1977 онд төрсөн 33 настай Монгол залуу хүний наймаачдын гараас Туркэд мултарч зугтжээ. Хамгийн хачирхалтай нь түүнийг нутаг нэгтэн нь буюу монгол эмэгтэй хүний наймаачдад зуучлан худалдаалахыг завдсан байгаа юм.   Тэрээр одоо Туркийн ямар хотод амь зулбан зугтааж яваа нь тодорхойгүй байна. 10 гаруй хогног сураг тасраад байсан хүү уржигдар монголд байгаа гэрийнхэнтэйгээ холбогдож, цагдаа гадаад харилцааны яамныханд яаралтай мэдэгдэж  амь аврахыг гуйсан байна. Ээжтэйгээ ярихдаа туркийн яг ямар нэртэй газар байгаагаа мэдэхгүй байна.  Араас нь олон хүн хайж байгаа учраас хамаагүй ил тод ярих боломжгүй гээд, интернэтээр дохио зангаагаар шахам ярьж,маш их айж байна  гэж хэлсэн байна.

Гэр бүлийнхэн нь Гадаад харилцааны яамны консулын газарт мэдэгдээд байна. Тэр залуу хамгийн анх 6 эрэгтэй 2 эмэгтэй монголчуудынхаа хамтаар грек рүү гаргуулна гэж өөрийн нутаг нэгтэн монгол эмэгтэйд хүн тус бүр   1500 доллар өгч тохиролцжээ. Ингээд тэднийг нэг байранд  гар утас бичиг баримт болон гутлыг нь хураагаад тэр эмэгтэй  түр орогнож бай гэж оруулсан байна. Гэтэл гэнэт олон турк залуу орж ирж эрэгтэйчүүдийг нь  зодож,хоёр эмэгтэйг нь тэдний  нүдэн дээр зэрлэгээр хүчирхийлсэн байна. Тэр үед 33 настай залуу цонхоор үсэрч зугтаасан гэж ээждээ ярьсан байна. Тэрээр 4 давхрын цонхноос үсэрсэн ч азаар хүнд гэмтэлгүй байсан бололтой зугтааж амжсан бол араас нь 2 ч залуу үсэрчээ. Харин нэг нь газар дээрээ нас барсан байж магадгүй хөдлөхгүй байсан нөгөөх нь яасныг мэдэхгүй байна гэж хүү нь ээждээ ярьсан байна.

Тэгээд өөрийгөө болон үлдсэн залуус эмэгтэйчүүдээ монголын төр яаралтай суллаж авахыг хүү нь хүссэн байна. Зугтсан залуу Шведээс туркэд ирсэн байна. Туркэд хууль бусаар байсан учраас зуучлагчаар дамжуулан грек рүү гарахыг оролдож байхдаа тэдгээр хүмүүсийн хорионд орсон байна.  Түүний гэр бүлийнхэндээ хэлснээр бол зуучлагч монгол эмэгтэй өмнө нь монголчуудыг хүнд худалдаалдаг байсан байж болзошгүй гэнэ. Улмаар тэднийг доромжилсон этгээдүүд хүний наймааны сүлжээнийхэн байх магадлалтай гэж ярьсан байна.