэмжлэл, өөрийн болон итгэмжлэгдсэн төлөөлөгчийн иргэний үнэмлэхийн хуулбар, боловсролын баримт бичгүүдийн хуулбар, зээл эргэн төлөх баталгаа болох үл хөдлөх хөрөнгийн үнэлгээ, гэрээ, эд хөрөнгийн улсын бүртгэлийн газрын тэмдэглэл хийлгэсэн байна. Суралцах сургуулийн урилга, сургалтын зардлын нэхэмжлэх, харилцах данс зэргийг бүрдүүлнэ.

Суралцагчдад нэг удаа зээл олгох ба хүндэтгэн үзэх шалтгаангүйгээр санхүүжилтээ тухайн ондоо багтааж ашиглаагүй тохиолдолд санхүүжилтийг зогсоодог аж.

Магистрантурт суралцах хугацаа хоёр жилээс, докторантурт суралцах болон нэг суралцагчид зээл олгох нийт хугацаа гурван жилээс илүүгүй байна.

Суралцагч гэрээгээ зөрчсөн тохиолдолд зээлийг хүүгийн хамт сургалтын төрийн санд буцааж төлнө. Амжилттай суралцаж төгсөөд гэрээнд заасан байгууллагад таваас доошгүй жил үр бүтээлтэй ажилласан тохиолдолд зээлийн төлбөрөөс чөлөөлөгдөх хүсэлт гаргаж болно.

Зээлийн төлбөрөөс чөлөөлөгдөх хүсэлт гаргасан иргэний асуудлыг сургалтын төрийн сангийн Удирдах зөвлөл хэлэлцэн, дүгнэлтийг Засгийн газарт оруулж шийдвэрлүүлдэг ажээ.