Дэлхийн ихэнх оронд нарийхан гоолиг байх нь сайхан гэсэн хандлага өргөн тархсан байдаг. Энэ ойлголтоос болж эмэгтэй хүн бүр амьдралынхаа тодорхой нэг үед хоолны дэглэм сахидаг. Тэднээс үнэхээр жингээ хасч амжилтад хүрсэн нь байдаг л байх. Гэхдээ хүн бүр сэтгүүлийн зураг дээрх загвар өмсөгч шиг нарийхан, өндөр болно гэдэг боломжгүй юм.

Нарийхан гоолиг байх бодол охидын толгойноос салдаггүй. Өөрийгөө тарган байна гэж бодоод жингээ хасахын тулд хоолоо сойж, дасгал хийх нь хоолонд дургүй болох нэг эмгэг юм. Нарийхан болсон ч санаа нь амардаггүй. Хэт ховдог болж их идэхийн зэрэгцээ жингээ нэмэхгүйн тулд идсэн хоолоо хүчээр бөөлжиж гаргах нь бий. Буруу хооллож байгаа иймэрхүү явдал сэтгэлийн ямар нэг таагүй байдлын илрэл хэмээн сэтгэлзүйчид үздэг байна.

Хөлний үзүүрээ харах хэрэггүй

Хэт ичиж зовдог зангаа орхих нь хэцүү байдаг. Гэхдээ та дэмий ичиж зовдоггүй байхад суралцаж болно.

Та нүүрэмгий хүний дүрд тоглож, дасгал хий. Тэгснээр ичиж зовох зангаа орхиж, энэ байдалдаа дасах болно.

Та харилцаж буй хүн рүүгээ эгц харж ярь. Өөрийн хөлний үзүүрийг хараад ярих тийм ч тааламжтай биш шүү дээ.

Өөрийнхөө тухай мартахыг хичээ. Бусад хүн болон эргэн тойронд болж буй зүйлсэд анхаарал хандуул. Бусад хүнд ч гэсэн ичимхий зан байдаг гэдэгт итгэ.

Эмэгтэйчүүд хөгжилтэй байдлыг чухалчилдаг

Дурласан хосууд бие биенийхээ нүдийг харуулдах нь тохиолдлын зүйл биш хэмээн сэтгэлзүйчид үздэг. Ямар нэгэн зүйл бидний анхаарлыг татаж, таалагдахад нүдний хүүхэн хараа өргөсдөг байна. Хүмүүс ихэнхдээ чухам юу царай зүсийг “хөөрхөн” болгодог вэ гэдэг дээр санаа нийлдэг. Харин чухам юу бэлгийн дур хүслийг төрүүлдэг вэ гэдэг дээр өөр өөр бодолтой байдаг. Статистикийн тоо баримтаас үзэхэд эрчүүд гадаад төрх, үзэмжийг илүү сонирхдог бол эмэгтэйчүүд гадна төрхөөс илүү оюун ухаан, хөгжилтэй байдлыг чухалчилдаг байна.

Өөртөө итгэлтэй хүн ч ганцаарддаг

Найз нөхөдтэй болох, тэдэнтэй харилцаагаа удаан хугацаагаар хадгалах нь тийм ч амар биш. Ганцаардаж байгаа үед бүх хүн цагийг зугаатай өнгөрөөж байхад би л ганцаараа тавгүй байна гэ­сэн мэдрэмж төрдөг.  Гэхдээ энэ нь өөртөө итгэлтэй хүмүүст ч тохиолддог мэдрэмж юм.

Найз нөхөдтэй болох хэцүү гэж боддог бол тэд ч бас өөрсдөө хү­рээд ирэхгүй гэдгийг сана. Хүн бүр найз нөхөдтэй болохын тулд хичээх хэрэгтэй. Спортоор хичээллэж, чөлөөт цагаа үр дүнтэй өнгөрүүлэх гээд арай илүү идэвхтэй замыг сонгож болох юм.