Өнөөдөр  МУ-ын аюулгүй байдлын төлөө зүтгэе ТББ, Монголын гол нууруудын нэгдсэн хөдөлгөөн, Хохирогчдын нэгдсэн холбоо, Хөх нуруут, Тусгаар тогтнол зэрэг  иргэний хөдөлгөөнүүд хэвлэлийн бага хурал хийлгэлээ. Тэд Монгол улсын Ерөнхийлөгч, Ерөнхий сайд, УИХ-ын дарга нарт шаардлага хүргүүлсэн тухайгаа мэдэгдсэн нь энэ агаад шаардлагын хариуг 7 сарын 16-ний дотор өгөхгүй бол бүх нийтийн бослого гаргана хэмээн мэдэгдэв. Сонирхолтой нь уг нэгдсэн хөдөлгөөн гэгчийг дуучин, УГЖ С.Жавхлан удирдаж буй ажээ. Шаардлагыг бүрэн эхээр нь сийрүүллээ.

“Гол мөрний урсац бүрэлдэх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хууль батлагдаад нэг  жил болж байхад Засгийн газар хууль биелүүлэхээс зайлсхийж байна.  Иймд гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газрын хилийн заагийг энэ сарын 7-ны өдрийн  Засгийн газрын хуралдаанаар хэлэлцэж батлах шаардлагатай.  “Гол мөрний урсац бүрэлдэх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хууль хэрэгжих газрыг энэ сарын 16-ны дотор онц чухал обьектын жагсаалтад авахыг шаардаж байна.
- Тавантолгойн нүүрсний ордоос олох ашгийн зөвхөн 10 хувийг ард иргэдэд хувьцаа хэлбэрээр  хүртээж, үлдсэн 90 хувийг цөөн хэдэн этгээд гадныхантай хувааж завших гэж байна.  Мөн Хайгуулын “Лиценз” нэрээр Монголын газар нутаг, байгалын баялгийг худалддаг болсноос өнөөг хүртэл нийт хичнээн хэмжээний баялаг гадагш гарч, олзворлогчид ямар ашиг хүртэж , Монгол Улс ямар ашиг олсныг олон нийтэд баримтаар тодорхой гаргах хэрэгтэй.
-Монгол Улс өдөр бүр ажилгүйчүүдээр хүрээгээ тэлсээр байхад гадны ажилчдыг үй олноор нь оруулж ирэн монгол ажилчдын ажлын байрыг эзлүүлж, амьжиргаа, орлогыг нь булааж байна. Иймд гадаадын ажилчид оруулж ирэх төсөл, гэрээ хэлцлүүдийг нэн даруй зогсоох, гадны ажилчдыг  ирэх есдүгээр сарын 1 гэхэд нэн даруй нутаг гаргахыг шаардаж байна. Гаднаас авсан зээлийг тухайн зээл олгогч улсын иргэдийг ажлын байраар ханагхад зориулж буцаан зарцуулж байна. Харин зээлийн өрийг Монголын ард түмний нуруунд үүрүүлж байгаа бодлогыг таслан зогсоож, Монголын нийт ажилгүй иргэдийг ажлын байраар хангах хэрэгтэй.
-Монгол хүний хийж бүтээж чадах бүтээгдэхүүн, үйлдвэрлэлийг гаднаас импортоор оруулж ирэн мөнгөө гадагш урсгаж байна. Үүнээс болон гадаад вальют шүтэж, үндэсний мөнгөн тэмдэгтээ үнэгүйдүүлж байгааг зогсоох хэрэгтэй.
-УИХ-ын сонгуулийн дүнг  булхай луйврын аргаар өөрчлөн, хууль бусаар төрийн эрх мэдлийг булаан авсныг  ард түмэн эсэргүүцсэн. Энэ нь олон нийтийн эмх замбараагүй байдал үүсгэсэн энэ үеэр ард иргэд рүү буу шагайн, шүүхийн ямар ч тогтоолгүйгээр таван хүний амь хохироосон.  Олон хүнийг эрэмдэг  зэрэмдэг болгосон цуст хядлагын хариуцлагыг тухайн үеийн Төр засгын  удирдлагад байсан этгээдүүдтэй  хариуцлага тооцож, Монгол улсын төр нийт ард түмнээсээ уучлал гуйх хэрэгтэй.
Эдгээр шаардлагын хариуг энэ сарын 16-ны дотор олон нийтэд нээлттэй хэлбэрээр  өгөхийг шаардаж байна. Шаардлагыг үл тоомсорлосон тохиолдолд монголчууд нийтээрээ босон тэмцэж болзошгүй нөхцөл байдал нэгэнт үүсээд байгааг анхааруулж байна”