Эмэгтэй хүн бүр эр хүнд таалагдаж, хүндлүүлж, хайрлуулахыг хүсдэг. Гэвч тэр болгон санаснаар болдоггүй. Иймээс хүүхнүүд маань өөрийнхөө зарим нэг ааш авир, зан байдлаа эргэн харахад гэмгүй.

Эрчүүдийн дургүйг хүргэж, бүр дайжихад хүртэл нь залхаадаг хамгийн түгээмэл алдаанууд гэвэл:

Зорилгогүй дэлгүүр хэсдэг
Эмэгтэй хүн мөнгөтэй л болчихвол ганцаараа ч хамаагүй дэлгүүр хэсээд алга болчихдог. Үүнд нь эрчүүд дурамжхан ханддаг аж. Аль хэдийн авах ёстой бүх юмаа авчихсан хэрнээ хэрэгтэй хэрэггүй юм цуглуулан мөнгөө дуустал дэлгүүр хэсэх гээд байдаг нь хүүхнүүдийн гэм биш зан. Эрчүүд эмэгтэйчүүдийн энэ зорилгогүй үйлдлийг ойлгодоггүйн учир уурлаж бухимдах нь бий.

Үргэлж элдэв юм асууж шалгааж, байнга гомдоллож байдаг
Жишээ нь "Чамд нэг хэлэх зүйл байна", "Чи юу гэж бодож байна", "Чи яагаад дуугарахгүй байгаа юм бэ", "Чамд ямар санагдаж байна", "Хүүе чи миний хэлж байгаа зүйлийг сонсож байна уу", "Хүн юм яриад байхад чихгүй толгой оргиод байх юм" гэх мэтийн өдөөн хатгасан ч гэмээр, "ноцтой" асуултууд тавьдаг нь эрчүүдийг балмагдуулж орхидог байна. Яг ийм тулгасан асуултууд эрчүүдэд огт таалагддаггүй аж. Хэрэв өөдөөс нь дургүйцэх юм уу, огт харьцахгүй бол намайг тоосонгүй, надад хайргүй юм байна гэх мэт утга учиргүй зүйлсийг хэлж гомдолно. Сүүлдээ энэ нь хэрүүл болон хувирдаг.

Тасралтгүй юм ярьдаг
Хүүхнүүд, ажлаасаа бууж ирээд амарч буй эр нөхөртөө хажуу айлынхны тухай, хамаатангийнхаа авир ааш, хавийн хүмүүсийн тухай зогсоо зайгүй ярьдаг. Энэ нь эрчүүдэд үнэхээр төвөгтэй санагддаг. Яриаг нь сонсохгүй байсан ч үргэлжлүүлэн ярьсаар байдаг. Хэдийгээр тийм онцлогтой байдаг ч эмэгтэй хүн хэзээ юу ярихаа бас хянаж байх нь чухал.

Өөрийнхөө асуудалд бүгдийг оролцуулахыг хүсдэг
Зарим эмэгтэй өөрийнхөө асуудалд хэт их ач холбогдол өгдөг нь эрчүүдэд таалагддаггүй гэнэ. Өөрөө шийдчих асуудлыг дөвийлгөн ярьдаг хэрнээ нөхөрт нь тохиолдсон бэрхшээлийг үл тоомсорлосон байдлаар ханддаг аж. Магадгүй хань нөхөр эмэгтэй хүний мэргэн зөвлөмжийг хүсч байж болох юм шүү дээ.

Үглэж янших
Эр нөхрийнхөө үйлдсэн яльтай, яльгүй алдаа дутагдалыг өлгөн авч байнга үглэж яншдаг эмэгтэйчүүд байдаг. Чихээ бөглөөд хэвтсэн ч үглэсээр л байдаг. Түүнд ямар ч тайлбар тавиад нэмэргүй. Эрчүүд залхахаараа гэрээсээ дайжихаас өөр аргагүй болдог гэнэ. Үглэж яншдаг эмэгтэйн үг ч үнэ хүндгүй байдаг. Нэг л хэлсэн бол болох нь тэр.

Бусдыг муулж шүүмжлэх дуртай
Эмэгтэйчүүд үеийн үед өрсөлдөгчтэй байдаг. Хамгийн дотны найзаа ч муулж магадгүй. Тэгэхээр ажлын газрын, хөрш айлын, бусад хүүхнүүдийн талаар ярилтгүй гэсэн үг. Өндөг шиг өөгүй найз хүүхэн байсан ч өөлж гоочлох алдааг эмэгтэйчүүд олоод харчихдаг. "Эмэгтэйчүүдийн үерхэл хэврэг" гэсэн үг энэ бүхнээс улбаатай биз. Харин эрчүүдэд энэ зан таалагддаггүй. Учир нь эрчүүд бие биенээ барагтай л бол муулдаггүй онцлогтой.