Монгол улсын иргэн бүрт хишиг хувь хүртээх ажлыг 2010 оноос эхлүүлсэн. Өнөөдрийн байдлаар хишиг олголт хэдэн хувьтай байгаа болоод иргэд дараагийн 50 мянган төгрөгийг хэзээ хүртэж эхлэхийг Хөдөлмөр,халамж үйлчилгээний газрын мэргэжилтэн Д.Ганчимэгээс тодрууллаа.

-Улсын хэмжээнд хишиг хувь хүртээх ажил ямар шатандаа явж байна вэ?

-Зургадугаар сарын долооны өдрийн байдлаар хоёр сая дөрвөн зуун дөчин дөрвөн мянга гаруй хүнд хүний хөгжлийн сангийн дэвтэр нээх үйлчилгээ үзүүлсэн байна. Энэ нь нийт хүн амын 90.5 хувийг эзэлж байгаа юм. үүнээс хоёр сая гурван зуун арван мянга гаруй хүн мөнгөө авсан.

-Дараагийн хишиг олголт буюу 50 мянган төгрөгийг хэзээ авах бол гэж иргэд их сонирхож байгаа байх?

-Ерөнхийдөө энэ ондоо багтаагаад иргэн бүрт 120 мянган төгрөг олгохоор төлөвлөсөн. үүний 70 мянгыг үндсэндээ олгоод дуусч байна. Харин үлдсэн 50 мянгыг ирэх сарын нэгнээс олгоно. Гэхдээ иргэний шинэчилсэн бүртгэл явуулж байж иргэний шинэчилсэн бүртгэлд хамрагдсан иргэд уг мөнгийг хүртэх боломжтой болох юм.

-Иргэний шинэчилсэн бүртгэл хэзээ явагдах вэ?

-Шинэчилсэн бүртгэлийг долдугаар сарын нэгнээс эхэлж улсын бүртгэлийн байгууллагууд зохион байгуулна. үүнд иргэний дижитал зураг, хурууны хээ авах, бүх иргэдийг коджуулах зэрэг үйл ажиллагааг зохион байгуулах юм байна лээ. Улсын бүртгэлийн байгууллагад албан ёсоор шинэчилсэн бүртгэлд хамрагдаж, бар код нь идэвхижсэн хүмүүсийн нэр манай байгууллагад орж ирнэ. үүний дагуу тэр хүмүүст 50 мянган төгрөгийг хүртээнэ.